រាជធានីភ្នំពេញ ៖ ឯកឧត្តម ជុំ សុន្ទរី រដ្ឋលេខាធិការ និងជាអ្នកនាំពាក្យក្រសួងការបរទេស និងសហប្រតិបត្តិការអន្តរជាតិ បានថ្លែងថា សកម្មភាពរំលោភរបស់កងកម្លាំងរបស់ថៃ…
រាជធានីភ្នំពេញ ៖ ឯកឧត្តម ជុំ សុន្ទរី រដ្ឋលេខាធិការ និងជាអ្នកនាំពាក្យក្រសួងការបរទេស និងសហប្រតិបត្តិការអន្តរជាតិ បានថ្លែងថា សកម្មភាពរំលោភរបស់កងកម្លាំងរបស់ថៃ លើអធិបតេយ្យភាពរបស់កម្ពុជា ឆ្លុះបញ្ចាំងឱ្យឃើញពីការប៉ុនប៉ងដោយចេតនារបស់ថៃ ក្នុងការពង្រីកជម្លោះចូលទៅក្នុងតំបន់ប្រជាជនស៊ីវិល ។
ការថ្លែងឱ្យដឹងយ៉ាងដូច្នេះពីអ្នកនាំពាក្យក្រសួងការបរទេសធ្វើឡើងក្នុងការធ្វើសេចក្តីសង្ខេបព័ត៌មានប្រចាំថ្ងៃ ស្តីពីលទ្ធផលនៃការអនុវត្តបទឈប់បាញ់រវាងកម្ពុជា-ថៃ នារសៀលថ្ងៃទី២៦ ខែសីហា ឆ្នាំ២០២៥ នៅទីស្តីការគណៈរដ្ឋមន្ត្រី ។
អ្នកនាំពាក្យក្រសួងការបរទេស បានលើកឡើងថា ការរំលោភនេះ ក៏អាចធ្វើឱ្យមានគ្រោះថ្នាក់បន្ថែមទៀត ទៅដល់បទឈប់បាញ់កំពុងតែមានភាពផុយស្រួយ ហើយវាក៏ជាការផ្ទុយស្រឡះទៅនឹងកិច្ចព្រមព្រៀងឈប់បាញ់ ដែលសម្រេចបាននៅថ្ងៃទី២៨ ខែកក្កដា ឆ្នាំ២០២៥ នៅពុត្រាចាយ៉ា ប្រទេសម៉ាឡេស៊ី ។
លើសពីនេះទៅទៀត វាក៏ផ្ទុយស្រឡះពីស្មារតី នៃកំណត់ហេតុកិច្ចប្រជុំវិសាមញ្ញរបស់គណៈកម្មកាធិការកិច្ចការព្រំដែនទូទៅ នៅថ្ងៃទី៧ ខែសីហា ឆ្នាំ២០២៥ នៅទីក្រុងគួឡាឡាំពួ ដែលត្រូវបានគូសបញ្ជាក់បន្ថែមទៀត ដោយកិច្ចប្រជុំវិសាមញ្ញរបស់គណៈកម្មាធិការព្រំដែនតំបន់រវាងយោធភូមិភាគទី៥របស់កម្ពុជា និងបញ្ជាការការពារព្រំដែនចន្ទបុរី និងត្រាតរបស់ថៃ ។
សូមរម្លឹកជូនថា ក្រសួងការបរទេស និងសហប្រតិបត្តិការអន្តរជាតិ បានបញ្ជូនលិខិតតវ៉ា ទៅកាន់ភាគីថៃ នៅថ្ងៃទី២៥ ខែសីហា ឆ្នាំ២០២៥។ ការតវ៉ាដ៏ខ្លាំងរបស់រាជរដ្ឋាភិបាលកម្ពុជា ចំពោះការំលោភជាបន្តបន្ទាប់ ដោយកងកម្លាំងរបស់ថៃចូលមកក្នុងទឹកដីរបស់កម្ពុជា ។
នេះគឺជាការតវ៉ាលើកទី៣ បន្ទាប់ពីមានការតវ៉ាចំនួន២លើកមុននេះ នៅថ្ងៃទី១៤ និងថ្ងៃទី១៩ ខែសីហា ឆ្នាំ២០២៥ ។ ការតវ៉ាលើកនេះ បានគូសបញ្ជាក់ថា ទី១.នៅថ្ងៃទី២៥ ខែសីហា ឆ្នាំ២០២៥ វេលាម៉ោង១៤: ២០នាទីយោធាថៃ បានបន្តដាក់ខ្សែលួសបន្លា នៅភូមិជោគជ័យ ឃុំអូរបីជាន់ ស្រុកអូរជ្រៅខេត្តបន្ទាយមានជ័យ។ សកម្មភាពនេះ គឺជារំលោភថ្មីមួយទៀតរបស់យោធាថៃ ចូលមកក្នុងទឹកដីរបស់កម្ពុជា ហួសពីទីតាំងរបស់ពួកគេ ៕
ចែករំលែកព័តមាននេះ