រាជធានីភ្នំពេញ ៖ លោកឧត្តមសេនីយ៍ឯក រ័ត្ន ស្រ៊ាង មេបញ្ជាការរងកងរាជអាវុធហត្ថលើផ្ទៃប្រទេស និងជាមេបញ្ជាការកងរាជអាវុធហត្ថរាជធានីភ្នំពេញ បានបង្ហោះសារដាស់តឿនមួយគួរឲ្យចាប់អារម្មណ៍បំផុត នៅក្នុងផេកផ្ទាល់ខ្លួនរបស់លោក នៅថ្ងៃ២៣…
រាជធានីភ្នំពេញ ៖ លោកឧត្តមសេនីយ៍ឯក រ័ត្ន ស្រ៊ាង មេបញ្ជាការរងកងរាជអាវុធហត្ថលើផ្ទៃប្រទេស និងជាមេបញ្ជាការកងរាជអាវុធហត្ថរាជធានីភ្នំពេញ បានបង្ហោះសារដាស់តឿនមួយគួរឲ្យចាប់អារម្មណ៍បំផុត នៅក្នុងផេកផ្ទាល់ខ្លួនរបស់លោក នៅថ្ងៃ២៣ ខែសីហា ឆ្នាំ២០២៥ ។
រឿងថ្មីនៃមេរៀនចាស់
មេរៀនចាស់ដដែលៗ ដែលឧស្សាហ៍កើតមានក្នុងសង្គមហ្វេសបុ៊កនាពេលបច្ចុប្បន្ន គឺមានបុគ្គលទុច្ចរិចមួយចំនួន បានយករូបភាពអ្នកដទៃដែលស្អាតសង្ហា មកបង្កើតជាគណនីហ្វេសបុ៊កក្លែងបន្លំមួយ ហើយឆាតទំនាក់ទំនងជាមួយមនុស្សស្រីជាច្រើនគ្នា ។ ពេលមានអ្នកឆ្លើយឆ្លង ក៏ចាប់ផ្តើមទំនាក់ទំនងស្នេហាផ្អែមល្ហែមហៅគ្នាប្រពន្ធសម្លាញ់ ប្តីសម្លាញ់ពេញៗមាត់ និងពេលខ្លះសុំជួបក្រុមគ្រួសារ ដោយសន្យាចូលស្តីដណ្តឹងតាមច្បាប់ និងពេលខ្លះបានកំណត់ថ្ងៃភ្ជាប់ពាក្យផងដែរ ។ បន្ទាប់ពីនារីរងគ្រោះជឿលង់ស៊ប់ហើយ ជនសង្ស័យក៏ចាប់ផ្តើមបោកបញ្ឆោតល្បួងឲ្យថតរូបអាក្រាត បង្ហាញដល់ជនសង្ស័យ ដោយសំអាងថា គង់នឹងក្លាយជាប្តីប្រពន្ធជាមួយគ្នាឆាប់ៗ ធ្វើឲ្យជនរងគ្រោះភ្លេចគិត ដ្បិតយល់ថាស្និទ្ធស្នាលខ្លាំង ផ្អែមល្ហែមខ្លាំង ធ្វើឲ្យស្រឡាញ់ខ្លាំង ក៏ព្រមបើកបង្ហាញ ។
ក្រោយពីមានរូបអាក្រាតជនរងគ្រោះ ជនសង្ស័យក៏ចាប់ផ្តើមប្រើល្បិចសុំខ្ចីលុយដោយប្រាប់ថា ខ្លួនមានបញ្ហាក្នុងមុខរបរ ឬមានបញ្ហាគ្រោះថ្នាក់ចរាចរណ៍ ឬមានបញ្ហាខុសច្បាប់ផ្សេងៗ រហូតជនរងគ្រោះអស់លុយឲ្យខ្ចី ឬដឹងខ្លួនមិនព្រមឲ្យលុយទៅជនសង្ស័យខ្ចី ទើបជនសង្ស័យយករូបអាក្រាតមកគំរាមទារប្រាក់តែម្តង ។
