ខេត្តមណ្ឌលគិរី ៖ ដើម្បីចូលរួមលើកស្ទួយជីវភាពប្រជាពលរដ្ឋ ដែលរស់នៅតំបន់ភូមិភាគឦសាន ក្រុមការងាររាជរដ្ឋាភិបាលចុះមូលដ្ឋានខេត្តមណ្ឌលគិរី បានចែកចង្ក្រានបង្កើនថាមពលឈ្មោះព្រៃមាន់ ជូនដល់ប្រជាពលរដ្ឋចំនួន១ ៦២៧គ្រួសារ ដោយក្នុងមួយគ្រួសារៗទទួលបានចង្ក្រានមួយ ។…
ខេត្តមណ្ឌលគិរី ៖ ដើម្បីចូលរួមលើកស្ទួយជីវភាពប្រជាពលរដ្ឋ ដែលរស់នៅតំបន់ភូមិភាគឦសាន ក្រុមការងាររាជរដ្ឋាភិបាលចុះមូលដ្ឋានខេត្តមណ្ឌលគិរី បានចែកចង្ក្រានបង្កើនថាមពលឈ្មោះព្រៃមាន់ ជូនដល់ប្រជាពលរដ្ឋចំនួន១ ៦២៧គ្រួសារ ដោយក្នុងមួយគ្រួសារៗទទួលបានចង្ក្រានមួយ ។ ពិធីចែកចង្ក្រានបង្កើនថាមពលនេះ ត្រូវបានរៀបចំធ្វើឡើងនៅបរិវេណសាលាក្រុងសែនមនោរម្យ កាលពីព្រឹកថ្ងៃទី៣១ ខែសីហា ឆ្នាំ២០២៥ ក្រោមបរិយាកាសសប្បាយរីករាយពីសំណាក់បងប្អូនប្រជាពលរដ្ឋ។
ឯកឧត្តម ហេង រត្នពិសិដ្ឋ សមាជិកក្រុមការងាររាជរដ្ឋាភិបាលចុះមូលដ្ឋានខេត្តមណ្ឌលគិរី មានប្រសាសន៍ថា រាជរដ្ឋាភិបាលតែងគិតគូរអំពីសុខុមាលភាព និងជីវភាពរបស់ពលរដ្ឋ បង្កើតបានជាចំណងដ៏រឹងមាំរវាងថ្នាក់ដឹកនាំ និងប្រជាពលរដ្ឋ ។ ដោយមើលឃើញពីតម្រូវការប្រើប្រាស់ប្រចាំថ្ងៃរបស់បងប្អូនប្រជាពលរដ្ឋ សប្បុរសជនតាមរយៈអាជ្ញាធរក្រុងសែនមនោរម្យ បានសហការរៀបចំឲ្យអ្នកភូមិអាចទទួលបានចង្ក្រានប្រើអុសដែលមានគុណភាព ជួយដល់បរិស្ថាន និងកាត់បន្ថយការចំណាយ ។ ការផ្តល់ជូនចង្ក្រានបង្កើនថាមពលនាពេលនេះ ក៏ជាការរួមចំណែកតិចតួចដល់បងប្អូន ក្នុងការប្រើប្រាស់និងជួយសន្សំសំចៃ ថ្លៃចំណាយលើអុសដុតដាំស្លប្រចាំថ្ងៃផងដែរ ។
កឧត្តមបានផ្តាំផ្ញើដល់បងប្អូនប្រជាពលរដ្ឋទាំងអស់ ត្រូវយកចិត្តទុកដាក់ថែរក្សាសុខភាព ខណៈរដូវនេះមានភ្លៀងធ្លាក់ច្រើន អាចកើតមានជំងឺឆ្លងនានា ជាពិសេសកុមារតូចៗដែលប្រឈមខ្លាំងជាងគេ និងត្រូវដាំដុះដំណាំជុំវិញផ្ទះ ឬចិញ្ចឹមសត្វ ដើម្បីកាត់បន្ថយការចំណាយមួយផ្នែកក្នុងគ្រួសារ ឬអាចលក់ដូរបានចំណូលទៀតផង។
ឯកឧត្តម សាខុម ប៉ូរិន អគ្គលេខាធិការរង និងជាប្រធានបណ្តាញសង្គមស៊ីវិលកម្ពុជា(CCN)មាន ប្រ សាសន៍ថា អត្ថប្រយោជន៍នៃការប្រើប្រាស់ចង្ក្រានបង្កើនប្រសិទ្ធភាពថាមពល មិនត្រឹមតែជួយសន្សំសំចៃថវិកាប៉ុណ្ណោះទេ ចង្ក្រានប្រភេទនេះប្រើប្រាស់អុស ឬធ្យូងតិចជាងចង្ក្រានធម្មតា ។ មិនត្រឹមតែប៉ុណ្ណោះ ថែមទាំងបានជួយដល់ដល់បងប្អូនអ្នកផលិតចង្ក្រានដែលមានឈ្មោះថា ព្រៃមាន់ នេះទៀតផង ដែលពួកគាត់ខ្លះកន្លងមកជាអ្នកអត់មានការងារធ្វើ មានជីវភាពក្រីក្រ ។ចង្ក្រាននេះ ត្រូវបានរចនាឡើងដើម្បីប្រមូលផ្តុំកម្ដៅបានល្អ ដែលធ្វើឱ្យការចម្អិនអាហារឆាប់ឆ្អិនជាងមុន ។
ួយសន្សំសំចៃពេលវេលារបស់ប្រជាពលរដ្ឋក្នុងការរៀបចំម្ហូបអាហារប្រចាំថ្ងៃ។សរុបមក ការចែកជូនចង្ក្រានប្រភេទនេះ មិនត្រឹមតែជាជំនួយបន្តិចបន្តួចប៉ុណ្ណោះទេ ប៉ុន្តែវាក៏ជាការលើកកម្ពស់ជីវភាពរស់នៅ និងការចូលរួមថែរក្សាបរិស្ថាន ក្នុងរយៈពេលវែងផងដែរ ។ លោក ហៀក សុផាន អភិបាលក្រុងសែនមនោរម្យ បានថ្លែងអំណរគុណក្រុមការងាររាជរដ្ឋាភិបាលចុះមូលដ្ឋានខេត្តមណ្ឌលគិរី ដែលបានជួយឧបត្ថម្ភគាំទ្រដល់បងប្អូនប្រជាពលរដ្ឋក្នុងមូលដ្ឋាន ឲ្យបានប្រើប្រាស់នូវចង្ក្រានដែលជួយទាំងផ្នែកបរិស្ថាន និងជួយកាត់បន្ថយការចំណាយប្រចាំថ្ងៃរបស់ប្រជាពលរដ្ឋ ជាពិសេសអ្នកដែលមានជីវភាពខ្សត់ខ្សោយ ៕
ចែករំលែកព័តមាននេះ