ទីក្រុងព្យុងយ៉ាង ៖ ប្រទេសកូរ៉េខាងជើងកំពុងសម្លឹងមើលការពង្រីកវិស័យទេសចរណ៍របស់ខ្លួន តាមរយៈការអភិវឌ្ឍដែលត្រូវបានហៅថា «ទេសចរណ៍កីឡាវាយកូនហ្គោល» នៅក្នុងទីក្រុងព្យុងយ៉ាង ដោយផ្តោតសំខាន់លើភ្ញៀវអន្តរជាតិ។ យោងតាមកាសែតកូរ៉េខាងត្បូង Chosun Biz…
ទីក្រុងព្យុងយ៉ាង ៖ ប្រទេសកូរ៉េខាងជើងកំពុងសម្លឹងមើលការពង្រីកវិស័យទេសចរណ៍របស់ខ្លួន តាមរយៈការអភិវឌ្ឍដែលត្រូវបានហៅថា «ទេសចរណ៍កីឡាវាយកូនហ្គោល» នៅក្នុងទីក្រុងព្យុងយ៉ាង ដោយផ្តោតសំខាន់លើភ្ញៀវអន្តរជាតិ។
យោងតាមកាសែតកូរ៉េខាងត្បូង Chosun Biz កាលពីថ្ងៃទី២៦ ខែសីហា ឆ្នាំ២០២៥ បានឱ្យដឹងថា ស្ថិតនៅក្នុងដំណាក់កាលនៃការអភិវឌ្ឍន៍វិស័យទេសចរណ៍ កីឡាវាយកូនហ្គោលកាន់តែមានប្រជាប្រិយភាពនៅក្នុងប្រទេសកូរ៉េខាងជើង មិនត្រឹមតែអ្នកក្នុងស្រុកប៉ុណ្ណោះទេ ប៉ុន្តែថែមទាំងទាក់ទាញភ្ញៀវក្រៅស្រុកផងដែរ។ ប្រទេសកូរ៉េខាងជើងមានលក្ខខណ្ឌធម្មជាតិអំណោយផលសម្រាប់ទេសចរណ៍វាយកូនហ្គោល ជាមួយទេសភាពដ៏ស្រស់ស្អាត អាកាសធាតុអំណោយផលល្អ ដែលជាគុណសម្បត្តិសម្រាប់ទីក្រុងព្យុងយ៉ាងក្នុងការអភិវឌ្ឍន៍វិស័យមួយនេះ។
បច្ចុប្បន្នកូរ៉េខាងជើងមានទីលានវាយកូនហ្គោល ២ គឺទីលានវាយកូនហ្គោលព្យុងយ៉ាង និងទីលានសេអូសាន (Seosan) ដែលកំពុងតែត្រូវបានបង្កើតឡើង។ ទីលានវាយកូនហ្គោលព្យុងយ៉ាងមានទីតាំងជាប់បឹងថេសុង (Taesong) ចម្ងាយប្រហែល ៣០គីឡូម៉ែត្រពីទីក្រុងនេះ។ ទីលានមានចំនួន១៨ឡូមួយនេះ មានប្រវែងជិត ៦,២គីឡូម៉ែត្រ និងអាចផ្ទុកមនុស្សបានប្រហែល២០០នាក់ និងផ្តល់ជូនឧបសគ្គពិបាកៗយ៉ាងច្រើន គ្រប់ទម្រង់សម្រាប់អ្នកលេងយ៉ាងពេញចិត្ត។
គួររំលឹកថា មុនពេលដែលព្រំដែនត្រូវបានបិទដោយសារជំងឺរាតត្បាតកូវីដ១៩ ការប្រកួតកីឡាវាយកូនហ្គោលអន្តរជាតិទីក្រុងព្យុងយ៉ាង ដែលរៀបចំដោយទីភ្នាក់ងារទេសចរណ៍ Lupine របស់អង់គ្លេស ត្រូវបានធ្វើឡើងនៅទីលានវាយកូនហ្គោលព្យុងយ៉ាង នៅក្នុងរដូវស្លឹកឈើជ្រុះឆ្នាំ ២០១១ ដល់ ២០១៦។
ស្របតាមនៅពេលថ្មីៗនេះ ប្រទេសកូរ៉េខាងជើងហាក់ដូចជាបង្ហាញបំណងចង់ពង្រីកឧស្សាហកម្មទេសចរណ៍បរទេសរបស់ខ្លួន ដែលជាមធ្យោបាយតែមួយគត់ក្នុងការរកប្រាក់ចំណូលពីបរទេស និងអាចជៀសផុតពីទណ្ឌកម្មនោះ ការពង្រីក និងអភិវឌ្ឍទេសចរណ៍កីឡាវាយកូនហ្គោល ដែលជាប្រភេទកីឡាសម្រាប់បុគ្គលលំដាប់អភិជន និងបង្កើតប្រាក់ចំណូលដ៏ច្រើននោះ គឺជាគោលដៅដ៏សំខាន់មួយសម្រាប់រដ្ឋាភិបាលទីក្រុងព្យុងយ៉ាង៕
ចែករំលែកព័តមាននេះ