រាជធានីភ្នំពេញ ៖ កម្លាំងនគរបាលខណ្ឌដង្កោ បានដេញបង្ក្រាបក្មេងទំនើង១ក្រុម ដែលមានរហស្សនាម «ក្រុមទឹកអំពៅ» មានគ្នា៤០នាក់ ប្រដាប់ដោយដំបងដែក បំពង់ទីប ជិះម៉ូតូប្រសេចប្រសាចតាមដងផ្លូវ…
រាជធានីភ្នំពេញ ៖ កម្លាំងនគរបាលខណ្ឌដង្កោ បានដេញបង្ក្រាបក្មេងទំនើង១ក្រុម ដែលមានរហស្សនាម «ក្រុមទឹកអំពៅ» មានគ្នា៤០នាក់ ប្រដាប់ដោយដំបងដែក បំពង់ទីប ជិះម៉ូតូប្រសេចប្រសាចតាមដងផ្លូវ ហើយក៏ត្រូវបានក្មេងទំនើងខាងលើ វាយតបត និងជិះម៉ូតូបំបុក បណ្ដាលឲ្យនគរបាល ចំនួន២រូប ដួលម៉ូតូរងរបួសធ្ងន់ និងស្រាល។ ចំណែកក្រុមក្មេងទំនើងទាំងនោះ បន្តជិតម៉ូតូរត់គេចខ្លួន ក៏បានប៉ះគ្នាបណ្ដាលឲ្យដួល ទើបត្រូវបានកម្លាំងនគរបាលឃាត់ខ្លួនបាន៨នាក់ និងដកហូតបានវត្ថុតាងមួយចំនួន រួចនាំយកទៅសាកសួរ និងកសាងសំណុំរឿងចាត់ការតាមច្បាប់ ។
ហេតុការណ៍នោះបានកើតឡើងកាលពីវេលាម៉ោង០៣ជិតភ្លឺ ថ្ងៃទី២៤ ខែសីហា ឆ្នាំ២០២៥ នៅតាមផ្លូវបេតុង៥០ម៉ែត្រ ត្រង់ចំណុចក្បែរភ្លើងស្តុបABC ស្ថិតនៅក្នុងភូមិព្រែកថ្លឹង សង្កាត់ជើងឯក ខណ្ឌដង្កោ រាជធានីភ្នំពេញ ។
នគរបាល បានប្រាប់ឲ្យដឹងថា ក្មេងទំនើង ដែលត្រូវឃាត់ខ្លួនទាំង៨នាក់នោះ រួមមាន ៖
១.ឈ្មោះ ជុំឌី អេវ៉េទីរ៉ូ អាយុ១៥ឆ្នាំ សិស្សថ្នាក់ទី០៩នៅសាលាជា ស៊ីមសាមគ្គី ស្នាក់នៅផ្ទះជួលមុខផ្សារទឹកថ្លា សង្កាត់ទឹកថ្លា ខណ្ឌសែនសុខ ។
២.ឈ្មោះ ម៉ោង សៀមិញ អាយុ១៥ឆ្នាំ ស្នាក់នៅបុរីអូបែកក្អម សង្កាត់អូរបែកក្អម ខណ្ឌសែនសុខ ។
៣.ឈ្មោះ សម្បត្តិ ចាន់សុខ អាយុ១៥ឆ្នាំ មុខរបរកម្មករលើកអីវ៉ាន់ មានទីលំនៅភូមិប្រាសាទ ឃុំព្រែកស្លែង ស្រុកកណ្តាលស្ទឹង ខេត្តកណ្តាល ។
៤.ឈ្មោះ ឌី ឆាលី អាយុ១៧ឆ្នាំ មុខរបរលក់ម្ជូរ ស្នាក់នៅផ្ទះជួល ភូមិដើមចាន់ សង្កាត់ច្បារអំពៅ ខណ្ឌច្បារអំពៅ ។
៥.ឈ្មោះ សល់ ទ្រីម៉េងហុង អាយុ១៥ឆ្នាំ សិស្សថ្នាក់ទី៨ អនុវិទ្យាល័យហ៊ុនសែនជម្ពូវ័ន មានទីលំនៅភូមិទួលកី សង្កាត់ភ្លើងឆេះរទេះ ខណ្ឌកំបូល ។ ៦.ឈ្មោះ កា រ៉ូសា អាយុ១៥ឆ្នាំ មុខរបររកម្មករដឹងជញ្ជូន ទីលំនៅភូមិស្រែជំរៅ សង្កាត់ចោមចៅទី២ ខណ្ឌពោធិ៍សែនជ័យ ។
៧.ឈ្មោះ ផាត លឹមហៀង អាយុ១៥ឆ្នាំ មុខរបរកម្មករមើលការងារផ្ទះសំណាក់ មានទីលំនៅភូមិទ្រា៤ សង្កាត់ស្ទឹងមានជ័យ៣ ខណ្ឌមានជ័យ ។
៨.ឈ្មោះ សុខ ផានិត អាយុ១៥ឆ្នាំ មុខរបរនៅផ្ទះ មានទីលំនៅភូមិទ្រា៤ សង្កាត់ស្ទឹងមានជ័យ៣ ខណ្ឌមានជ័យ ។
