រាជធានីភ្នំពេញ ៖ នៅព្រឹកថ្ងៃទី២៨ ខែសីហា ឆ្នាំ២០២៥នេះ មណ្ឌលប្រឡងសញ្ញាបត្រមធ្យមសិក្សាទូតិយភូមិ (បាក់ឌុប) នៅទូទាំងប្រទេសចំនួន២៤១មណ្ឌល នឹងបើកដំណើរការប្រឡង ។…
រាជធានីភ្នំពេញ ៖ នៅព្រឹកថ្ងៃទី២៨ ខែសីហា ឆ្នាំ២០២៥នេះ មណ្ឌលប្រឡងសញ្ញាបត្រមធ្យមសិក្សាទូតិយភូមិ (បាក់ឌុប) នៅទូទាំងប្រទេសចំនួន២៤១មណ្ឌល នឹងបើកដំណើរការប្រឡង ។
សម្រាប់ការប្រឡងសញ្ញាបត្រមធ្យមសិក្សាទុតិយភូមិ (បាក់ឌុប) ឆ្នាំសិក្សា២០២៤-២០២៥ នឹងប្រព្រឹត្តិទៅថ្ងៃទី២៨-២៩ សីហានេះ មានបេក្ខជនចុះឈ្មោះប្រឡងប្រមាណ១សែន៤ម៉ឺន៦ពាន់នាក់ ហើយចែកជា២៤១មណ្ឌល ។
ក្រសួងអប់រំ យុវជន និងកីឡា បានឲ្យដឹងថា ការប្រឡងសញ្ញាបត្រមធ្យមសិក្សាទុតិយភូមិ សម័យប្រឡង ៖ ២៨ សីហា ២០២៥ មានបេក្ខជនចុះឈ្មោះប្រឡងសរុប១៤៦៧២០ នាក់ ស្រី៨១៤៤២នាក់ ក្នុងនោះ ៖ បេក្ខជនថ្នាក់វិទ្យាសាស្ត្រ មានចំនួន៤០៦៧៨នាក់ ស្រី២៤៥១៩នាក់ បេក្ខជនថ្នាក់វិទ្យាសាស្ត្រសង្គមមានចំនួន១០៦០៤២នាក់ ស្រី៥៦ ៩២៣នាក់ ។
ក្រសួងបានឲ្យដឹងថា បេក្ខជនត្រូវបានរៀបចំចំនួន២៥នាក់ក្នុងមួយបន្ទប់ទៅតាមមណ្ឌលសំណេរនីមួយៗតាមរាជធានី ខេត្ត លើកលែងតែបន្ទប់ចុងក្រោយ និងបន្ទប់ដែលមានបេក្ខជនមកពីវិទ្យាល័យអប់រំពិសេស ។
មណ្ឌលសំណេរ មានចំនួនសរុប២៤១មណ្ឌល ត្រូវជា៥៩២៤ បន្ទប់ក្នុងនោះ ៖ ថ្នាក់វិទ្យាសាស្ត្រ មានចំនួន៧២មណ្ឌល ត្រូវជា១៦៥៥បន្ទប់ និងថ្នាក់វិទ្យាសាស្ត្រសង្គម មានចំនួន ១៦៩ មណ្ឌល ត្រូវជា៤២៦៩បន្ទប់ ។ មណ្ឌលកំណែសម្រាប់ការប្រឡងសញ្ញាបត្រមធ្យមសិក្សាទុតិយភូមិ មានចំនួន១០មណ្ឌល នៅរាជធានីភ្នំពេញ ។ គណៈមេប្រយោគ និងគណៈកម្មការនានា ដែលត្រូវចូលរួមក្នុងដំណើរការប្រឡងនៅគ្រប់ដំណាក់កាលមានចំនួនសរុប៣១២០៣នាក់ មកពីថ្នាក់ក្រសួងមានចំនួន៤២៥៦ នាក់ និងមកពីថ្នាក់រាជធានី ខេត្ត មានចំនួន២៦៩៤៧នាក់ ក្នុងនោះ ៖ ដំណើរការសំណេរមានចំនួន១៩ ៩៤៧ នាក់ មកពីថ្នាក់ក្រសួងចំនួន៦៧៧នាក់ និងមកពីថ្នាក់រាជធានីខេត្ត មានចំនួន១៩២៧០ នាក់។
ក្រសួងអប់រំបានឲ្យដឹងដែរថា រៀបចំការប្រឡងសញ្ញាបត្រមធ្យមសិក្សាទុតិយភូមិ សម័យប្រឡង ៖ ២៨ សីហា ២០២៥ ដោយមានកាលបរិច្ឆេទសំខាន់ៗដូចខាងក្រោម ៖ ដំណើរការសរសេរប្រព្រឹត្តទៅក្នុងរយៈពេល២ថ្ងៃ គឺថ្ងៃទី២៨-២៩ ខែសីហា ឆ្នាំ២០២៥ ។ ដំណើរការកំណែប្រព្រឹត្តទៅចាប់ពីថ្ងៃទី៣១ ខែសីហា ដល់ថ្ងៃទី៦ ខែកញ្ញា ឆ្នាំ២០២៥ ។
ដំណើរការស្រង់បូកពិន្ទុដោយកុំព្យូទ័រ និងផ្ទៀងផ្ទាត់ពិន្ទុ ចាប់ពីថ្ងៃទី៧ ដល់ថ្ងៃទី១៨ ខែកញ្ញា ឆ្នាំ២០២៥ ។ ដំណើការបោះពុម្ពលទ្ធផលប្រឡង ប្រព្រឹត្តទៅនាថ្ងៃទី១៩ ខែកញ្ញា ឆ្នាំ២០២៥ ។
ជាមួយគ្នានោះដែរក្រសួងកំណត់ យកថ្ងៃទី២០ ខែកញ្ញា ឆ្នាំ២០២៥ សម្រាប់ប្រកាសលទ្ធផលប្រឡងតាមមណ្ឌលសំណេរនៃរាជធានី ខេត្តទាំង ២៥នៅទូទាំងប្រទេស ៕
ចែករំលែកព័តមាននេះ