ទីក្រុងបាងកក៖ ថៃចាប់ផ្ដើមមានអ្នកស្លាប់ជាបណ្ដើរៗហើយដោយសារខ្យល់ព្យុះកាជិគិ (Kajiki) ដែលទើបតែវាយប្រហារវៀតណាមបណ្ដាលឱ្យស្លាប់យ៉ាងតិច៧នាក់។ ថ្ងៃនេះ អាជ្ញាធរថៃទទួលស្គាល់ថាខ្លួនរកឃើញសាកសពមនុស្ស២នាក់ដែលស្លាប់ក្រោយហេតុការណ៍បាក់ដីនៅក្នុងស្រុកមេឆាអេម (Mae Chaem)។ ភ្លៀងចាប់ផ្ដើមធ្លាក់ខ្លាំងតាំងពីព្រឹកថ្ងៃពុធនៅភាគខាងជើង។ អភិបាលរងខេត្តឆៀងម៉ៃ…
ទីក្រុងបាងកក៖ ថៃចាប់ផ្ដើមមានអ្នកស្លាប់ជាបណ្ដើរៗហើយដោយសារខ្យល់ព្យុះកាជិគិ (Kajiki) ដែលទើបតែវាយប្រហារវៀតណាមបណ្ដាលឱ្យស្លាប់យ៉ាងតិច៧នាក់។ ថ្ងៃនេះ អាជ្ញាធរថៃទទួលស្គាល់ថាខ្លួនរកឃើញសាកសពមនុស្ស២នាក់ដែលស្លាប់ក្រោយហេតុការណ៍បាក់ដីនៅក្នុងស្រុកមេឆាអេម (Mae Chaem)។ ភ្លៀងចាប់ផ្ដើមធ្លាក់ខ្លាំងតាំងពីព្រឹកថ្ងៃពុធនៅភាគខាងជើង។
អភិបាលរងខេត្តឆៀងម៉ៃ លោកឆាត់ឆាវ៉ាល់ ផាន់យ៉ា (Chatchawal Panya) ថ្លែងថាភ្លៀងធ្លាក់ខ្លាំងជាបន្តបន្ទាប់ធ្វើឱ្យមានការបាក់ដីជាច្រើនកន្លែងនៅបានផាងអ៊ុង នៃតំបន់មេស៊ូក (Mae Suek) នៅវេលាម៉ោង៣ទៀបភ្លឺ។ ផ្ទះរបស់អ្នកស្រុកយ៉ាងតិចដប់ខ្នងត្រូវបានគ្របសង្កត់ដោយដីល្បាប់ដែលធ្លាក់មកពីតំបន់ខ្ពង់រាប។ ក្នុងនោះ ផ្ទះ៧ខ្នងត្រូវបានកម្ទេចទាំងស្រុង។
គេកំពុងតាមរកកុមារីអាយុ១២ឆ្នាំម្នាក់ដែលនៅបាត់ខ្លួននៅឡើយ។ មនុស្សជាច្រើនរងរបួសដោយសារខ្យល់ព្យុះដែលបង្កជាភ្លៀងធ្លាក់ខ្លាំង គ្រោះទឹកជំនន់ និងការបាក់ដី។ អ្នករបួសជាច្រើនត្រូវតែទ្រាំដេកឈឺចុកចាប់ព្រោះមិនអាចបញ្ជូនទៅពេទ្យបានឡើយដោយសារតែភូមិរបស់ពួកគេត្រូវហ៊ុមព័ទ្ធដោយវាលទឹកដ៏ល្ហល្ហាចរកកោះត្រើយគ្មាន។ ដងវិថីជាច្រើនត្រូវដីបាក់គ្រប់សង្កត់ពីលើយ៉ាងជិតឈឹង ដូច្នេះមិនអាចធ្វើដំណើរបានឡើយ។ បណ្ដាញអគ្គិសនី និងទូរស័ព្ទក៏ត្រូវកាត់ផ្ដាច់ផងដែរ។
បុគ្គលិកមន្ទីរគ្រប់គ្រងគ្រោះមហន្តរាយខេត្តឆៀងម៉ៃប្រាប់ថាគ្រោះទឹកជំនន់កើតឡើងនៅស្រុកឆៀងដាវ (Chiang Dao), ហាងដុង (Hang Dong) និងមេអន (Mae On)។ ឆៀងម៉ៃស្ថិតនៅក្នុងចំណោមខេត្តដែលទទួលរងសម្ពាធទាបនៅពេលខ្យល់ព្យុះកាជិគិបក់កាត់ភាគខាងជើង។ ប្រធាននាយកដ្ឋានឧតុនិយមថ្លែងថានឹងមានភ្លៀងធ្លាក់ខ្លាំង និងគ្រោះទឹកជំនន់នៅខេត្តឆៀងម៉ៃ, ឆៀងរ៉ៃ, សុខោទ័យ និងខេត្តមួយចំនួនទៀត។ ខាងលើនេះជាការដកស្រង់ប្រភពពីកាសែតបាងកកប៉ុស្តិ៍ និងរ៉យទ័រ៕
ចែករំលែកព័តមាននេះ