រាជធានីភ្នំពេញ ៖ ក្រុមការងារបញ្ជាការដ្ឋានការពារអាកាសកងទ័ពជើងគោក ចុះសួរសុខទុក្ខយោធិនការពារអាកាសចំណុះឲ្យកងពលធំលេខ៣ ឈរជើងនៅទិសភ្នំខ្មោច កុំពុងសម្រាកព្យាបាលនៅមន្ទីរពេទ្យរុស្ស៊ី ។ នេះបើយោងតាម កងទ័ពជើងគោកនៃកងយោធពលខេមរភូមិន្ទបានប្រកាសនាថ្ងៃទី២៥ ខែសីហានេះ…
រាជធានីភ្នំពេញ ៖ ក្រុមការងារបញ្ជាការដ្ឋានការពារអាកាសកងទ័ពជើងគោក ចុះសួរសុខទុក្ខយោធិនការពារអាកាសចំណុះឲ្យកងពលធំលេខ៣ ឈរជើងនៅទិសភ្នំខ្មោច កុំពុងសម្រាកព្យាបាលនៅមន្ទីរពេទ្យរុស្ស៊ី ។ នេះបើយោងតាម កងទ័ពជើងគោកនៃកងយោធពលខេមរភូមិន្ទបានប្រកាសនាថ្ងៃទី២៥ ខែសីហានេះ ។
ថ្ងៃចន្ទទី២៥ ខែសីហា ឆ្នាំ២០២៥ ឯកឧត្តម ឧត្តមសេនីយ៍ទោ សុខ ប៉ាង មេបញ្ជាការ បញ្ជាការដ្ឋានការពារអាកាសកងទ័ពជើងគោក បានចាត់តាំងឲ្យក្រុមការងារដឹកនាំដោយឧត្តមសេនីយ៍ត្រី ហ្វីន សុខមេបញ្ជាការរង និងជានាយសេនាធិការ បញ្ជាការដ្ឋានការពារអាកាសកងទ័ពជើងគោក ចុះសួរសុខទុក្ខយោធិន កំពុងសម្រាកព្យាបាលសុខភាព នៅមន្ទីរពេទ្យរុស្ស៊ី ដោយនាំយកអំណោយជាថវិកា ចំនួន២,៥៧០,០០០រៀល ។
ក្នុងនោះ រួមមានថវិការបស់អង្គភាពចំនួន១,០០០,០០០រៀល ថវិកាផ្ទាល់ខ្លួនរបស់ឯកឧត្តម សុខ ប៉ាង និងលោកជំទាវចំនួន១,០០០,០០០រៀល និងថវិកាបងប្អូនក្រុមការងារចំនួន៦៥០,០០០រៀល ជូនលោកវរសេនីយ៍ត្រី ស្រី នី នាយទាហានការពារអាកាសចំណុះឲ្យកងពលធំលេខ៣ ឈរជើងនៅខ្សែត្រៀមជួរមុខទិសសមរភូមិភ្នំខ្មោច ខេត្តព្រះវិហារចំនួន២,០០០,០០០ រៀល និងជូនបងប្អូនប្រជាពលរដ្ឋកំពុងសម្រាកព្យាបាលនៅជិតនោះផងដែរ ថវិកាចំនួន៦៥០,០០០រៀល។
សូមបញ្ជាក់ជូនថា ដោយក្នុងអំឡុងពេលប្រយុទ្ធលោក វរសេនីយ៍ត្រី ស្រី នី បានត្រូវផ្សែងពលរបស់កងទ័ពឈ្លានពានថៃទម្លាក់តាមយន្តហោះ នៅតាមខ្សែត្រៀមប្រយុទ្ធជួរមុខធ្វើឱ្យប៉ះពាល់យ៉ាងធ្ងន់ធ្ងរដល់សុខភាពរបស់លោកដូចជារលាកស្បែកចុកទ្រូងខ្លាំង ប៉ះពាល់ដល់សួត និងតម្រងនោម លោកត្រូវបានមេបញ្ជាការបញ្ជូនមកសម្រាកព្យាបាលនៅមន្ទីរពេទ្យរបស់កងពលធំអន្តរាគមន៍លេខ៣ ក្រោយមកកូនប្រុសរបស់លោកដែលរស់នៅក្នុងជំរំគ្រួសារភាសសឹកក្នុងខេត្តព្រះវិហារ ដឹងថា ឪពុករបស់ខ្លួនមានជំងឺ ដោយត្រូវផ្សែងពលរបស់កងទ័ពថៃ ហើយត្រូវបានកំពុងសម្រាកព្យាបាលនៅក្នុងមន្ទីរពេទ្យរបស់កងពលធំអន្តរាគមន៍លេខ៣ កូនរបស់លោកក៏បានយកបាយសម្លរមកសួរសុខទុក្ខឪពុកដែលកំពុងសម្រាកព្យាបាលនៅពេទ្យ តែជាអកុសលកូនរបស់លោកពេលធ្វើដំណើរមកក៏បានជួបគ្រោះថ្នាក់ចរាចរណ៍ដោយចៃដន្យ ធ្វើឲ្យប៉ះពាល់យ៉ាងធ្ងន់ធ្ងរផុងលលាក្បាល ដោយស្ថានភាពរបួសធ្ងន់ធ្ងរពេកត្រូវបានក្រុមគ្រូពេទ្យរបស់រាជរដ្ឋាភិបាលប្រចាំការនៅជួរមុខបញ្ជូនមកវះកាត់ព្យាបាល នៅមន្ទីរពេទ្យរុស្ស៊ី រាជធានីភ្នំពេញ ។
