គូឡាឡាំពួ ៖ តាមហ្វេសប៊ុកផេកផ្លូវការលោក អាន់វ៉ា អ៊ីប្រាហ៊ីម នាយករដ្ឋមន្ត្រីម៉ាឡេស៊ី និងជាប្រធានប្ដូរវេនអាស៊ាន នៅរសៀលថ្ងៃទី២៥ ខែកញ្ញានេះ បានអោយដឹងថា…
គូឡាឡាំពួ ៖ តាមហ្វេសប៊ុកផេកផ្លូវការលោក អាន់វ៉ា អ៊ីប្រាហ៊ីម នាយករដ្ឋមន្ត្រីម៉ាឡេស៊ី និងជាប្រធានប្ដូរវេនអាស៊ាន នៅរសៀលថ្ងៃទី២៥ ខែកញ្ញានេះ បានអោយដឹងថា លោកបានពិភាក្សាគ្នាតាមទូរសព្ទជាមួយប្រធានាធិបតីសហរដ្ឋអាម៉េរិក លោក ដូណាល់ ត្រាំ ដោយបានបញ្ជាក់អំពីការប្តេជ្ញាចិត្ត ក្នុងនាមជាប្រធានប្ដូរវេនអាស៊ាន ដើម្បីបន្ដដើរតួនាទីយ៉ាងសំខាន់ក្នុងការធានានូវសន្ដិភាពក្នុងតំបន់ ជាពិសេសពាក់ព័ន្ធនឹងបញ្ហាជម្លោះព្រំដែនកម្ពុជា-ថៃ ។
លោក ដូណាល់ ត្រាំ បានទទួលស្គាល់នូវភាពជោគជ័យរបស់ម៉ាឡេស៊ី ក្នុងការសម្របសម្រួលកិច្ចព្រមព្រៀងបទឈប់បាញ់កម្ពុជា និងថៃ ថា ជាសមិទ្ធិផលដ៏អស្ចារ្យ ដែលបង្ហាញពីអធិបតេយ្យភាពរបស់ម៉ាឡេស៊ី និងភាពរឹងមាំរបស់អាស៊ាន ។
ជាមួយគ្នានេះ លោក អាន់វ៉ា ក៏បានកោតសរសើរចំពោះសហរដ្ឋអាម៉េរិក ដែលបាននិងកំពុងដើរតួនាទីដ៏សំខាន់ក្នុងការធានាថា បទឈប់បាញ់ត្រូវបានសម្រេចដោយជោគជ័យ ។
ប្រទេសម៉ាឡេស៊ី ក៏ទន្ទឹងរង់ចាំវត្តមានរបស់លោកប្រធានាធិបតី ដូណាល់ ត្រាំ ចូលរួមនៅក្នុងកិច្ចប្រជុំកំពូលអាស៊ាន នៅខែតុលាខាងមុខនេះផងដែរ ដែលវានឹងក្លាយជាវេទិកាដ៏សំខាន់មួយ ក្នុងការពង្រឹងកិច្ចសហប្រតិបត្តិការសម្រាប់សន្ដិភាព ស្ថិរភាព និងវិបុលភាពក្នុងតំបន់ ៕
ចែករំលែកព័តមាននេះ