រាជធានីភ្នំពេញ ៖ លោកជំទាវ ឧត្តមសេនីយ៍ឯក ម៉ាលី សុជាតា អ្នកនាំពាក្យក្រសួងការពារជាតិ នៃព្រះរាជាណាចក្រកម្ពុជា ៖ នៅថ្ងៃទី២៥…
រាជធានីភ្នំពេញ ៖ លោកជំទាវ ឧត្តមសេនីយ៍ឯក ម៉ាលី សុជាតា អ្នកនាំពាក្យក្រសួងការពារជាតិ នៃព្រះរាជាណាចក្រកម្ពុជា ៖ នៅថ្ងៃទី២៥ ខែសីហា ឆ្នាំ២០២៥ ចាប់ពីម៉ោង ១៤:២០នាទី រសៀលនេះ កងកម្លាំងយោធារបស់ថៃ បានព្យាយាមរាយបន្លាលួស នៅភូមិជោគជ័យ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ ដែលទល់មុខភូមិសាស្ត្រភូមិ Nong Chan ស្រុក Khok Sung ខេត្តស្រះកែវ ប្រទេសថៃ ប៉ុន្តែក៏ត្រូវបានប្រជាពលរដ្ឋ និងសមត្ថកិច្ចនៅភូមិជោគជ័យធ្វើការទប់ស្កាត់យ៉ាងខ្លាំង ទើបកងកម្លាំងរបស់ថៃ យកបន្លាលួសនោះត្រឡប់ទៅវិញ ។
កម្ពុជាស្នើឱ្យភាគីថៃគោរពឱ្យបានពេញលេញ និងខ្ជាប់ខ្ជួននូវបទឈប់បាញ់ និងជាពិសេសស្មារតីនៃកិច្ចព្រមព្រៀង នៃកិច្ចប្រជុំវិសាមញ្ញរបស់គណៈកម្មាធិការព្រំដែនថ្នាក់យោធភូមិភាគ (RBC) រវាងយោធភូមិភាគទី៥របស់កម្ពុជា និងកងទ័ពភូមិភាគទី១របស់ថៃ ដែលបានប្រព្រឹត្តិឡើងកាលពីថ្ងៃទី២២ ខែសីហា ឆ្នាំ២០២៥ កន្លងទៅថ្មីៗនេះ ពាក់ព័ន្ធនឹងការមិនពង្រីកភូមិសាស្ត្រ នៃជម្លោះ និងជៀសវាងទង្វើ ដែលនាំទៅដល់ការកើនឡើង នៃភាពតានតឹង ។
កម្ពុជាបញ្ជាក់ថា រាល់ទំនាស់ពាក់ព័ន្ធនឹងបញ្ហាព្រំដែន ត្រូវយកទៅដោះស្រាយដោយគណៈកម្មាធិការចម្រុះខណ្ឌសីមាព្រំដែនគោក (JBC) នៃប្រទេសទាំងពីរ ស្របតាមស្មារតី នៃអនុស្សរណៈនៃការយោគយល់ឆ្នាំ២០០០ (MOU 2000) ។
សូមជម្រាបថា ប្រជាពលរដ្ឋរាប់សិបនាក់ មានស្រីមានប្រុសខ្លះកាន់កំបិត ខ្លះពូថៅ ខ្លះដំបងស្ទើរគ្រប់ដៃបានប្រឈមជាមួយទាហានសៀមប្រដាប់ដោយអាវុធស្ទើរគ្រប់ដៃបន្តដាក់លួសបន្លា នៅរសៀលថ្ងៃទី២៥ ខែសីហា ឆ្នាំ២០២៥ នៅក្នុងភូមិសាស្ត្រភូមិជោគជ័យ ឃុំអូរបីជាន់ ស្រុកអូរជ្រៅ ។
បាតុភាពនេះបានកើតឡើងនៅពេលដែលទាហានសៀមរាយលួសបន្លាបន្តទៀតទើបគេឃើញមានបងប្អូនប្រជាពលរដ្នមានចិត្តអង់អាចក្លាហាន នាំគ្នាយកដំបងគាស់លួសបន្លាចេញ ខ្លះទៀតក៏បានស្រែកជេរ (អាចោរសៀម) មករំលោពបំពាន អធិបតេយ្យភាពកម្ពុជា ម្តងហើយម្តងទៀត និងសុំឱ្យក្រុមអ្នកសង្កេតការណ៍អន្តរជាតិ និងអង្គការសិទ្ធិមនុស្សអន្តរជាតិ ជួយរកយុត្តិធម៌ ។
លោក កែវដារ៉ា រស្មី អភិបាលស្រុកអូរជ្រៅ បានបញ្ជាក់ថា ទាហានសៀមពិតជាបានមករាយលួសបន្លាក្នុងភូមិសាស្ត្រភូមិជោគជ័យពិតមែន ប្រដាប់ដោយអាវុធស្ទើរគ្រប់ដៃ ។ ពេលនោះ ប្រជាពលរដ្ឋមិនតិចជាងរយនាក់ បាននាំគ្នាទាំងប្រុសទាំងស្រីធ្វើការប្រឈម ខ្លះយកឈើ គាស់វាយលួសបន្លាចេញ ។ ពួកគាត់ពិតជាមានភាពអង់អាចក្លាហាន ទីបំផុតបណ្ដាលឱ្យទាហានសៀមរួញរាក្នុងការរាយលួសបន្លា និងទីបំផុតបានដកថយហើយបន្លាលួសដែលបានរាយលើផ្លូវលំក៏ត្រូវអ្នកភូមិរើចេញពីផ្លូវដែរ ។
លោកបានបញ្ជាក់ថា រយៈពេលកន្លងមកទាហានសៀម បានដាក់លួសបន្លាហ៊ុមព័ទ្ធផ្ទះបងប្អូនប្រជាពលរដ្ឋ ១២ខ្នងផ្ទះ ស្មើនឹង១២គ្រួសារ មានមនុស្សរាយ ៥៩នាក់ ក្នុងនោះនៅភូមិសាស្ត្រភូមិព្រៃចាន់ ៦ខ្នងផ្ទះ និងភូមិជោគជ័យ មាន៦ខ្នងផ្ទះ ៕
ចែករំលែកព័តមាននេះ