លោក វរសេនីយ៍ត្រី ស្រី នី ក្នុងនាមជាឪពុកទោះរូបលោកមិនទាន់ជាក្ដី ក៏សម្រេចចិត្តសុំគ្រូពេទ្យចេញមកតាមមើលថែទាំកូននៅមន្ទីរពេទ្យរាជធានីភ្នំពេញ ដោយក្នុងរយៈពេលដែលលោកមកដល់រាជធានីភ្នំពេញនេះ ដោយស្ថានភាពជំងឺលោក ត្រូវផ្សែងពលកន្លងមកមិនទាន់បានជាសះស្បើយផងនោះ ក៏បានធ្វើទុករើឡើងវិញធ្វើឱ្យចុក និងប៉ះពាល់ខ្លាំងដល់ប្រព័ន្ធតម្រងនោម លោកត្រូវបានក្រុមគ្រូពេទ្យមន្ទីរពេទ្យរុស្សីពិនិត្យតាមដានស្ថានភាពជំងឺផ្សែងពលរបស់លោកឡើងវិញ ហើយត្រូវបានអនុញ្ញាតឱ្យសម្រាកព្យាបាលនៅមន្ទីរពេទ្យរុស្ស៊ីបន្តរហូតដល់ជា ដោយរាល់ការចំណាយព្យាបាលទាំងឪពុក និងកូនជាបន្ទុកឧបត្ថម្ភរបស់រាជរដ្ឋាភិបាលទាំងស្រុង ។
ថ្លែងក្នុងឱកាសនោះឧត្តមសេនីយ៍ត្រី ហ្វីន សុខ មានមតិសំណេះសំណាលដោយបានលើកឡើងការផ្ដាំផ្ញើសួរសុខទុក្ខពីឯកឧត្តម សុខ ប៉ាង មេបញ្ជាការ មេបញ្ជាការដ្ឋានការពារអាកាស កងទ័ពជើងគោក ជាពិសេសការយកចិត្តទុកដាក់របស់រាជរដ្ឋាភិបាលយើងចំពោះបងប្អូនវរ:កងទ័ពថា តែងតែបានខិតខំយកចិត្តទុកដាក់ទាំងស្មារតី និងសម្ភារៈជួយដល់កងកម្លាំងយើងជួបការលំបាក ទាំងកំឡុងពេលប្រយុទ្ធ ក្រោយប្រយុទ្ធ ដោយមិនបានធ្វេសប្រហែសទុកចោលឡើយ ។
ឯកឧត្តម បានសំដែងនូវការកោតសរសើរចំពោះគំរូវីរភាពរបស់លោកដែលបានលះបង់ដ៏អង់អាចក្លាហានជួយជាតិក្នុងរយៈពេលកន្លងមកនេះ ដោយមិនខ្លាចបាត់បង់អាយុជីវិត ដើម្បីបុព្វហេតុជាតិមាតុភូមិ ឯកឧត្តមបានផ្ដាំផ្ញើសូមឲ្យយកចិត្តទុកដាក់ថែទាំសុខភាព ប្រើប្រាស់ថ្នាំឲ្យទៀងទាត់ តាមវេជ្ជបញ្ជារបស់លោកគ្រូពេទ្យ ដើម្បីឆាប់បានជាសះស្បើយវិលត្រឡប់ទៅបម្រើការជូនជាតិមាតុភូមិយើងវិញ ។
លោក ស្រី នី និងក្រុមគ្រួសារបានថ្លែងអំណរគុណយ៉ាងជ្រាលជ្រៅបំផុតចំពោះ ឯកឧត្តម មេបញ្ជាការនិងលោកជំទាវ ព្រមទាំក្រុមការងារសប្បុរសជនទាំងអស់ សូមឱ្យមានសុខភាពល្អកម្លាំងខ្លាំងក្លាប្រាជ្ញាឈ្លាសវៃ និងជួបតែពុទ្ធពរទាំង៤ប្រការ គឺអាយុវណ្ណៈសុខៈពលៈកុំបីឃ្លៀងឃ្លាតឡើយ ៕
ចែករំលែកព័តមាននេះ