ពន្ធ៥០% ដែលស្ថិតក្នុងអត្រាខ្ពស់បំផុតរបស់អាមេរិកដាក់លើឥណ្ឌា ចូលជាធរមាន
សហរដ្ឋអាមេរិក ៖ ការដំឡើងពន្ធគយទ្វេរដងរបស់ប្រធានាធិបតីសហរដ្ឋអាមេរិក លោក ដូណាល់ ត្រាំ (Donald Trump) លើទំនិញពីប្រទេសឥណ្ឌាដល់ទៅ ៥០%…
សហរដ្ឋអាមេរិក ៖ ការដំឡើងពន្ធគយទ្វេរដងរបស់ប្រធានាធិបតីសហរដ្ឋអាមេរិក លោក ដូណាល់ ត្រាំ (Donald Trump) លើទំនិញពីប្រទេសឥណ្ឌាដល់ទៅ ៥០% បានចូលជាធរមានតាមការគ្រោងទុក ចាប់ពីថ្ងៃទី២៧ ខែសីហា ឆ្នាំ២០២៥ តទៅ ដោយបង្កើនភាពតានតឹងរវាងប្រទេសប្រជាធិបតេយ្យធំទាំងពីររបស់ពិភពលោក និងជាដៃគូយុទ្ធសាស្ត្រដ៏សំខាន់ផងដែរ។
ការដំឡើងពន្ធ ២៥% បន្ថែមពីលើ ២៥% ដែលមានស្រាប់ កើតឡើងដោយសារតែការទិញប្រេងរបស់ឥណ្ឌាពីប្រទេសរុស្ស៊ី។ ដូច្នេះពន្ធសរុបកើនដល់ ៥០% សម្រាប់ទំនិញដូចជា សម្លៀកបំពាក់ ត្បូង គ្រឿងអលង្ការ ស្បែកជើង ទំនិញកីឡា គ្រឿងសង្ហារឹម និងសារធាតុគីមី ខណៈ ៥០% នេះ គឺជាអត្រាពន្ធខ្ពស់បំផុតរបស់សហរដ្ឋអាមេរិកដែលបានដាក់លើឥណ្ឌា ដោយស្មើជាមួយប្រេស៊ីល។
លោក ត្រាំ បានប្រកាសកាលពីមុនថា ការដំឡើងពន្ធចុងក្រោយបំផុតលើឥណ្ឌា ដើម្បីស្វែងរកការដាក់ទណ្ឌកម្មលើប្រទេសសេដ្ឋកិច្ចធំលំដាប់ទី ៥ របស់ពិភពលោកមួយនេះ សម្រាប់ការនាំចូលប្រេងពីប្រទេសរុស្ស៊ី ដូចផ្តល់ហិរញ្ញប្បទានសម្រាប់ម៉ាស៊ីនសង្គ្រាមនៅប្រទេសអ៊ុយក្រែន។
កាលពីពេលថ្មីៗនេះ លោក ត្រាំ បានជួបពិភាក្សាដាច់ដោយឡែកពីគ្នាជាមួយនឹងប្រធានាធិបតីរុស្ស៊ី លោក វ្លាដឺមៀរ ពូទីន (Vladimir Putin) និងប្រធានាធិបតីអ៊ុយក្រែន លោក វ៉ូឡូឌីមៀរ ហ្សេឡេនស្គី (Volodymyr Zelenskyy) ដើម្បីធ្វើជាអាជ្ញាកណ្តាលសម្រាប់កិច្ចព្រមព្រៀងបញ្ចប់សង្គ្រាមដ៏យូរអង្វែងរបស់ភាគីទាំងពីរ។ ប៉ុន្តែទោះជាយ៉ាងណាក៏ដោយ ការចរចានៅតែជាប់គាំង។
ប្រធានាធិបតីអាមេរិកបានបង្កើនពន្ធគយអាមេរិកលើទំនិញពីប្រទេសជាច្រើនលើពិភពលោក ចាប់តាំងពីខែមករាដើមឆ្នាំនេះ ដោយធ្វើឱ្យទំនាក់ទំនងកាន់តែតានតឹងជាមួយប្រទេសសម្ព័ន្ធមិត្ត និងដៃគូប្រជែង ក៏ដូចជាជំរុញឱ្យមានការភ័យខ្លាចចំពោះអតិផរណាកើនឡើងផងដែរ។ ឆ្លើយតបនឹងចំណាត់ការចុងក្រោយនេះ រដ្ឋាភិបាលឥណ្ឌាបានចោទប្រកាន់រដ្ឋបាលលោក ត្រាំ ថា ដាក់ទណ្ឌកម្មពន្ធដោយអយុត្តិធម៌លើខ្លួន ដោយចង្អុលបង្ហាញថា ប្រទេសផ្សេងទៀតដែលនាំចូលប្រេងពីរុស្ស៊ីមិនប្រឈមនឹងការយកពន្ធខ្ពស់បែបនេះទេ។
ជាឧទាហរណ៍ ប្រទេសចិន គឺជាអ្នកទិញប្រេងច្រើនជាងគេបំផុតពីរុស្ស៊ី ប៉ុន្តែទំនិញចិនប្រឈមនឹងពន្ធអប្បបរមាត្រឹម ៣០% ប៉ុណ្ណោះ។ ប៉ុន្តែលោក ត្រាំ បានព្រមានរួចហើយថា ប្រទេសផ្សេងទៀតដែលទិញប្រេងរុស្ស៊ីអាចប្រឈមមុខនឹងពន្ធខ្ពស់ក្នុងពេលឆាប់ៗនេះ។ ទន្ទឹមជាមួយគ្នានោះ ក្រុមមន្ត្រីឥណ្ឌាក៏បានព្រមានថា ឥណ្ឌាទំនងជានឹងធ្វើការកាន់តែជិតស្និទ្ធជាមួយរុស្ស៊ី និងចិន ហើយឃ្លាតឆ្ងាយពីអាមេរិក ដោយសារតែចំណាត់ការពន្ធគយដ៏ខ្ពស់នេះ។
យោងតាមអ្នកតំណាងពាណិជ្ជកម្មអាមេរិកបានឱ្យដឹងថា ការនាំចេញទំនិញរបស់ឥណ្ឌាភាគច្រើនទៅកាន់សហរដ្ឋអាមេរិកកាលពីឆ្នាំមុន មានតម្លៃសរុបចំនួន ៨៧,៣ពាន់លានដុល្លារ ហើយឥឡូវនេះ បណ្តាក្រុមហ៊ុននាំចេញឥណ្ឌាប្រឈមមុខនឹងការបង់ពន្ធដ៏ខ្ពស់ បើទោះជាផលិតផលសំខាន់ៗមួយចំនួនរួមទាំង ស្មាតហ្វូន ត្រូវបានលើកលែងសម្រាប់ពេលនេះក៏ដោយ។ តាមរយៈស្ថានភាពនេះ បណ្តាអ្នកសេដ្ឋកិច្ចមួយចំនួនបានព្យាករណ៍ពីការធ្លាក់ចុះយ៉ាងគំហុកនៃពាណិជ្ជកម្មរវាងប្រទេសទាំងពីរ៕ ប្រភព ៖ Reuters, CNN, BBC និង The Guardian
ចែករំលែកព័តមាននេះ