ខេត្តកំពង់ឆ្នាំង ៖ បើទោះបីជាមានការបង្ក្រាបមិនបន្ធូរដៃពីសំណាក់កម្លាំងយោធា និងមន្ត្រីជំនាញយ៉ាងណាក្តី ក៏បទល្មើសនេសាទខុសច្បាប់នៅតែបន្តកើតមានឡើងឥតឈប់ឈរនិងស្ទើរគ្រប់ទីកន្លែង ក្នុងភូមិសាស្ត្រខេត្តកំពង់ឆ្នាំង។ បទល្មើសទាំងនេះកើតឡើងចំពេលដែល ខែសីហា នេះជារដូវហាមឃាត់ការនេសាទដាច់ខាត ព្រោះជារដូវត្រីពងកូន។…
ខេត្តកំពង់ឆ្នាំង ៖ បើទោះបីជាមានការបង្ក្រាបមិនបន្ធូរដៃពីសំណាក់កម្លាំងយោធា និងមន្ត្រីជំនាញយ៉ាងណាក្តី ក៏បទល្មើសនេសាទខុសច្បាប់នៅតែបន្តកើតមានឡើងឥតឈប់ឈរនិងស្ទើរគ្រប់ទីកន្លែង ក្នុងភូមិសាស្ត្រខេត្តកំពង់ឆ្នាំង។ បទល្មើសទាំងនេះកើតឡើងចំពេលដែល ខែសីហា នេះជារដូវហាមឃាត់ការនេសាទដាច់ខាត ព្រោះជារដូវត្រីពងកូន។
កាលពីថ្ងៃទី ២៣ ខែសីហា ឆ្នាំ ២០២៥ នេះ ក្រុមអ្នក សារព័ត៌មានមួយក្រុមដែលចុះពិនិត្យស្ថានភាពជាក់ ស្តែង បានប្រទះឃើញ របាំងលបសាច់អួន សរុបជាង ៤០ កន្លែង នៅក្នុងភូមិសាស្ត្រស្រុកចំនួនពីរ គឺ ស្រុកកំពង់លែង និង ស្រុកជលគីរី។
របាំងលបសាច់អួនខុសច្បាប់ទាំងនោះមានប្រវែងចាប់ពី ២០០ ម៉ែត្រទៅ ៩០០ ម៉ែត្រ ដោយមានទំហំក្រឡាចាប់ ពី ២ ហ៊ុន ទៅ ២ ហ៊ុនកន្លះ ដែលជាឧបករណ៍នេសាទហាមឃាត់ក្នុងរដូវបិទនេសាទ។
ទីតាំងដែលរកឃើញបទល្មើសទាំង ៤០ របាំងនោះរួម មាន÷នៅស្រុកកំពង់លែងនៅចំណុចនគរទ្វីប មាន ៨ របាំង,ចំណុចសំរោងសែនមាន ១០ របាំង និងនៅស្រុកជលគីរីក្នុងឃុំពាមឆ្កោកស្ថិតចំណុចខាងលិចភូមិក្បាល កន្លង់មាន ៨ របាំង,ចំណុចខាងកើតភូមិក្បាលកន្លង់មាន១០ របាំង,ចំណុចកប់ចេះមាន ៦ របាំង។
នៅក្នុងចំណោមរបាំងទាំងអស់ គេក៏បានរកឃើញរបាំង ១ខ្សែដែលមានប្រវែងវែងជាងគេបំផុតគឺជិត១.០០០ ម៉ែត្រ (១គីឡូម៉ែត្រ) ដែលមាន ឡុកចំនួន ៦ (១ ឡុក មានលបពី ១ ដល់ ៣)។ របាំងខ្នាតធំនេះ ត្រូវបានគេអះអាងថាមានម្ចាស់ឈ្មោះ បូរ៉ា រស់នៅឃុំសំរោងសែន។
ក្រោយពីក្រុមអ្នកសារព័ត៌មានបានរាយការណ៍អំពីបទ ល្មើសទាំងនេះទៅកាន់មន្ត្រីជំនាញ, មន្ត្រីជំនាញបានបញ្ជាក់ថា នឹងចុះបង្ក្រាបឱ្យអស់ភ្លាមៗ។
ទោះជាយ៉ាងណាក៏ដោយ មន្ត្រីជំនាញក៏បានលើកឡើងថា ការដាក់របាំងទាំងនេះ តាមពិតគឺ “ពួកគាត់ដាក់ម្នាក់បន្តិចៗ ប៉ុន្តែពេលដាក់តៗគ្នា ទើបឃើញប្រវែងវែងបែប នេះ”។
ក្រុមអ្នកសារព័ត៌មាននិងប្រជាពលរដ្ឋបានសង្កេតឃើញ ថា បទល្មើសនេសាទនៅចំណុចខាងលើនេះ ក្រោយពីមានការបង្ក្រាបរបស់មន្ត្រីជំនាញ និងកម្លាំងយោធាម្តងៗ ជនល្មើសបានលួចចូលដាក់វិញជាដដែលហាក់បីដូចជាវែកចក ដោយមិនមានការកោតខ្លាចច្បាប់ និងទោស ទណ្ឌអ្វីឡើយ។
ប្រជាពលរដ្ឋដែលជាអ្នកនេសាទធម្មតាបានសម្តែងការព្រួយបារម្ភ និងបានសំណូមពរដល់សមត្ថកិច្ច ក៏ដូចជាអាជ្ញាធរពាក់ព័ន្ធទាំងអស់ ត្រូវតែ ពង្រឹងយន្តការច្បាប់ស្តីពីជលផល ឱ្យបានច្បាស់លាស់ ដោយមិនត្រូវអនុញ្ញាតឱ្យក្រុមឈ្មួញដែលជំនាញប្រព្រឹត្តបទល្មើសទាំងនេះ បន្តធ្វើសកម្មភាពនៅដដែលៗដោយមិនចេះរាងចាលទៀតនោះទេ។
តើលោកអ្នកយល់ថា អាជ្ញាធរគួរចាត់វិធានការបែបណាទៀតដើម្បីទប់ស្កាត់បទល្មើសនេសាទខុសច្បាប់ដែលកើតឡើងដដែលៗក្នុងរដូវបិទនេសាទនេះ?
ព័ត៌មានលម្អិតនឹងមានផ្សាយនៅលើទំព័រកាសែតកោះសន្តិភាព ៕
ចែករំលែកព័តមាននេះ