ស៊ីម៉ាក់ និងអង្គការបោសសម្អាតមីន និងអភិវឌ្ឍសហគមន៍ឯកភាពលើគម្រោង បោសសម្អាតមីនតោនតាមសហគមន៍
រាជធានីភ្នំពេញ ៖ ឯកឧត្តម ហេង រតនា ប្រតិភូរាជរដ្ឋាភិបាល ទទួលបន្ទុកជាអគ្គនាយកស៊ីម៉ាក់កម្ពុជាជាមួយលោក Takayama Ryori ប្រធានអង្គការបោសសម្អាតមីន…
រាជធានីភ្នំពេញ ៖ ឯកឧត្តម ហេង រតនា ប្រតិភូរាជរដ្ឋាភិបាល ទទួលបន្ទុកជាអគ្គនាយកស៊ីម៉ាក់កម្ពុជាជាមួយលោក Takayama Ryori ប្រធានអង្គការបោសសម្អាតមីន និងអភិវឌ្ឍសហគមន៍ (IMCCD) បានចុះហត្ថលេខាលើកិច្ចសហប្រតិបត្តិការជាដៃគូលើគម្រោង «បោសសម្អាតមីនតោនតាមសហគមន៍» ដើម្បីអនុវត្តការបោសសម្អាតគ្រាប់មីនប្រឆាំងយាន្តយន្ត នៅតំបន់ដែលមានតម្រូវការក្នុងការអភិវឌ្ឍ និងដើម្បីលើកកម្ពស់សកម្មភាពសេដ្ឋកិច្ចសង្គមឱ្យកាន់តែប្រសើរ ។
ឯកឧត្តម ហេង រតនា ក្នុងពិធីដែលបានចុះហត្ថលេខា នាព្រឹកថ្ងៃទី២៥ ខែសីហា ឆ្នាំ ២០២៥នៃកិច្ចសហការនេះ ត្រូវអនុវត្តគម្រោងបោសសម្អាតមីន ក្នុងខេត្តបាត់ដំបង និងខេត្តប៉ៃលិន ។ គម្រោងនេះនឹងផ្តើមចាប់អនុវត្ត ចាប់ពីថ្ងៃទី១៦ ខែសីហា ឆ្នាំ២០២៥ ដល់ថ្ងៃទី១៥ ខែសីហា ឆ្នាំ២០២៦ ។
គួរបញ្ជាក់ថា អង្គការបោសសម្អាតមីន និងអភិវឌ្ឍសហគមន៍ (IMCCD) បានចាប់ផ្ដើមកិច្ចប្រតិបត្តិការរបស់ខ្លួនជាមួយអង្គភាព CMAC តាំងពីឆ្នាំ២០១១មកម្លេះ គិតមកដល់ត្រឹមឆ្នាំ២០២៥នេះ គម្រោងនេះ មានរយៈពេល១៥ឆ្នាំហើយ ។ គម្រោង IMCCD នេះផ្ដោតសំខាន់លើការបោសសម្អាតគ្រាប់មីនប្រឆាំងមនុស្ស និងសំណល់យុទ្ធភណ្ឌ័មិនទាន់ផ្ទុះគ្រប់ប្រភេទ ជាពិសេសការបោសសម្អាតគ្រាប់មីនប្រឆាំងរថក្រោះ ។
តាមរយៈគម្រោង IMCCDនេះ បានចូលរួមចំណែកផ្តល់ជូនប្រជាពលរដ្ឋកាន់តែមានសុខសុវត្ថិភាពក្នុងការប្រើប្រាស់ដីធ្វើកសិកម្ម សង់លំនៅដ្ឋាន សាលារៀន និងមន្ទីរពេទ្យជាដើម ជាពិសេសការអភិវឌ្ឍហេដ្ឋារចនាសម្ព័ន្ធក្នុងសហគមន៍ក៏ដូចជា សង្គម ។
គួររំលឹកថា លោកTakayama Ryori ជាអតីតកងទ័ពជប៉ុន និងបានចូលរួមចំណែកក្នុងបេសសកម្ម UNTAC នៅកម្ពុជាក្នុងឆ្នាំ១៩៩៣ និងបានចូលរួមចំណែកក្នុងវិស័យសកម្មភាពកម្ចាត់មីន ជាង២៥ឆ្នាំមកហើយ ។ នៅដើមឆ្នាំ២០០០ លោកបានផ្តួចផ្តើមការដោះមីន នៅឃុំដែលមានគ្រាប់មីនច្រើន និងមនុស្សរស់នៅច្រើនដែរ គឺជ្រើសរើសយកឃុំតាសែន ស្រុកកំរៀង ខេត្តបាត់ដំបង ជាឃុំមានគ្រាប់មីនច្រើន និងស្ថិតជាប់ជាមួយព្រំដែនថៃ ។
លោកបានបោសសម្អាតគ្រាប់មីនផង ចលនាសប្បុរជនកសាងសាលារៀនផង និងជាពិសេសលោក Takayama បានចូលរួមកៀរគរអ្នកវិនិយោគជប៉ុន បានកសាងរោងចក្រខ្នាតមធ្យមចំនួន៥រោងចក្រ នៅតំបន់ដាច់ស្រយាល រហូតបានផលិតសុរាខ្មែរផលិតពីដំឡូង និងស្វាយកែវម្មៀត ទៅប្រឡងជាប់ថ្នាក់ស្រាល្អនៅប្រទេសបារាំងទៀតផង ។
ឯកឧត្តម ហេង រតនា បានបញ្ជាក់ដែរថា« ខ្ញុំមានក្តីសង្ឃឹមយ៉ាងមុតមាំថា ជាមួយគោលនយោបាយដែលរាជរដ្ឋាភិបាលទើបតែដាក់ចេញថ្មីៗនេះ ក្នុងការពង្រឹងកិច្ចសហការបោសសម្អាតគ្រាប់មីន នៅតំបន់ព្រំដែនកម្ពុជា-ថៃ ដោយផ្តល់អាទិភាពជាចំបងចំពោះទីតាំងណាដែលមានមនុស្សរស់នៅ និងប្រើប្រាស់ដីធ្លី ដើម្បីធានាសុខសុវត្ថិភាព និងផលប្រយោជន៍សេដ្ឋកិច្ចសង្គម ។ ដូចនេះឃុំតាសែន ស្រុកកំរៀង ដែលមានចម្ការមីនខ្លះជាប់ព្រំដែន អាចត្រូវបានបោសសម្អាតទាំងស្រុង» ៕
ចែករំលែកព័តមាននេះ