ខេត្តបន្ទាយមានជ័យ ៖ ប្រជាពលរដ្ឋរាប់សិបនាក់ មានស្រីមានប្រុសខ្លះកាន់កំបិត ខ្លះពូថៅ ខ្លះដំបងស្ទើរគ្រប់ដៃបានប្រឈមជាមួយទាហានសៀមប្រដាប់ដោយអាវុធស្ទើរគ្រប់ដៃបន្តដាក់លួសបន្លា នៅរសៀលថ្ងៃទី២៥ ខែសីហា ឆ្នាំ២០២៥ នៅក្នុងភូមិសាស្ត្រភូមិជោគជ័យ…
ខេត្តបន្ទាយមានជ័យ ៖ ប្រជាពលរដ្ឋរាប់សិបនាក់ មានស្រីមានប្រុសខ្លះកាន់កំបិត ខ្លះពូថៅ ខ្លះដំបងស្ទើរគ្រប់ដៃបានប្រឈមជាមួយទាហានសៀមប្រដាប់ដោយអាវុធស្ទើរគ្រប់ដៃបន្តដាក់លួសបន្លា នៅរសៀលថ្ងៃទី២៥ ខែសីហា ឆ្នាំ២០២៥ នៅក្នុងភូមិសាស្ត្រភូមិជោគជ័យ ឃុំអូរបីជាន់ ស្រុកអូរជ្រៅ ។
បាតុភាពនេះបានកើតឡើងនៅពេលដែលទាហានសៀមរាយលួសបន្លាបន្តទៀតទើបគេឃើញមានបងប្អូនប្រជាពលរដ្នមានចិត្តអង់អាចក្លាហាន នាំគ្នាយកដំបងគាស់លួសបន្លាចេញ ខ្លះទៀតក៏បានស្រែកជេរ (អាចោរសៀម) មករំលោពបំពាន អធិបតេយ្យភាពកម្ពុជា ម្តងហើយម្តងទៀត និងសុំឱ្យក្រុមអ្នកសង្កេតការណ៍អន្តរជាតិ និងអង្គការសិទ្ធិមនុស្សអន្តរជាតិ ជួយរកយុត្តិធម៌ ។
លោក កែវដារ៉ា រស្មី អភិបាលស្រុកអូរជ្រៅ បានបញ្ជាក់ថា ទាហានសៀមពិតជាបានមករាយលួសបន្លាក្នុងភូមិសាស្ត្រភូមិជោគជ័យពិតមែន ប្រដាប់ដោយអាវុធស្ទើរគ្រប់ដៃ ។ ពេលនោះ ប្រជាពលរដ្ឋមិនតិចជាងរយនាក់ បាននាំគ្នាទាំងប្រុសទាំងស្រីធ្វើការប្រឈម ខ្លះយកឈើ គាស់វាយលួសបន្លាចេញ ។ ពួកគាត់ពិតជាមានភាពអង់អាចក្លាហាន ទីបំផុតបណ្ដាលឱ្យទាហានសៀមរួញរាក្នុងការរាយលួសបន្លា និងទីបំផុតបានដកថយហើយបន្លាលួសដែលបានរាយលើផ្លូវលំក៏ត្រូវអ្នកភូមិរើចេញពីផ្លូវដែរ ។
លោកបានបញ្ជាក់ថា រយៈពេលកន្លងមកទាហានសៀម បានដាក់លួសបន្លាហ៊ុមព័ទ្ធផ្ទះបងប្អូនប្រជាពលរដ្ឋ ១២ខ្នងផ្ទះ ស្មើនឹង១២គ្រួសារ មានមនុស្សរាយ ៥៩នាក់ ក្នុងនោះនៅភូមិសាស្ត្រភូមិព្រៃចាន់ ៦ខ្នងផ្ទះ និងភូមិជោគជ័យ មាន៦ខ្នងផ្ទះ ។
បាតុភាពដែលផ្ទុះឡើងនេះមិនទាន់មានការឆ្លើយតបបែបណាពីក្រសួងការពារជាតិឬពីខាងសៀមនៅឡើយទេ ត្រឹមម៉ោង៥ល្ងាចថ្ងៃទី២៥ សីហា ២០២៥ ។
ជាមួយគ្នានឹងការផ្ទុះបាតុភាពនេះ នៅថ្ងៃទី២៥ ខែសីហា ឆ្នាំ២០២៥នេះ អភិបាលខេត្តបន្ទាយមានជ័យ ក៏បានជូនដំណឹងដល់ភាគីថៃថា ការសន្យារបស់ភាគីថៃពីការចេញបណ្ណកម្មសិទ្ធិឲ្យពលរដ្ឋថៃ នៅភូមិ Nong Chan ស្រុក Khok Sung ខេត្តស្រះកែវ ដែលជាប់នឹងភូមិជោគជ័យ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ បានធ្វើឲ្យប៉ះពាល់ដល់អធិបតេយ្យរបស់កម្ពុជា ឬប៉ះពាល់ដល់តំបន់ដែលគណៈកម្មការចម្រុះខណ្ឌសីមា ព្រំដែនគោក (JBC) នៃប្រទេសទាំងពីរ ពុំទាន់បានឯកភាពពីខណ្ឌសីមានៅលើដីជាក់ស្ដែង ។
ក្នុងលិខិតរបស់ឯកឧត្តម អ៊ុំ រាត្រី តបទៅសមភាគីថៃ អភិបាលខេត្តស្រះកែវថា រដ្ឋបាលខេត្តបន្ទាយមានជ័យសូមធ្វើការជំទាស់ចំពោះរឿងនេះ ព្រោះជាការរំលោភ MOU 2000 ៕
ចែករំលែកព័តមាននេះ