ខេត្តស្ទឹងត្រែង ៖ គិតត្រឹមរសៀលថ្ងៃទី២៦ ខែសីហា ឆ្នាំ២០២៥ កម្លាំងចម្រុះរបស់ក្រុមការងារខណ្ឌរដ្ឋបាលព្រៃឈើ បានបញ្ចប់នីតិវិធី នៃការរឹបអូសវត្ថុតាងបទល្មើសព្រៃឈើ មួយកន្លែងសន្និធិដោយគ្មានលិខិតអនុញ្ញាតពីរដ្ឋបាលព្រៃឈើ នៅក្នុងភូមិសាស្ត្រភូមិឬទ្ធីសែនជ័យ១…
ខេត្តស្ទឹងត្រែង ៖ គិតត្រឹមរសៀលថ្ងៃទី២៦ ខែសីហា ឆ្នាំ២០២៥ កម្លាំងចម្រុះរបស់ក្រុមការងារខណ្ឌរដ្ឋបាលព្រៃឈើ បានបញ្ចប់នីតិវិធី នៃការរឹបអូសវត្ថុតាងបទល្មើសព្រៃឈើ មួយកន្លែងសន្និធិដោយគ្មានលិខិតអនុញ្ញាតពីរដ្ឋបាលព្រៃឈើ នៅក្នុងភូមិសាស្ត្រភូមិឬទ្ធីសែនជ័យ១ ឃុំអូរស្វាយ ស្រុកបូរីអូរស្វាយសែនជ័យ ខេត្តស្ទឹងត្រែង ប្រព្រឹត្តឡើងដោយជនមិនទាន់ស្គាល់អត្តសញ្ញាណ នៅឡើយ ។
នាយផ្នែករដ្ឋបាលព្រៃឈើ លោក ហ៊ុន សំអឿន បានបញ្ជាក់នារសៀលថ្ងៃទី២៦ ខែសីហានេះថា ៖ កាលពីថ្ងៃចន្ទ ទី២៥ ខែសីហា ឆ្នាំ២០២៥ ដោយមានការសម្របសម្រួលតាមទូរសព្វពីលោក ស៊ិន សុហឹង ព្រះរាជអាជ្ញារង នៃអយ្យការអមសាលាដំបូងខេត្តក្រុមការងារខណ្ឌរដ្ឋបាលព្រៃឈើស្ទឹងត្រែង រួមសហការជាមួយមន្ត្រីរដ្ឋបាលស្រុកបូរីអូរស្វាយសែនជ័យ កម្លាំងអធិការនគរបាលស្រុក កម្លាំងយោធាសឹករងស្រុក រដ្ឋបាលឃុំ ប៉ុស្តិ៍រដ្ឋបាលឃុំ និងកម្លាំងវរៈការពារព្រំដែន ៧០១ សរុប១៨រូប បានប្រតិបត្តិការរួមក្នុងការចុះបង្ក្រាបបទល្មើសព្រៃឈើ ក្នុងដែនសមត្ថកិច្ចអាជ្ញាធរមូលដ្ឋានស្រុកបុរីអូរស្វាយសែនជ័យ។ ដែលជាលទ្ធផល នៃការបង្ក្រាបនេះ ក្រុមការងារខាងលើបានប្រទះឃើញឈើអាបីជ្រុង ជាជន្លង់ម្រេច ចំនួន០២គំនរ ។ សរុប១.១៧៦ដើម (ប្រវែងចន្លោះចាប់ពី ៤ម៉ែត្រទៅ៤,៥០ម៉ែត្រ) ។
យោងតាមប្រភពព័ត៌មានឲ្យដឹងថា ឈើជន្លង់ម្រេច បច្ចុប្បន្នហាក់មានទីផ្សារ។ កន្លងមក គឺមានការដឹកជញ្ជូនតាមរថយន្តដោយមាន PC ចេញពីខេត្តពោធិ៍សាត់ ទៅស្តុបនៅឯស្រុកស្នួល និងមួយចំនួនវិញទៀត ដែលគេមិនដឹងប្រភពច្បាស់លាស់ក៏បន្តនាំទៅប្រទេសវៀតណាម តាមច្រកត្រពាំងស្រែផងដែរ។ ចំណែកឯ ខេត្តស្ទឹងត្រែង ក៏ទើបនឹងចាប់ផ្ដើមលេចចេញនៅសកម្មភាពកាប់បំផ្លាញព្រៃឈើពុះច្រៀកជាជន្លង់ម្រេចនេះដែរ ។ បើគ្មានតម្រូវការ គ្មានទីផ្សារ ក៏គ្មានការកាត់បំផ្លាញព្រៃឈើនោះដែរ។ ដោយពិនិត្យឃើញថា ការសន្និធិខាងលើនេះគ្មានលិខិតអនុញ្គាតបែបនេះ ក្រុមការងារសម្រេចរកមធ្យោបាយដឹកជញ្ជូនមករក្សាទុកបណ្តោះអាសន្ននៅស្នាក់ការសង្កាត់រដ្ឋបាលព្រៃឈើដុងក្រឡ ដើម្បីស្រាវជ្រាវរកម្ចាស់ ហើយបន្តនីតិវិធី៕
ចែករំលែកព័តមាននេះ