ខេត្តស្ទឹងត្រែង ៖ ពាក់ព័ន្ធទៅនឹងបទល្មើសព្រៃឈើ មួយរយៈចុងក្រោយនេះ ហាក់បីដូចមានការផុសផុលជាអន្លើ ខណៈកម្លាំងសមត្ថកិច្ច ក៏បានបន្តពង្រឹងគុណភាព និងអនុវត្តច្បាប់ក្នុងការឆ្លើយតបទៅកាន់បទល្មើសនេះដែរ ។ រដ្ឋបាលព្រៃឈើ…
ខេត្តស្ទឹងត្រែង ៖ ពាក់ព័ន្ធទៅនឹងបទល្មើសព្រៃឈើ មួយរយៈចុងក្រោយនេះ ហាក់បីដូចមានការផុសផុលជាអន្លើ ខណៈកម្លាំងសមត្ថកិច្ច ក៏បានបន្តពង្រឹងគុណភាព និងអនុវត្តច្បាប់ក្នុងការឆ្លើយតបទៅកាន់បទល្មើសនេះដែរ ។
រដ្ឋបាលព្រៃឈើ បានឆ្លើយតបភ្លាមៗទៅនឹងសកម្មភាពរបស់ក្រុមឈ្មួញ ដែលលួចបន្លំក្នុងការបង្កប់ដឹកជញ្ជូនឈើដោយគ្មានលិខិតអនុញ្ញាត ។
រដ្ឋបាលព្រៃឈើ អោយដឹងថា រថយន្តកែច្នៃមួយគ្រឿង ត្រូវបានបង្ក្រាប ខណៈដឹកបង្គោលរបងក្រាកពីលើបង្កប់ឈើក្តា នៅពីក្រោម ក្នុងគោលដៅស្រុកថាឡាបរិវ៉ាត់ ទៅខេត្តក្រចេះ ។
នាយផ្នែករដ្ឋបាលព្រៃឈើស្ទឹងត្រែង លោក ហ៊ុន សំអឿន បានបញ្ជាក់ថា ៖ នាថ្ងៃទី២៤ ខែសីហា ឆ្នាំ២០២៥ វេលាម៉ោង៧និង០៥នាទីព្រឹក ក្រុម
ការងារបង្ក្រាបបទល្មើស នៃខណ្ឌរដ្ឋបាលព្រៃឈើស្ទឹងត្រែង សហការជាមួយកម្លាំងកងរាជអាវុធហត្ថខេត្ត បានចុះទប់ស្កាត់ និងបង្ក្រាបបទល្មើសដឹកជញ្ជូន ផលអនុផលព្រៃឈើ ដោយគ្មានលិខិតអនុញ្ញាតពីរដ្ឋបាលព្រៃឈើ នៅត្រង់ចំណុចគល់ស្ពានមេគង្គស្ថិតនៅភូមិ អូរត្រែល ឃុំថាឡាបរិវ៉ាត់ ស្រុកថាឡាបរិវ៉ាត់ ខេត្តស្ទឹងត្រែង ។
កម្លាំងសហការបានចាប់ឃាត់រថយន្តមួយគ្រឿង ម៉ាក់សាំងយ៉ុងកែច្នៃ ពណ៌ទឹកប៊ិច ពាក់ផ្លាកលេខភ្នំពេញ ២D ០៨៩៤ ដឹកគ្រាក់ឈើលេខ២ (ខ្លុង) ចំនួន ៣១ដើម និងឈើអាលេខ ២(ក្ដារ) ចំនួន៥២សន្លឹក ស្មើនឹង០,៧២៨ ម៉ែត្រ (សូន្យម៉ែត្រីគុណ ប្រាំពីររយម្ភៃប្រាបី) ។
លោកនាយផ្នែក បានបន្ថែមថា រថយន្តខាងលើនេះ ធ្វើសកម្មភាពស្ទើរមួយឆ្នាំទៅហើយ ដោយប្រើប្រាស់រូបភាពដឹកជញ្ជូនបង្គោលរបងគ្រាក់ ។
ក្រោយបណ្ដាញរាយការណ៍ទើបឈានដល់ការឃាត់ត្រួតពិនិត្យ និងបង្ក្រាបតែម្ដង។
ក្រោយការបង្ក្រាបក្រុមការងារបានដឹកជញ្ជូនវត្តុតាងបទល្មើសមករក្សាទុកបណ្ដោះអាសន្ននៅស្នាក់ការផ្នែករដ្ឋបាលព្រៃឈើថាឡាបរិវ៉ាត់ ដើម្បីបន្តនីតិវិធី ។
ទាក់ទិនទៅនឹងបទល្មើសព្រៃឈើនេះដែរ គេសង្កេតឃើញស្ទើជារៀងរាល់ថ្ងៃ ក្រុមម៉ូតូដឹកជញ្ជូនឈើ ដូចកណ្ដៀរមកពីត្រើយម្ខាងទន្លេសេកុង សង្កាត់សាមគ្គី ចូលទីរួមខេត្ត និងបន្តចែកចាយទៅតាមរោងសិប្បកម្មកែច្នៃ ផលិតជាគ្រឿងសង្ហារឹម ៕
ចែករំលែកព័តមាននេះ