ទីក្រុងម៉ូស្គូ៖ ស្ថានភាពសេដ្ឋកិច្ចរបស់រុស្ស៊ីហាក់បង្ហាញសញ្ញាមិនសូវល្អប៉ុន្មានទេនៅក្នុងឆ្នាំនេះ។ ហេតុដូច្នេះ រុស្ស៊ីដែលពីមុនបានព្យាករថាកំណើនសេដ្ឋកិច្ចប្រចាំឆ្នាំ ឬកំណើនជីឌីភី (GDP) របស់ខ្លួន២,៥% ឥឡូវនេះបញ្ចុះមកនៅ១,៥%វិញ។ នេះបើយោងតាមការថ្លែងរបស់រដ្ឋមន្ត្រីហិរញ្ញវត្ថុរុស្ស៊ី លោកអានតុន…
ទីក្រុងម៉ូស្គូ៖ ស្ថានភាពសេដ្ឋកិច្ចរបស់រុស្ស៊ីហាក់បង្ហាញសញ្ញាមិនសូវល្អប៉ុន្មានទេនៅក្នុងឆ្នាំនេះ។ ហេតុដូច្នេះ រុស្ស៊ីដែលពីមុនបានព្យាករថាកំណើនសេដ្ឋកិច្ចប្រចាំឆ្នាំ ឬកំណើនជីឌីភី (GDP) របស់ខ្លួន២,៥% ឥឡូវនេះបញ្ចុះមកនៅ១,៥%វិញ។ នេះបើយោងតាមការថ្លែងរបស់រដ្ឋមន្ត្រីហិរញ្ញវត្ថុរុស្ស៊ី លោកអានតុន ស៊ីឡូនណូស (Anton Siluanov) នៅវិមានក្រឹមឡាំង។
តាមពិត សេដ្ឋកិច្ចរុស្ស៊ីរីកលូតលាស់បានល្អកាលពីឆ្នាំ២០២៣ និងឆ្នាំ២០២៤ទោះបីក្រុមបស្ចិមប្រទេសដាក់ទណ្ឌកម្មយ៉ាងណាក្ដី។ ប៉ុន្តែឈានមកដល់ឆ្នាំ២០២៥ សេដ្ឋកិច្ចរុស្ស៊ីចាប់ផ្ដើមធ្លាក់ចុះខ្លាំង។ សកម្មភាពសេដ្ឋកិច្ចនៅក្នុងស្រុកចាប់ផ្ដើមជាប់គាំងនៅមួយកន្លែងដោយសារការខ្វះខាតកម្លាំងពលកម្ម គួបផ្សំនឹងធនាគារជាតិដំឡើងអត្រាការប្រាក់កម្ចីខ្ពស់ដើម្បីទប់ទល់នឹងតម្លៃសាច់ប្រាក់ចុះថោក (អតិផរណា)។
បញ្ហាអតិផរណាហក់ឡើងខ្ពស់ដោយសាររុស្ស៊ីចំណាយថវិកាយ៉ាងច្រើនសន្ធឹកសន្ធាប់ទៅលើវិស័យការពារជាតិ។ រដ្ឋមន្ត្រីរុស្ស៊ីរូបនេះជម្រាបជូនលោកពូទីនថាក្រសួងសេដ្ឋកិច្ចប្រមើលឃើញថាកំណើនសេដ្ឋកិច្ចសម្រាប់ឆ្នាំនេះកើនឡើងយ៉ាងតិច១,៥%។ លោកថ្លែងថាបើសិនឆ្នាំនេះពិបាកអនុវត្តនយោបាយហិរញ្ញវត្ថុ និងឥណទាន កំណើនសេដ្ឋកិច្ចក៏មិនក្រោម១,៥%ដែរ។
លោកថ្លែងថាការរៀបចំខ្ទង់ថវិកាជាតិប្រកបដោយសមតុល្យអាចនឹងផ្ដល់ឱកាសឱ្យធនាគារជាតិ (ឬធនាគារកណ្ដាល) បន្ធូរបន្ថយនយោបាយហិរញ្ញវត្ថុ និងឥណទាន។ មានន័យថាប្រភពឥណទានអាចមានច្រើនសម្រាប់ប្រើប្រាស់ ហើយធនធានដទៃទៀតក៏នឹងមានច្រើននៅក្នុងវិស័យសេដ្ឋកិច្ចផងដែរ។ ហេតុនេះនៅឆ្នាំក្រោយ រុស្ស៊ីនឹងស្គាល់រីកចម្រើនផ្នែកការអភិវឌ្ឍសង្គម និងសេដ្ឋកិច្ចជាក់ជាមិនខាន។ ខាងលើនេះជាការដកស្រង់ប្រភពទីទីភ្នាក់ងារព័ត៌មានរ៉យទ័រ និងប្រភពដទៃទៀត៕
ចែករំលែកព័តមាននេះ