ខេត្តកំពង់ស្ពឺ៖ កាលពីព្រឹកថ្ងៃទី០១ ខែកញ្ញា ឆ្នាំ២០២៥នេះ ឯកឧត្តម ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ និងជាប្រធានក្រុមការងារ…
ខេត្តកំពង់ស្ពឺ៖ កាលពីព្រឹកថ្ងៃទី០១ ខែកញ្ញា ឆ្នាំ២០២៥នេះ ឯកឧត្តម ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ និងជាប្រធានក្រុមការងារ រាជរដ្ឋាភិបាលចុះមូលដ្ឋានខេត្តកំពង់ស្ពឺ អញ្ជើញដឹកនាំគណៈប្រតិភូ អមដំណើរដោយឯកឧត្តមបណ្ឌិត ជាម ច័ន្ទសោភ័ណ អភិបាល នៃគណៈអភិបាលខេត្តកំពង់ស្ពឺ និងថ្នាក់ដឹកនាំខេត្ត អញ្ជើញជួបសំណេះសំណាលសួរសុខទុក្ខជាមួយ ក្រុមគ្រួសារកងទ័ពដែលឈរជើងនៅតាមបន្ទាត់ព្រំដែន ចំនួន៧២៨ គ្រួសារ ក្នុងក្រុង/ស្រុកទាំង៩ ខេត្តកំពង់ស្ពឺ ព្រមទាំងមានការអញ្ជើញចូលរួមពី ឯកឧត្តម លោកជំទាវ លោក លោកស្រី ប្រធាន អនុប្រធានមន្ទីរអង្គភាពជុំវិញខេត្ត អភិបាល ក្រុង/ស្រុក និងក្រុមគ្រួសារកងទ័ព ជាច្រើនទៀត។
ឯកឧត្ដម ហ៊ុន ម៉ានី ឧបនាយករដ្ឋមន្ត្រី បានពាំនាំការផ្តាំផ្ញើសាកសួរសុខទុក្ខអំពីសំណាក់សម្តេចតេជោ ហ៊ុន សែន ប្រធានព្រឹទ្ធសភា និងជាប្រធានឧត្តមក្រុមប្រឹក្សាព្រះមហាក្សត្រ នឹងសម្តេចកិត្តិព្រឹទ្ធបណ្ឌិតប៊ុនរ៉ានី ហ៊ុន សែន រួមនឹងសម្តេចមហាបវធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា តែងតែគិតគូរពីសុខទុក្ខគ្រួសារកងទ័ពដែលឈរជើងតាមខ្សែបន្ទាត់ព្រំដែន ។
ឯកឧត្តមឧបនាយករដ្ឋមន្ត្រី ហ៊ុន ម៉ានី បានបន្តទៀតថា កម្ពុជាបានរងនូវការឈ្លានពានទឹកដីពីសំណាក់ទាហានសៀម ហើយបានប៉ះទង្គិចគ្នា ធ្វើឱ្យវីរៈកងទ័ពជួរមុខរបស់យើងរងរបួសនិងពលីជីវិត ប៉ុន្តែភាពខ្លាំងអង់អាចរបស់បងៗកងទ័ព មិនត្រឹមតែទទួលបានការគោរពពីប្រជាជនកម្ពុជាប៉ុណ្ណោះទេ វាបានធ្វើឱ្យពិភពលោកទាំងមូលមានការភ្ញាក់ផ្អើលនិងចងចាំជានិច្ចនូវវីរៈភាពរបស់វីរៈកងទ័ពរបស់យើង នៅក្នុងពេលវេលាដ៏លំបាកនេះមានតែកម្លាំងសាមគ្គីផ្ទៃក្នុងឱ្យបានរឹងមាំ និងជឿជាក់លើថ្នាក់ដឹកនាំរាជរដ្ឋាភិបាលកម្ពុជា ក្នុងការស្វែងរកសន្តិភាពធានាឱ្យបានមិនឱ្យបាត់បង់ទឹកដីសូម្បីតែមួយមីលីម៉ែត្រ និងកងកម្លាំងជួរមុខបន្តអត់ធ្មត់ឱ្យបានខ្ពស់បំផុតក្នុងការប្រឈមមុខជាមួយ និងចោរឈ្លានពានសៀម ឯកឧត្តមក៍ថ្លែងអំណរគុណចំពោះការលះបង់របស់វិរៈកងទ័ពដែលបានឈរជើងដ៏រឹងមាំមកដល់ពេលបច្ចុប្បន្ននេះ។
សូមបញ្ជាក់ផងដែរថា ឯកឧត្តមឧបនាយករដ្ឋមន្ត្រីបាននាំយកអំណោយជូនដល់ក្រុមគ្រួសារជួរមុខ ចំនួន៧២៨ គ្រូសារ ក្នុងមូលដ្ឋានខេត្តកំពង់ស្ពឺ ក្នុងនោះក្នុងមួយគ្រួសារទទួលបាន អង្ករ ,ទឹកត្រី ,ទឹកសុីអុីវ ,មី ត្រីខ, រួមទាំងថវិកាមួយចំនួនទៀតផងដែរ ៕
ចែករំលែកព័តមាននេះ