រាជធានីភ្នំពេញ ៖ ជាមួយអំពើគឃ្លើន និងការរំលោភបំពានយ៉ាងកំរោល ពីសំណាក់កងទ័ពថៃបានឈ្លានពាន នៅខេត្តបន្ទាយមានជ័យ ដោយរាយលួសបន្លាព័ទ្ធយកដី ផ្ទះ ពលរដ្ឋនោះ ត្រូវបានអ្នកនាំពាក្យក្រសួងការពារជាតិចាត់ទុកថា…
រាជធានីភ្នំពេញ ៖ ជាមួយអំពើគឃ្លើន និងការរំលោភបំពានយ៉ាងកំរោល ពីសំណាក់កងទ័ពថៃបានឈ្លានពាន នៅខេត្តបន្ទាយមានជ័យ ដោយរាយលួសបន្លាព័ទ្ធយកដី ផ្ទះ ពលរដ្ឋនោះ ត្រូវបានអ្នកនាំពាក្យក្រសួងការពារជាតិចាត់ទុកថា កើតចេញពីការការពារទ្រព្យសម្បត្តិស្របច្បាប់របស់ពួកគាត់ និងផ្តើមចេញពីការស្រឡាញ់ទឹកដី ធ្វើឲ្យពលរដ្ឋនាំគ្នាដេញកងទ័ពថៃ និងដកលួសបន្លាដែលបំម្រុងដាក់រាយ។
ថ្លែងនៅក្នុងសេចក្តីសង្ខេបព័ត៌មានប្រចាំថ្ងៃ ស្តីពី «លទ្ធផលនៃការអនុវត្តបទឈប់បាញ់រវាងកម្ពុជា-ថៃ»នៅថ្ងៃទី២៦ ខែសីហា ឆ្នាំ២០២៥ លោជំទាវ ឧត្តមសេនីយ៍ឯក ម៉ាលី សុជាតា អ្នកនាំពាក្យក្រសួងការពារជាតិកម្ពុជាឱ្យដឹងថាកាលពីថ្ងៃទី២៥ ខែសីហា ឆ្នាំ២០២៥ ចាប់ពីម៉ោង ១៤:២០ នាទី រសៀលនេះ កងកម្លាំងយោធារបស់ថៃបានព្យាយាមរាយបន្លាលួសនៅភូមិជោគជ័យ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ ដែលទល់មុខភូមិសាស្ត្រភូមិ Nong Chan ស្រុក Khok Sung ខេត្តស្រះកែវ ប្រទេសថៃ ប៉ុន្តែក៏ត្រូវបានប្រជាពលរដ្ឋ និងសមត្ថកិច្ចនៅភូមិជោគជ័យធ្វើការទប់ស្កាត់យ៉ាងខ្លាំងទើបកងកម្លាំងរបស់ថៃយកបន្លាលួសនោះត្រឡប់ទៅវិញ។
បន្ទាប់មកវេលាម៉ោង១៥ និង១៤រសៀលថ្ងៃដដែលនេះកងកម្លាំងថៃ បានធ្វើសកម្មភាពជាថ្មីបំរុងនឹងយកបន្លាសលួសមករាយម្តងទៀត ហើយក៏ត្រូវបានប្រជាពលរដ្ឋដែលជាម្ចាស់ដី និងប្រជាពលរដ្ឋផ្សេងៗទៀតធ្វើការទប់ស្កាត់យ៉ាងខ្លាំងក្លា រហូតដល់កងកម្លាំងរបស់ថៃយកបន្លាលួសរបស់ខ្លួនត្រឡប់ចូលទៅវិញ។
