ខេត្តកំពង់ឆ្នាំង ៖ ដោយអនុវត្តតាមការណែនាំរបស់រាជរដ្ឋាភិបាល និងស្មារតីនៃកិច្ចប្រជុំ ដឹកនាំដោយឯកឩត្តម ស៊ុន សុវណ្ណារិទ្ធិ គណៈបញ្ជាការរដ្ឋបាលខេត្តកំពង់ឆ្នាំង នៅថ្ងៃទី២៧ ខែសីហា…
ខេត្តកំពង់ឆ្នាំង ៖ ដោយអនុវត្តតាមការណែនាំរបស់រាជរដ្ឋាភិបាល និងស្មារតីនៃកិច្ចប្រជុំ ដឹកនាំដោយឯកឩត្តម ស៊ុន សុវណ្ណារិទ្ធិ គណៈបញ្ជាការរដ្ឋបាលខេត្តកំពង់ឆ្នាំង នៅថ្ងៃទី២៧ ខែសីហា ឆ្នាំ២០២៥ អមដោយលោក ជា សុខរិទ្ធិ អភិបាលរងខេត្ត ដឹកនាំក្រុមការងារចុះណែនាំសេចក្តីជូនដំណឹង ស្ដីពីការបម្លាស់ទីផ្ទះទឹកដល់ប្រជាពលរដ្ឋ ដែលរស់នៅលើផ្ទៃទឹកបឹងទន្លេសាប ស្ថិតនៅភូមិក្រមាល់ ឃុំប្រឡាយមាស និងភូមិពាមខ្នង ឃុំផ្លូវទូក ស្រុកកំពង់លែង ខេត្តកំពង់ឆ្នាំង ។
ឯកឩត្តម ស៊ុន សុវណ្ណារិទ្ធិ មានប្រសាសន៍ថា ការងារពិនិត្យវឌ្ឍនភាពនៃការអនុវត្តផែនការបម្លាស់ទីផ្ទះទឹក ក្នុងភូមិសាស្ត្រខេត្តកំពង់ឆ្នាំង ត្រូវបានអនុវត្តតាមផែនការ ស្តីពីការរៀបចំសណ្តាប់ធ្លាប់សាធារណៈ សោភ័ណភាព និងអភិវឌ្ឍន៍ តំបន់មាត់ទន្លេនៅតាមបណ្តាក្រុង ស្រុក ក្នុងខេត្តកំពង់ឆ្នាំង ធ្វើឱ្យមានលំនឹងជីវៈចម្រុះ បរិស្ថាននៅលើផ្ទៃទឹក ចូលរួមចំណែកអភិវឌ្ឍន៍វិស័យទេសចរណ៍ និងសុខុមាលភាពសង្គម រួបរួមលើកកម្ពស់ជីវភាព និងសេដ្ឋកិច្ចរបស់ប្រជាពលរដ្ឋ ។
ឯកឩត្តមអភិបាលខេត្តបន្តថា ការអនុវត្តកិច្ចការងារខាងលើ ដើម្បីបង្ខិតសេវារដ្ឋបាល និងសេវាសាធារណៈ ឱ្យកាន់តែកៀកប្រជាពលរដ្ឋ លើសពីនេះ ដើម្បីទប់ស្កាត់បទល្មើសផ្សេងៗ ដូចជាបទល្មើសនេសាទ គ្រឿងញៀន និងបទល្មើសអន្តោប្រវេសន៍ ។ល។
គួរបញ្ជាក់ថា អាជ្ញាធរខេត្តកំពង់ឆ្នាំង បានធ្វើការបម្លាស់ទីផ្ទះបណ្តែតទឹកឱ្យឡើងមករស់នៅលើគោករួចរាល់១០០% សរុបចំនួន ៤ ១២១ខ្នងផ្ទះ ក្នុងនោះប្រជាពលរដ្ឋខ្មែរចំនួន ២ ២៦៣ខ្នងផ្ទះ ប្រជាពលរដ្ឋខ្មែរអ៊ិស្លាមចំនួន ៧៣ខ្នងផ្ទះ និងជនអន្តោប្រវេសន៍វៀតណាមចំនួន ១ ៧៨៥ខ្នងផ្ទះ ។
