រឿងបោកប្រាស់តាមបណ្តាញសង្គមនៅតែមានជាបន្តបន្ទាប់ ហើយក៏ត្រូវសមត្ថកិច្ចស្រាវជ្រាវ និងចាត់វិធានការច្បាប់ជាហូរហែរមកដែរ ។ ប៉ុន្តែនៅតែមានអ្នកដែលបន្តរងគ្រោះបន្ថែមទៀត មកដល់ពេលនេះទៅហើយនោះ ។ រឿងប្រើរូបអ្នកដទៃមកក្លែងបន្លំគេឯងនេះ គឺមានអ្នកដែលចាញ់បោកទាំងប្រុសទាំងស្រី ហើយក៏មានអ្នកដែលប្រើប្រាស់បណ្តាញសង្គមលក់នេះលក់នោះ…
រឿងបោកប្រាស់តាមបណ្តាញសង្គមនៅតែមានជាបន្តបន្ទាប់ ហើយក៏ត្រូវសមត្ថកិច្ចស្រាវជ្រាវ និងចាត់វិធានការច្បាប់ជាហូរហែរមកដែរ ។ ប៉ុន្តែនៅតែមានអ្នកដែលបន្តរងគ្រោះបន្ថែមទៀត មកដល់ពេលនេះទៅហើយនោះ ។
រឿងប្រើរូបអ្នកដទៃមកក្លែងបន្លំគេឯងនេះ គឺមានអ្នកដែលចាញ់បោកទាំងប្រុសទាំងស្រី ហើយក៏មានអ្នកដែលប្រើប្រាស់បណ្តាញសង្គមលក់នេះលក់នោះ ហើយដល់ពេលគេវេលុយអោយ គឺប្រមូលលុយរត់ បាត់ក៏មាន ។ ប៉ុន្តែអ្វីដែលហួសចិត្តនោះ គឺថ្មីៗនេះមាននារីមួយចំនួនបានចាញ់បោកបុគ្គល ដែលប្រើប្រាស់ហ្វេសបុកជាធ្នាក់ ដោយយករូបអ្នកដទៃដែលស្អាតសង្ហាមកបង្កើតជាគណនីក្លែងបន្លំមួយ ហើយឆាតទំនាក់ទំនងមនុស្សស្រីជាច្រើនគ្នា ។
ហើយអ្វីដែលហួសចិត្តទៅទៀតនោះ អ្នកដែលពាក់ព័ន្ធនឹងករណីបោកប្រាស់នោះទៀតសោត គឺជាអ្នកទោសដែលកំពុងតែអនុវត្តទោសនៅក្នុងពន្ធគារទៅទៀត ប៉ុន្តែនៅមានលទ្ធភាពលេងបណ្តាញសង្គម រហូតអាចឈានទៅបោកនារីមួយចំនួនបាន ។ នេះមិនមែនជារឿងលេងសើច ហើយក៏មិនមែនជារឿងប្រឌិតដែរ តែគឺជារឿងមួយដែលលោកឧត្តមសេនីយ រ័ត្ន ស្រ៊ាង មេបញ្ជាការកងរាជអាវុធហត្ថរាជធានីភ្នំពេញបានចែករំលែកនៅលើបណ្តាញសង្គម ផ្ទាល់របស់លោក ។
តាមរឿងរ៉ាវដែលលោកឧត្តមសេនីយបានរៀបរាប់ គឺថាស្ត្រីៗដែលលង់ហើយ ឆ្លើយតបនឹងក្រុមនេះក៏ចាប់ផ្តើមទំនាក់ទំនងស្នេហាផ្អែមល្ហែមហៅគ្នាប្រពន្ធសម្លាញ់ប្តីសម្លាញ់ពេញៗមាត់ និងពេលខ្លះសុំជួបក្រុមគ្រួសារដោយសន្យាចូលស្តីដណ្តឹងតាមច្បាប់ និងពេលខ្លះបានកំណត់ថ្ងៃភ្ជាប់ពាក្យផងដែរ ។ បន្ទាប់ពីនារីរងគ្រោះ ជឿលង់ស៊ប់ហើយ ជនសង្ស័យក៏ចាប់ផ្តើមបោកបញ្ឆោតល្បួងឲ្យថតរូបអាក្រាត បង្ហាញដល់ជនសង្ស័យ ដោយសំអាងថា គង់នឹងក្លាយជាប្តីប្រពន្ធជាមួយគ្នាឆាប់ៗ ។ ការអន្ទងនេះបានធ្វើឲ្យជនរងគ្រោះភ្លេចគិត ត្បិតយល់ថា ស្និទ្ធស្នាលខ្លាំងផ្អែមល្ហែមខ្លាំងធ្វើឲ្យស្រលាញ់ខ្លាំងក៏ព្រមបើកបង្ហាញ តែចុងក្រោយគឺមានតែទឹកភ្នែក ។