អ្នកនាំពាក្យក្រសួងការពារជាតិថ្លែងដែរថាចាប់តាំងតែពីយប់ថ្ងៃទី២៥ ខែសីហា ឆ្នាំ ២០២៥រហូតដល់ព្រឹកថ្ងៃទី ២៦ ខែសីហា ឆ្នាំ ២០២៥បងប្អូនប្រជាពលរដ្ឋដែលជាម្ចាស់ដី និងប្រជាពលរដ្ឋផ្សេងៗទៀតបានរួមសាមគ្គីគ្នា ធ្វើការឆ្លើយតបគឺផ្តើមចេញពីការព្រួយបារម្ភចំពោះមុខ នឹងការរាយបន្លាលួស របស់កងទ័ពថៃ ហើយក៏ក្នុងគោលដៅការពារនូវអ្វីដែលពួកគាត់ចាត់ទុកថាជាទ្រព្យសម្បត្តិស្របច្បាប់របស់ពួកគាត់តែប៉ុណ្ណោះ ដែលកើតចេញពីការស្រឡាញ់ទឹកដី និងការពារទ្រព្យសម្បត្តិផ្ទាល់ខ្លួនស្របច្បាប់របស់ពួកគាត់។
លោជំទាវ អ្នកនាំពាក្យ បានថ្លែងដែរថា៖នៅក្នុងការកើតហេតុការណ៍នេះកងកម្លាំង និងអាជ្ញាធរមានសមត្ថកិច្ចចម្រុះរបស់កម្ពុជាយើង ដែលមិនប្រដាប់ដោយអាវុធ ហើយដែលយើងឈរជើងប្រចាំតំបន់នោះក៏មានវត្តមាននៅកន្លែងនោះផងដែរដើម្បីការពារ សុវត្តិភាពជូនដល់បងប្អូនប្រជាពលរដ្ឋ ដែលបានបំពេញប្រកបដោយវិជ្ជាជីវៈ ការទទួលខុសត្រូវ ខ្ពស់។ម្យ៉ាងវិញទៀតកងកម្លាំងរបស់យើង បានអនុវត្តយ៉ាងម៉ឺងម៉ាត់នូវ លក្ខខណ្ឌបទឈប់បាញ់ដូចដែលបានឯកភាពគ្នានៅក្នុងកិច្ចប្រជុំកន្លងមករវាងកម្ពុជា និងថៃ។
ជាមួយគ្នានេះអ្នកនាំពាក្យក្រសួងការ ពារជាតិបានថ្លែងដោយបញ្ជាក់ថាកម្ពុជាស្នើឱ្យភាគីថៃគោរពឱ្យបានពេញលេញ និងខ្ជាប់ខ្ជួននូវបទឈប់បាញ់ និងជាពិសេសស្មារតីនៃកិច្ចព្រមព្រៀង នៃកិច្ចប្រជុំវិសាមញ្ញរបស់គណៈកម្មាធិការព្រំដែនថ្នាក់យោធភូមិភាគ (RBC) រវាងយោធភូមិភាគទី៥របស់កម្ពុជា និងកងទ័ពភូមិភាគទី១របស់ថៃ ដែលបានប្រព្រឹត្តិឡើងកាលពីថ្ងៃទី២២ ខែសីហា ឆ្នាំ២០២៥ កន្លងទៅថ្មីៗនេះ ពាក់ព័ន្ធនឹងការមិនពង្រីកភូមិសាស្ត្រ នៃជម្លោះ និងជៀសវាងទង្វើដែលនាំទៅដល់ការកើនឡើងនៃភាពតានតឹង។ កម្ពុជាបញ្ជាក់ថា រាល់ទំនាស់ពាក់ព័ន្ធនឹងបញ្ហាព្រំដែនត្រូវយកទៅដោះស្រាយដោយគណៈកម្មាធិការចម្រុះខណ្ឌសីមាព្រំដែនគោក (JBC) នៃប្រទេសទាំងពីរ ស្របតាមស្មារតីនៃអនុស្សរណៈនៃការយោគយល់ឆ្នាំ២០០០ (MOU 2000)៕
ចែករំលែកព័តមាននេះ