ខេត្តតាកែវ ៖ ជនសង្ស័យជាមុខសញ្ញាលួចម្នាក់កាលពីថ្ងៃទី២៣ ខែសីហា ឆ្នាំ២០២៥ ត្រូវបានកម្លាំងសមត្ថកិច្ចនគរបាលមូលដ្ឋានប៉ុស្តិ៍រការក្រៅ ក្រុងដូនកែវ ខេត្តតាកែវ ធ្វើការឃាត់ខ្លួន បន្ទាប់ពីរូបគេធ្វើសកម្មភាពលួចមេគោមួយក្បាលយកទៅលក់ឲ្យកុងស៊ីកាប់គោ…
ខេត្តតាកែវ ៖ ជនសង្ស័យជាមុខសញ្ញាលួចម្នាក់កាលពីថ្ងៃទី២៣ ខែសីហា ឆ្នាំ២០២៥ ត្រូវបានកម្លាំងសមត្ថកិច្ចនគរបាលមូលដ្ឋានប៉ុស្តិ៍រការក្រៅ ក្រុងដូនកែវ ខេត្តតាកែវ ធ្វើការឃាត់ខ្លួន បន្ទាប់ពីរូបគេធ្វើសកម្មភាពលួចមេគោមួយក្បាលយកទៅលក់ឲ្យកុងស៊ីកាប់គោ តែគេមិនទិញ ហើយក៏ដឹកយកទៅចងទុកចោលនៅផ្ទះតាម៉ុក ទើបត្រូវចាប់ខ្លួន ។
តាមសេចក្តីរាយការណ៍ឲ្យដឹងថា កាលពីវេលាម៉ោង១រសៀលថ្ងៃទី២៣ ខែសីហា ឆ្នាំ២០២៥ មានករណីអំពើលួចគោមួយក្បាល នៅចំណុចវាលស្រែ ខាងជើងវត្តស្វាយអំពារ ស្ថិតក្នុងភូមិស្វាយអំពារ ឃុំស្រង៉ែ ស្រុកទ្រាំង ខេត្តតាកែវ ជារបស់ជនរងគ្រោះឈ្មោះអ៊ុ អូន ហៅស៊ាម ភេទប្រុស អាយុ៥០ឆ្នាំ មុខរបរជាកសិករ ។
មុនពេលកើតហេតុ ជនរងគ្រោះបានយកគោចំនួនបួនក្បាល ទៅចងឱ្យស៊ីស្មៅនៅចំណុចខាងលើ ស្រាប់តែជនសង្ស័យឈ្មោះ ង៉ែត សុភារិទ្ធ ហៅរិទ្ធ ភេទប្រុស អាយុ១៨ឆ្នាំ រស់នៅភូមិជិតខាងគ្នា បានទៅលួចដឹកគោមេមួយក្បាលពណ៌ស យកទៅលក់ឱ្យឈ្មោះ យ៉េប ម៉ាន ភេទប្រុស អាយុ៣២ឆ្នាំ រស់នៅភូមិធ្នុង សង្កាត់រកាក្រៅ មុខរបរអាជីវកម្មកាប់គោ តែគេមិនទិញ ។
បន្ទាប់ពីលួចមេគោយកទៅលក់ឲ្យកុងស៊ីគេមិនទិញ ជនសង្ស័យបានដឹកគោមេនោះយកទៅចងចោលនៅផ្ទះតាម៉ុក រួចក៏ដើរត្រឡប់ទៅផ្ទះវិញធ្វើដូចអត់មានរឿងអីអញ្ចឹង។ ដោយមានការសង្ស័យ សមត្ថកិច្ចប៉ុស្ដិ៍នគរបាលរដ្ឋបាលសង្កាត់រកាក្រៅ បានហៅជនសង្ស័យដើម្បីសួរនាំ តែជនសង្ស័យបានរត់គេចខ្លួនរហូតទៅដល់វត្តតុំ ភូមិតុំ សង្កាត់រកាក្រៅ ខណ្ឌដូនកែវ ខេត្តតាកែវ ទើបឃាត់ខ្លួនបាន។
លុះពេលឃាត់ខ្លួនជនសង្ស័យបានសារភាពថា ខ្លួនពិតជាបានលួចគោមេមួយក្បាល យកទៅលក់ឲ្យកុងស៊ីកាប់គោនោះប្រាកដមែន តែគេមិនទិញក៏យកទៅចងទុកនៅផ្ទះតាម៉ុក ហើយត្រូវសមត្ថកិច្ចចាប់ខ្លួនតែម្តង ។
ក្រោយឃាត់ខ្លួន ជនសង្ស័យត្រូវបានសមត្ថកិច្ចកសាងសំណុំរឿងតាមនីតិវិធី ចំណែក
មេគោមួយក្បាលនោះបានប្រគល់ឲ្យទៅម្ចាស់វិញ៕
ចែករំលែកព័តមាននេះ