ខេត្តស្ទឹងត្រែង ៖ អាជ្ញាប័ណ្ណអគ្គិសនីសេវាករ ហ៊ុយ ចេង ប្រតិបត្តិនៅស្រុកសៀមប៉ាងនឹងត្រូវដកសិទ្ធិ ហើយជំនួសមកវិញដោយអាជ្ញាប័ណ្ណសេវាកម្មអគ្គិសនីខេត្តស្ទឹងត្រែងនាពេលខាងមុខ ក្រោយប្រជាពលរដ្ឋរាប់រយគ្រួសាររអ៊ូរទាំក្តៅក្រហាយ អំពីឥរិយាបថម្ចាស់សេវាករអាជីវកម្ម ការឡើងចុះគីឡូភ្លើងដោយមិនប្រក្រតី…
ខេត្តស្ទឹងត្រែង ៖ អាជ្ញាប័ណ្ណអគ្គិសនីសេវាករ ហ៊ុយ ចេង ប្រតិបត្តិនៅស្រុកសៀមប៉ាងនឹងត្រូវដកសិទ្ធិ ហើយជំនួសមកវិញដោយអាជ្ញាប័ណ្ណសេវាកម្មអគ្គិសនីខេត្តស្ទឹងត្រែងនាពេលខាងមុខ ក្រោយប្រជាពលរដ្ឋរាប់រយគ្រួសាររអ៊ូរទាំក្តៅក្រហាយ អំពីឥរិយាបថម្ចាស់សេវាករអាជីវកម្ម ការឡើងចុះគីឡូភ្លើងដោយមិនប្រក្រតី ការបម្រើសេវាប្រើប្រាស់មានការយឺតយ៉ាវ ជាដើម ដែលបញ្ហានេះក្លាយជាជំងឺរ៉ាំរ៉ៃចូល១៥ឆ្នាំមកហើយ ។
ប្រជាពលរដ្ឋតាមការប៉ាន់ស្មានប្រហែល៤៨២គ្រួសារ នៅស្រុកសៀមប៉ាង ធ្វើបដិការអរគុណយ៉ាងជ្រាលជ្រៅចំពោះលោកអភិបាលខេត្ត ក្រោយលោកបានសម្រេចធ្វើសំណើទៅឯកឧត្តមរដ្ឋមន្ត្រីក្រសួងរ៉ែ និងថាមពល បញ្ចប់អាជ្ញាប័ណ្ណអាជីវកម្ម សេវាកម្មអគ្គិសនីរបស់លោកស្រីហ៊ុយ ចេង ទាំងស្រុង និងផ្ដល់អាជ្ញាប័ណ្ណសេវាកម្មអគ្គិសនីជូនអគ្គិសនីខេត្តស្ទឹងត្រែង ដើម្បីផ្ដល់សេវាផ្គត់ផ្គង់អគ្គិសនីជូនប្រជាពលរដ្ឋទូទាំងស្រុកសៀមប៉ាង ។
ការសម្រេចចិត្តនេះ ធ្វើឡើងបន្ទាប់ពីប្រជាពលរដ្ឋរាប់រយគ្រួសារនៅស្រុកសៀមប៉ាងស្នើសុំកិច្ចអន្តរាគមន៍ពីអាជ្ញាធរមូលដ្ឋានច្រើនលើកច្រើនសារដដែលជាដដែល តែការស្នើសុំកិច្ចអន្តរាគមន៍អាជ្ញាធរមូលដ្ឋាននោះ ពុំមានប្រសិទ្ធភាពលើម្ចាស់អាជ្ញាប័ណ្ណអាជីវកម្មសេវាករអគ្គិសនីសៀមប៉ាង លោកស្រី ហ៊ុយ ចេង ។
ដោយសារអស់លទ្ធភាពនៅក្នុងកិច្ចសុំអន្តរាគមន៍ពីអាជ្ញាធរមូលដ្ឋានមិនអាចដោះស្រាយជូនពួកគាត់បាន ពួកគាត់បានប្រមូលគ្នីគ្នាដើម្បីបន្តសុំកិច្ចអន្តរាគមន៍ដល់អភិបាលខេត្ត។
ក្រោយមើលឃើញពីផលលំបាករបស់ប្រជាពលរដ្ឋ ដែលទទូចទាមទារហើយទាមទារទៀតនោះ នាថ្ងៃទី២៥ សីហាឆ្នាំ២០២៥ រដ្ឋបាលខេត្តបានចេញលិខិតលេខ៧០២ គោរពជូនឯកឧត្តមរដ្ឋមន្ត្រីក្រសួងរ៉ែនិងថាមពល បញ្ចប់អាជ្ញាប័ណ្ណអគ្គិសនីរបស់លោកស្រីហ៊ុយ ចេង ដែលបានធ្វើអាជីវកម្មអគ្គិសនីនៅផ្នែកខ្លះនៃឃុំសេកុង និងឃុំថ្មកែវ ក្នុងស្រុកសៀមប៉ាង។
គួររំលឹកថា រឿងករណីតវ៉ាអំពីអគ្គិសនីនេះកន្លងមក ប្រជាពលរដ្ឋតែងលើកឡើងនិងសំណូមពរជាច្រើនលើកច្រើនសារមករដ្ឋបាលខេត្ត និងទទូចស្នើសុំបញ្ចប់អាជ្ញាប័ណ្ណអគ្គិសនីរបស់លោកស្រីហ៊ុយ ចេង តាមរយៈវេទិកាសាធារណៈនានាដូចជាវេទិកាពិគ្រោះយោបល់របស់ក្រុមប្រឹក្សាខេត្តវេទិកាពិគ្រោះយោបល់របស់ក្រុមប្រឹក្សាស្រុក និងកិច្ចប្រជុំផ្សេងៗទៀតនៅក្នុងខេត្តផងដែរ។
សូមបញ្ជាក់ថា ការស្នើសុំឲ្យបញ្ជាប់អាជ្ញាប័ណ្ណសេវាករនេះ ដោយមានករណីផ្ទុះការតវ៉ាពីប្រជាពលរដ្ឋអំពីការផ្ដល់សេវាកម្មភ្លើងរបស់លោកស្រីហ៊ុយ ចេង ទាំងការតភ្ជាប់ចរន្តថ្មី និងការតភ្ជាប់ចរន្តឡើងវិញជូនអ្នកប្រើប្រាស់យឺតយ៉ាវ ខ្វះទំនួលខុសត្រូវ ប្រើប្រាស់ពាក្យសម្ដីនិងឥរិយាបទមិនសមរម្យទៅលើអតិថិជន ការឡើងចុះនៃបរិមាណគីឡូភ្លើងប្រើប្រាស់ខុសប្រក្រតី ជាពិសេស បរិមាណគីឡូភ្លើងធ្លាក់ចុះស្ទើរគុណនឹងពីររាល់ពេលក្រោយមានករណីតវ៉ា និងអន្តរាគមន៍ដោះស្រាយម្តងៗ ដែលជាហេតុធ្វើឲ្យប្រជាពលរដ្ឋមិនស្ងប់អារម្មណ៍ ៕
ចែករំលែកព័តមាននេះ