លោកបានបន្តទៀតថា ក្រោយមានរូបអាក្រាតជនរងគ្រោះហើយនោះ ជនសង្ស័យក៏ចាប់ផ្តើម ប្រើល្បិចសុំខ្ចីលុយ ដោយប្រាប់ថា ខ្លួនមានបញ្ហាក្នុងមុខរបរ ឬមានបញ្ហាគ្រោះថ្នាក់ចរាចរណ៍ ឬមានបញ្ហាខុសច្បាប់ផ្សេងៗ រហូតជនរងគ្រោះអស់លុយឲ្យខ្ចី ឬដឹងខ្លួនមិនព្រមឲ្យលុយជនសង្ស័យខ្ចីទើបជនសង្ស័យយករូបអាក្រាតមកគំរាមទារប្រាក់តែម្តង ។
លោកឧត្តមសេនីយបានបន្តទៀតថា ស្តាប់ទៅហាក់ដូចថា ជនរងគ្រោះឆោតល្ងង់ តែជាក់ស្តែងមនុស្សយើងពេលលង់លើអ្វីមួយហើយ គឺតែងទុកចិត្តភ្លេចគិតពិចារណា ។ មិនថាយើងមិនថាគេ ព្រោះករណីទាំងនេះអាវុធហត្ថរាជធានីភ្នំពេញ ធ្លាប់បានទទួលបណ្តឹងធ្វើការបង្ក្រាប និងបានផ្សព្វផ្សាយជាច្រើនមកហើយ ដោយមានអ្នកខ្លះរងគ្រោះអស់ខ្ទង់ពាន់ដុល្លារ អ្នកខ្លះអស់ខ្ទង់ម៉ឺនដុល្លារ និងមានអ្នកអស់ដល់ខ្ទង់សែនដុល្លារផងដែរ ។
រឿងថ្មី គឺនៅថ្ងៃទី១៨ ខែសីហា ឆ្នាំ២០២៥ អាវុធហត្ថរាជធានីភ្នំពេញ បានទទួលបណ្ដឹងពីនារីម្នាក់ប្ដឹងចោទប្រកាន់ទៅលើម្ចាស់គណនី Facebook មួយឈ្មោះ ចាន់ ពិសិដ្ឋ ពីបទគំរាមកំហែង ដោយមានបញ្ជាឱ្យបំពេញលក្ខខណ្ឌអ្វីមួយ ។ នារីរងគ្រោះ បានរៀបរាប់ថា គណនី Facebook ខាងលើ បានទំនាក់ទំនងមកសុំស្នេហ៍ខ្លួន ដោយប្រើពាក្យសម្ដីផ្អែមល្ហែមលួងលោមរហូតខ្លួនលង់ចិត្តស្រលាញ់ ហ៊ាន Call Live Video Facebook អាក្រាតកាយឲ្យជនសង្ស័យមើល ។ តែមិននឹកស្មានថា ជនសង្ស័យបានលួចថតចម្លង Videoនោះទុក ។
បន្ទាប់មក ជនសង្ស័យបានភូតកុហកថា រថយន្តរបស់គេ ដឹកឈើត្រូវបានសមត្ថកិច្ចខេត្តរតនគីរីឃាត់ទុក ហើយបើសិនចង់ដោះស្រាយត្រូវមានលុយ១៥.០០០ តែគេថា គេមានលុយនៅនឹងខ្លួនចំនួនតែ១ម៉ឺនដុល្លារ តែខ្វះ៥ពាន់ទៀត ចង់ខ្ចីពីជនរងគ្រោះ ដើម្បីយកទៅលស់រថយន្តមកវិញ ។ ពេលសុំខ្ចីមិនបាន ស្រាប់តែជនសង្ស័យគំរាមថា គេមានវីដេអូអាក្រាតរបស់ខ្លួន បើសិនជាមិនព្រមប្រគល់លុយតាមលក្ខខណ្ឌរបស់គេនោះទេ គេនឹងយកវីដេអូអាក្រាតទៅបង្ហោះចែកចាយជាសាធារណៈមិនខាន ។ ដោយមានការភ័យខ្លាចខ្លួន ក៏បានសុំចរចារហូតដល់ត្រូវគ្នាចំនួន១ពាន់ដុល្លារ ។ បន្ទាប់ពីផ្ញើលុយរួច ជនសង្ស័យនៅតែបន្តគំរាមឲ្យផ្ញើថែមចំនួន១ពាន់ដុល្លារទៀតទើបខ្លួន មកដាក់ពាក្យបណ្ដឹងនៅអាវុធហត្ថរាជធានីភ្នំពេញតែម្ដង ។
