ប្រទេស​ហ្វី​លី​ពី​ន ៖ តាម​ប្រភព​ពី​សារព័ត៌មាន Politiko របស់​ហ្វី​លី​ពី​ន កាលពី​ពេល​ថ្មី​ៗ​នេះ​បានឱ្យ​ដឹង​ថា បងប្អូន​ប្រុស​ពីរ​នាក់​ដែល​ជា​សមាជិក​សភា​ហ្វី​លី​ពី​ន គឺ​លោក Rufus Rodriguez តំណាង​សង្កាត់​ទី ២ នៃ​ទីក្រុង Cagayan de Oro កោះ Mindanao និង​លោក Maximo Rodriguez Jr. មក​ពី​គណបក្ស Abante Mindanao (ABAMIN) បាន​ស្នើ​ច្បាប់​មួយ ដើម្បី​ដាក់ទោស​លើ​ការ​ផ្សព្វផ្សាយ​ព័ត៌មាន​មិន​ពិត​តាម​ប្រព័ន្ធ​អ៊ីនធឺណិត​។ នេះ​បើ​តាម​ប្រភព​ពី​សារព័ត៌មាន​វៀតណាម Tuoi Tre ចេញផ្សាយ​កាលពី​ថ្ងៃ​​២៨ ខែសីហា កន្លង​ទៅ​។

ច្បាប់ House Bill លេខ ៣៧៩៩ ដែល​ត្រូវ​បាន​ស្គាល់​ថា «​ច្បាប់​ប្រឆាំង​នឹង​ព័ត៌មាន​ក្លែងក្លាយ និង​ព័ត៌មាន​មិន​ពិត​» ត្រូវ​បាន​ស្នើ​ឡើង​ឱ្យ​ផ្តន្ទាទោស​ដាក់​ពន្ធនាគារ​ចាប់ពី ៦ ទៅ ១២​ឆ្នាំ និង​ពិន័យ​ជា​ប្រាក់​ចាប់ពី ៥០​ម៉ឺន ទៅ ២​លាន​ប៉េ​សូ ឬ​ស្មើ​ជាង ៨ ៧៥៨ ទៅ​ដល់ ៣៥ ០០០​ដុល្លារ​អា​មេ​រិ​ក សម្រាប់​បុគ្គល​ដែល​បាន​ផ្សព្វផ្សាយ​ព័ត៌មាន​មិន​ពិត​។

សេចក្តីព្រាងច្បាប់​នេះ នឹង​ត្រូវ​បាន​ជូន​សភា​ហ្វី​លី​ពី​ន​ដើម្បី​ត្រួតពិនិត្យ ដោយ​បាន​សង្កត់ធ្ងន់​ថា ការ​រីក​រាលដាល​ព័ត៌មាន​មិន​ពិត ពិសេស​តាម​រយៈ​វេទិកា​ឌី​ជី​ថ​ល និង​បច្ចេកវិទ្យា​បញ្ញា​សិប្បនិមិត្ត AI បាន​ក្លាយជា​ការ​គំរាមកំហែង​យ៉ាងធ្ងន់ធ្ងរ​ដល់​ទំនុកចិត្ត​សាធារណ ស្ថាប័ន​ប្រជាធិបតេយ្យ និង​ស្ថិរភាព​ជាតិ​។ លោក​ទាំង​ពីរ​បាន​បន្ថែម​ថា ខណៈ​ពេល​ដែល​សេរីភាព​នៃ​ការ​បញ្ចេញមតិ​ត្រូវ​បាន​ធានា​នៅ​ក្រោម​រដ្ឋធម្មនុញ្ញ សិទ្ធិ​នេះ​មិន​មាន​លក្ខណៈ​ដាច់ខាត​ទេ ជា​ពិសេស​នៅ​ពេល​ដែល​សុន្ទរកថា​បង្ក​គ្រោះថ្នាក់​ដល់​សុវត្ថិភាព​សាធារណៈ ឬ​សន្តិសុខ​ជាតិ​។

ការ​ស្នើ​រួម​មាន ព័ត៌មាន​មិន​ពិត​ដែល​បំផ្លាញ​សន្តិសុខ​ជាតិ ឬ​ទំនាក់ទំនង​ការទូត រំខាន​ដល់​ការ​បោះ​ឆ្នោត ការ​ឆ្លើយ​តប​ពាក់ព័ន្ធ​គ្រោះ​មហន្តរាយ ឬ​ត្រូវ​បាន​ប្រព្រឹត្ត​ដោយ​មន្ត្រី​សាធារណៈ អ្នក​សារព័ត៌មាន ឬ​បុគ្គល​មាន​ឥទ្ធិពល​ដែល​មាន​អ្នក​តាមដាន​ជាង ៥​ម៉ឺន​នាក់ ដែល​កេង​ចំណេញ​លើ​វេទិកា​របស់​ពួក​គេ​ដោយ​ចេតនា​។

ដើម្បី​ធានា​បាន​នូវ​គណនេយ្យ​ភាព គណៈកម្មាធិការ​ត្រួតពិនិត្យ​រួម​នៃ​សភា​ហ្វី​លី​ពី​ន​នឹង​ត្រូវ​បាន​បង្កើត​ឡើង ដើម្បី​ត្រួតពិនិត្យ​ការ​អនុវត្ត​ច្បាប់ ពិនិត្យ​មើល​នីតិវិធី​អនុវត្ត​ចំពោះ​ការ​រំលោភ​បំពាន​ដែល​អាច​កើត​មាន និង​បញ្ជូន​របាយការណ៍​ដែល​ណែនាំ​អំពី​ការ​កែប្រែ ឬ​លុប​ចោល​ប្រសិនបើ​ចាំបាច់​៕ ដកស្រង់ ៖ Tuoi Tre និង PNA