ករណីបម្លាស់ទីផ្ទះបណ្ដែតទឹកនេះ រាជរដ្ឋាភិបាល បានសម្រេចបង្កើតគណៈកម្មការចំពោះកិច្ចមួយ ដើម្បីដោះស្រាយបញ្ហាផ្ទះបណ្តែតទឹក និងបែចិញ្ចឹមត្រី ដែលស្ថិតនៅក្នុងភូមិសាស្ត្រខេត្តចំនួន៥ជុំវិញបឹងទន្លេសាប ។ ការសម្រេចបង្កើតគណៈកម្មការចំពោះកិច្ចនេះ បានបង្កើតឡើងដោយសម្ដេចធិបតីនាយករដ្ឋមន្ត្រី ហ៊ុន ម៉ាណែត កាលពីថ្ងៃទី១០ ខែកក្កដា ឆ្នាំ២០២៥ និងត្រូវបានផ្សព្វផ្សាយជាសាធារណៈនៅថ្ងៃទី១៣ ខែកក្កដា ឆ្នាំ២០២៥ ។
គណៈកម្មការចំពោះកិច្ចនេះ ត្រូវបានដឹកនាំដោយឯកឧត្តមអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ជាប្រធាន ។ គណៈកម្មការនេះ មានអនុប្រធានចំនួន៥រូប មកពីស្ថាប័នចម្រុះ រួមមានក្រសួងមហាផ្ទៃ ក្រសួងសេដ្ឋកិច្ច និងហិរញ្ញវត្ថុ និងក្រសួងដែនដី ។ ក្រៅពីនេះ គណៈកម្មការចំពោះកិច្ច ក៏មានសមាជិកប្រមាណ២០រូប ដែលមកពីក្រសួងស្ថាប័នពាក់ព័ន្ធចំនួន១០ រួមនឹងអភិបាលខេត្ត ដែលស្ថិតនៅជុំវិញបឹងទន្លេសាបចំនួន៥ រួមមានខេត្តបាត់ដំបង សៀមរាប កំពង់ធំ ពោធិ៍សាត់ និងខេត្តកំពង់ឆ្នាំង ។
ក្នុងសេចក្តីសម្រេចនេះ រាជរដ្ឋាភិបាលក៏បានបញ្ជាក់ពីភារកិច្ចរបស់គណៈកម្មការចំពោះកិច្ចចំនួន១៣ចំណុចដែរ ដែលក្នុងនោះរួមមាន ការរៀបចំផែនការយុទ្ធសាស្ត្ររយៈពេលមធ្យម និងរយៈពេលវែង សម្រាប់ធ្វើការបម្លាស់ទីផ្ទះបណ្តែតទឹកមកលើដីគោក ព្រមទាំងដាក់ចេញគោលការណ៍ណែនាំតម្រង់ទិសដល់ខេត្តទាំង៥ ជុំវិញបឹងទន្លេសាប ក្នុងការអនុវត្តវិធានការបម្លាស់ទីផ្ទះបណ្តែតទឹកមករស់នៅលើដីគោក ។
អ្នកវិភាគសង្គមនយោបាយ នៃបញ្ហាសិទ្ធិមនុស្ស និងបរិស្ថាន បានសម្តែងនូវការគាំទ្រដល់ការបង្កើតគណៈកម្មការចំពោះកិច្ចរបស់រដ្ឋាភិបាលនាពេលនេះ ។ ក៏ប៉ុន្តែលោកជំរុញឲ្យគណៈកម្មការនេះ សហការជាមួយអាជ្ញាធរមូលដ្ឋាន ដើម្បីពិនិត្យ និងធ្វើស្ថិតិសហគមន៍ផ្ទះបណ្តែតទឹកទាំងអស់ឡើងវិញ ធានាឲ្យបាននូវសណ្តាប់ធ្នាប់ និងសុខុមាលភាព ចៀសវាងការបំពុលបរិស្ថាន និងអនាម័យក្នុងទឹកបឹងទន្លេសាបបន្តទៀត ។
ទោះយ៉ាងណា គេមិនអាចដឹងច្បាស់លាស់នៅឡើយ ចំពោះស្ថិតិប្រជាជនដែលកំពុងរស់នៅ និងប្រកបរបរចិញ្ចឹមត្រីតាមបែនៅជុំវិញបឹងទន្លេសាបទាំងមូលនោះនៅឡើយទេ ៕
ចែករំលែកព័តមាននេះ