ក្រោយពីទទួលបានបណ្ដឹង កម្លាំងជំនាញនៃការិយាល័យប្រឆាំងការជួញដូរមនុស្ស កងរាជអាវុធហត្ថរាជធានីភ្នំពេញ បានប្រើវិធានការស្រាវជ្រាវយ៉ាងយកចិត្តទុកដាក់រហូតរកឃើញថា ជនសង្ស័យដែលធ្វើសកម្មភាពបោកបញ្ឆោត និងគំរាមកំហែងដល់ជនរងគ្រោះមានតម្រុយចេញពីទីតាំងខេត្តស្ទឹងត្រែង ដូច្នេះកម្លាំងជំនាញកងរាជអាវុធហត្ថរាជធានីភ្នំពេញ បានពន្លាតដែនសមត្ថកិច្ច ទៅសហការជាមួយកម្លាំងជំនាញអាវុធហត្ថខេត្តស្ទឹងត្រែង ស្រាវជ្រាវស្វែងរកឃើញ ក្រុមបក្ខពួករបស់ជនសង្ស័យដែលទៅដកប្រាក់មានចំនួន៣នាក់ ។
បន្ទាប់ពីសួរចម្លើយ បក្ខពួកជនសង្ស័យទាំង៣នាក់នេះរួចមក សមត្ថកិច្ចអាវុធហត្ថបានរកឃើញជនសង្ស័យ និងអ្នកជាប់ពាក់ព័ន្ធសរុប៣នាក់ផ្សេងទៀតគួរឲ្យភ្ញាក់ផ្អើលបំផុតដែលសុទ្ធតែជាទណ្ឌិតកំពុងអនុវត្តទោសក្នុងពន្ធនាគារខេត្តស្ទឹងត្រែង ។ ទណ្ឌិតទាំងនោះ មានឈ្មោះ ជាង ខេងលី មានទោសជាប់គុក៣ឆ្នាំ ពីបទចែកចាយ និងប្រើប្រាស់សារធាតុញៀន ជាអ្នកបង្កើតគណនីក្លែងបន្លំ និងជាអ្នកទំនាក់ទំនងលួងលោមបោកបញ្ឆោតគំរាមទារប្រាក់ជនរងគ្រោះផ្ទាល់ ។
ម្នាក់ទៀត ជាទណ្ឌិតឈ្មោះ ស្រេន ឡាង មានទោសជាប់គុក១៣ឆ្នាំ ពីបទលួចមានស្ថានទម្ងន់ទោស និងសមគំនិតក្នុងអំពើឃាតកម្ម ហើយម្នាក់ទៀតជាទណ្ឌិតឈ្មោះ ហេង សៀវត្រា មានទោសជាប់គុក៣ឆ្នាំពីបទចែកចាយ និងប្រើប្រាស់សារធាតុញៀនជាអ្នកជួយលាក់ទូរស័ព្ទលាក់ស៊ីម ក្នុងពន្ធនាគារទុកឲ្យជាង ខេងលី យកទៅធ្វើសកម្មភាព ។
បច្ចប្បន្ន ជនសង្ស័យ និងបក្ខពួកកំពុងត្រូវបានអយ្យការអមសាលាដំបូងខេត្តស្ទឹងត្រែង បន្តនិតិវិធី ហើយទំនងជានឹងអាចបន្ថែមរយៈពេលនៅក្នុងគុកបន្ថែមទៀតហើយ ដោយសារល្មើសជាន់លើល្មើស ។ សម្រាប់ករណីនេះវាបញ្ចប់ហើយ សមត្ថកិច្ចក៏រកយុត្តិធម៌ជូននារីរងគ្រោះបានផងដែរ ប៉ុន្តែសង្ឃឹមថា រឿងស្រដៀងគ្នានេះនឹងលែងមានទៀត ។ សូមកុំយកបណ្តាញសង្គម គឺជាមូលដ្ឋាននៃទំនាក់ទំនងមែនទែន និងការសម្រេចចិត្តការងារ ។ បណ្តាញសង្គម ជាពិភពដែលពោរពេញទៅដោយការសម្តែង បំភ័ន្ត ហើយជាពិភពដែលជនខិលខូច ងាយស្រួលធ្វើសកម្មភាពណាស់ ។ បណ្តាញសង្គមពោរពេញដោយព័ត៌មានមិនពិត ។
ដូច្នេះមុននឹងសម្រេចចិត្តត្រូវតែផ្ទៀងផ្ទាត់ ហើយយ៉ាងហោចណាស់ក៏ត្រូវតែឃើញមុខ ។ ការណាត់ជួបឃើញមុខតាមបណ្តាញសង្គមនេះ ពេលខ្លះក៏គ្រោះថ្នាក់ដែរ ។ ដូច្នេះក៏ត្រូវតែប្រុងប្រយ័ត្ន ពោល គឺគួរតែមានអ្នកដឹងអ្នកឭ ហើយទៅណាមកណា សូមកុំទទួលការណាត់ជួបតែម្នាក់ឯង ។
សូមប្រុងប្រយ័ត្ន ហើយសង្ឃឹមថា រឿងថ្មីនៃមេរៀនចាស់នេះនឹងក្លាយជាបទពិសោធន៍បន្ថែម ដល់មហាជនឲ្យកាន់តែប្រុងប្រយ័ត្នជាងមុនផងចុះ ៕
ចែករំលែកព័តមាននេះ