នគរបាលបានប្រាប់ឲ្យដឹងទៀតថា ក្រោយឃាត់ខ្លួនកម្លាំងនគរបាលដកហូតបាន ដំបងដែកបំពង់ទីប(ដងឆ័ត្រពណ៌ស) ប្រវែង១១០សង្ទីម៉ែត្រ១ដើម, ម៉ូតូម៉ាកហុងដាឌ្រីមសេ១២៥ ពណ៌ខ្មៅ ស៊េរីឆ្នាំ២០២០ គ្មានស្លាកលេខ១គ្រឿង, ម៉ូតូម៉ាកស៊ុយហ្ស៊ុយគីនិច ពណ៌ស ស៊េរីឆ្នាំ២០២៥ ពាក់ស្លាកលេខភ្នំពេញ1LF-9383 ១គ្រឿង ។ ម៉ូតូម៉ាកហុងដាសេ១២៥ ពណ៌ខ្មៅ ពាក់ស្លាកលេខភ្នំពេញ1LP-8571 ១គ្រឿង, ម៉ូតូម៉ាកហុងដាស្កូបពី ពណ៌ខ្មៅ ស៊េរីឆ្នាំ២០២៣ ពាក់ស្លាកលេខភ្នំពេញ1LH-7158 ១គ្រឿង, ម៉ូតូម៉ាកហុងដាស្កូបពី ពណ៌ក្រហម ស៊េរីឆ្នាំ២០២៥ គ្មានស្លាកលេខ ១គ្រឿង។ ទូរសព្ទដៃម៉ាក IPHONE X ពណ៌ខ្មៅ ០១គ្រឿង, ស្លាកលេខម៉ូតូ បន្ទាយមានជ័យ1V-9979 ១បន្ទះ, ទូរសព្ទដៃម៉ាក IPHONE ពណ៌ផ្កាឈូក ១គ្រឿង, ទូរសព្ទដៃម៉ាក IPHONE 15 ពណ៌ប្រផះ ចំនួន០១គ្រឿង ទូរសព្ទដៃម៉ាក SAMSUNG ពណ៌ត្រាវ១គ្រឿង, ទូរសព្ទដៃម៉ាក IPHONE ខូច(មិនដំណើរការ)ចំនួន០២គ្រឿង, ទូរសព្ទដៃម៉ាកIphone 11 ពណ៌ក្រហម១គ្រឿង, ទូរសព្ទដៃម៉ាក Tecno ពណ៌ខ្មៅ ចំនួន០១គ្រឿង ។
នគរបាលបានប្រាប់បន្ថែមទៀតថា នៅវេលាទៀបភ្លឺថ្ងៃកើតហេតុ កម្លាំងនគរបាលខណ្ឌដង្កោ បានសហការជាមួយនគរបាលប៉ុស្តិ៍ជើងឯក ក្រោមបញ្ជារបស់លោកវរសេនីយ៍ឯក ជឹម ស៊ីថា អធិការនគរបាលខណ្ឌដង្កោ បានជិះម៉ូតូល្បាត ទប់ស្កាត់បទល្មើសនៅក្នុងមូលដ្ឋាន។ ពេលទៅដល់ត្រង់ចំណុចភ្លើងស្តុបបាគូ ស្ថិតនៅភូមិបាគូ សង្កាត់ដង្កោ ខណ្ឌដង្កោ បានឃើញក្មេងទំនើង០១ក្រុមនោះ មានគ្នា៤០នាក់ ជិះម៉ូតូ២០គ្រឿង តាមផ្លូវបេតុង៥០ម៉ែត្រ ដោយមានកាន់ដំបងដែកបំពង់ទីប(ដងឆ័ត្រ)ផងដែរ។ ឃើញដូចនេះកម្លាំងនគរបាលក៏បានហៅឲ្យឈប់ ដើម្បីធ្វើការសួរនាំ ប៉ុន្តែក្មេងទំនើងទាំងនោះ មិនព្រមឈប់ឡើយ ក៏បានបើកម៉ូតូគេចខ្លួន ហើយកម្លាំងនគរបាលក៏បានដេញតាម និងប្រកាសតាមវិទ្យុទាក់ទង ដើម្បីឲ្យកម្លាំង ដែលនៅតាមបណ្ដាគោលដៅខាងមុខជួយស្ទាក់ ខណៈនោះក្រុមក្មេងទំនើងបានយកដំបងដែកទីបវាយទៅលើនគរបាលកុំឲ្យចូលជិត ប៉ុន្តែវាយមិនត្រូវឡើយ ។
នគរបាលខាងលើបានបញ្ជាក់ប្រាប់ថា បន្ទាប់មកកម្លាំងនគរបាល ក៏បានជិះម៉ូតូដេញតាមក្រុមជនសង្ស័យខាងលើ រហូតដល់ភូមិព្រែកថ្លឹង សង្កាត់ជើងឯក ខណ្ឌដង្កោ ស្រាប់តែក្រុមក្មេងទំនើងនោះបើកម៉ូតូបំបុកម៉ូតូនគរបាល២រូប បណ្ដាលឲ្យដួលហើយម្នាក់រងរបួសជង្គង់ខាងស្តាំដេរចំនួន០៣ថ្នេរ និងម្នាក់ទៀតរលាត់ដៃជើងរបួសស្រាល។ ដោយឡែកក្មេងទំនើងនោះ បានបន្តគេចខ្លួន ហើយក៏បានប៉ះគ្នា បណ្ដាលឲ្យដួល ទើបកម្លាំងនគរបាលឃាត់ខ្លួនបានចំនួន០៨នាក់ រីឯបក្ខពួក៣២នាក់ទៀតគេចខ្លួនបាត់អស់ ។ បន្ទាប់មកនគរបាលបាននាំជន ដែលត្រូវឃាត់ខ្លួនរួមទាំងវត្ថុតាងដែលដកហូតបាន ទៅកាន់អធិការដ្ឋាននគរបាលខណ្ឌដង្កោ ដើម្បីសាកសួរ និងកសាងសំណុំរឿងចាត់ការតាមច្បាប់ ៕
ចែករំលែកព័តមាននេះ