ទីក្រុងវ៉ាស៊ីនតោន៖ លោកត្រាំគំរាមឈប់រកស៊ីជាមួយកូរ៉េខាងត្បូងព្រោះប្រទេសនេះទើបតែកើតមានការបោសសម្អាត ឬបដិវត្ត។ លោកថ្លែងដូច្នេះមុនពេលជួបប្រធានាធិបតីកូរ៉េខាងត្បូងនៅសេតវិមាន។ គេមិនទាន់ដឹងច្បាស់ថាតើលោកត្រាំនិយាយយ៉ាងដូច្នេះចង់មានន័យថាម៉េច។ ប៉ុន្តែគេដឹងថាកូរ៉េខាងត្បូងទើបតែរួចផុតពីវិបត្តិនយោបាយកាលពីប៉ុន្មានខែមុននេះបន្ទាប់ពីប្រធានាធិបតីមុន លោកយូនស៊ុកយូល ប្រកាសច្បាប់អាជ្ញាសឹកកាលពីខែធ្នូ ឆ្នាំ២០២៤។
លោកត្រាំបង្ហោះសារនៅលើបណ្ដាញសង្គមថាតើមានអ្វីកើតឡើងនៅកូរ៉េខាងត្បូង? ហាក់ដូចជាការបោសសម្អាតផ្ទៃក្នុង ឬជាបដិវត្ត។ លោកត្រៀមទទួលស្វាគមន៍ប្រធានាធិបតីថ្មីនៅយប់នេះ។ លោកអរគុណប្រធានាធិបតីកូរ៉េខាងត្បូងដែលបានយកចិត្តទុកដាក់ខ្ពស់ចំពោះបញ្ហានេះ។ លោកយូនស៊ុកយូលមានទស្សនៈនយោបាយស្របនឹងលោកត្រាំ។ ចំណែកលោកលីជេម្យុងរិះគន់ដោយឥតសំចៃមាត់ចំពោះនយោបាយអភិរក្សនិយមរបស់លោកយូន។
មុនការបង្ហោះសារនៅលើទ្រូសសូសល (Truth Social) គេរំពឹងថាគម្រោងជួបគ្នាដោយផ្ទាល់ និងជាលើកដំបូងរវាងលោកត្រាំ និងលោកលីនឹងផ្ដោតសំខាន់ទៅលើកិច្ចព្រមព្រៀងពាណិជ្ជកម្មរវាងប្រទេសទាំង២កាលពីខែកក្កដា។ ក្នុងនោះ កូរ៉េខាងត្បូងសន្យាវិនិយោគទឹកប្រាក់រាប់រយប៊ីលានដុល្លារនៅប្រទេសអាមេរិក។ ជាកិច្ចឆ្លើយតប លោកត្រាំយល់ព្រមបញ្ចុះពន្ធគយលើទំនិញកូរ៉េខាងត្បូងមកនៅត្រឹម១៥%តែប៉ុណ្ណោះ។ កាលពីមុននោះ លោកគំរាមដំឡើងពន្ធដល់២៥%។
ខុទ្ទកាល័យប្រធានាធិបតីកូរ៉េខាងត្បូងប្រកាសថាថ្នាក់ដឹកនាំទាំង២នឹងពិភាក្សាគ្នាអំពីកិច្ចសហប្រតិបត្តិការទៅលើវិស័យផលិតកម្មសំខាន់ៗមួយចំនួនដូចជាការផលិតបន្ទះឈីប, អាគុយ និងការផលិតកប៉ាល់។ លោកត្រាំចាប់អារម្មណ៍ជាងគេការផលិតកប៉ាល់។ នៅក្នុងវិស័យការពារជាតិ ប្រធានបទសំខាន់អាចពាក់ព័ន្ធនឹងការបន្តដាក់កងទ័ពអាមេរិកនៅកូរ៉េខាងត្បូង។ តាមមើលទៅលោកត្រាំមិនចង់ដាក់កងទ័ពទទេៗដោយគ្មានផលប្រយោជន៍អ្វីសោះនោះទេ។ លោកអាចនឹងទារថ្លៃការពារបន្ថែមទៀត៕
ចែករំលែកព័តមាននេះ