ស្តាប់ទៅហាក់ដូចថា ជនរងគ្រោះឆោតល្ងង់ តែជាក់ស្តែងមនុស្សយើងពេលលង់លើអ្វីមួយហើយ គឺតែងទុកចិត្តភ្លេចគិតពិចារណា មិនថាយើងមិនថាគេ ព្រោះករណីទាំងនេះ អាវុធហត្ថរាជធានីភ្នំពេញធ្លាប់បានទទួលបណ្តឹង ធ្វើការបង្ក្រាប និងបានផ្សព្វផ្សាយជាច្រើនមកហើយ ដោយមានអ្នកខ្លះរងគ្រោះអស់ខ្ទង់ពាន់ដុល្លារ អ្នកខ្លះអស់ខ្ទង់ម៉ឺនដុល្លារ និងមានអ្នកអស់ដល់ខ្ទង់សែនដុល្លារផងដែរ ។
រឿងថ្មី គឺនៅថ្ងៃទី១៨ ខែសីហា ឆ្នាំ២០២៥ អាវុធហត្ថរាជធានីភ្នំពេញ បានទទួលបណ្ដឹងពីនារីម្នាក់ ប្ដឹងចោទប្រកាន់ទៅលើម្ចាស់គណនីហ្វេសបុ៊កមួយឈ្មោះ ចាន់ ពិសិដ្ឋ ពីបទគំរាមកំហែងដោយមានបញ្ជាឱ្យបំពេញលក្ខខណ្ឌអ្វីមួយ ។ នារីរងគ្រោះបានរៀបរាប់ថា គណនីហ្វេសបុ៊កខាងលើ បានទំនាក់ទំនងមកសុំស្នេហ៍ខ្លួន ដោយប្រើពាក្យសម្ដីផ្អែមល្ហែម លួងលោមរហូតខ្លួនលង់ចិត្តស្រឡាញ់ ហ៊ាន Call Live Video Facebook អាក្រាតកាយឲ្យជនសង្ស័យមើល តែមិននឹកស្មានថា ជនសង្ស័យបានលួចថតចម្លងវីដេអូនោះទុក ។
បន្ទាប់មក នៅថ្ងៃទី១៧ ខែសីហា ឆ្នាំ២០២៥ ជនសង្ស័យបានភូតកុហកថា រថយន្តរបស់គេដឹកឈើត្រូវបានសមត្ថកិច្ចខេត្តរតនគិរីឃាត់ទុក ហើយបើសិនចង់ដោះស្រាយត្រូវមានលុយ ១៥ ០០០ដុល្លារ តែគេថា គេមានលុយនៅនឹងខ្លួនចំនួនតែ ១០ ០០០ដុល្លារ ខ្វះ៥ ០០០ដុល្លារទៀត ចង់ខ្ចីពីខ្លួន ដើម្បីយកទៅលោះរថយន្តមកវិញ ។ ពេលសុំខ្ចីមិនបាន ស្រាប់តែជនសង្ស័យគំរាមថា គេមានវីដេអូអាក្រាតរបស់ខ្លួន បើសិនជាមិនព្រមប្រគល់លុយតាមលក្ខខណ្ឌរបស់គេទេ គេនឹងយកវីដេអូអាក្រាតនោះទៅបង្ហោះចែកចាយជាសាធារណៈមិនខាន។
ដោយមានការភ័យខ្លាច ខ្លួនក៏បានសុំចរចា រហូតដល់ត្រូវគ្នាចំនួន ១ ០០០ដុល្លារ ដោយជនសង្ស័យឱ្យផ្ញើតាមទ្រូម៉ានី ។ បន្ទាប់ពីផ្ញើលុយរួច ជនសង្ស័យនៅតែបន្តគំរាម ឲ្យផ្ញើថែមចំនួន ១ ០០០ដុល្លារទៀត ទើបនាងមកដាក់ពាក្យបណ្ដឹងនៅអាវុធហត្ថរាជធានីភ្នំពេញតែម្ដង ។ក្រោយពីទទួលបានបណ្ដឹង កម្លាំងការិយាល័យប្រឆាំងការជួញដូរមនុស្ស នៃកងរាជអាវុធហត្ថរាជធានីភ្នំពេញ បានប្រើវិធានការស្រាវជ្រាវយ៉ាងយកចិត្តទុកដាក់ រហូតរកឃើញថា ជនសង្ស័យដែលធ្វើសកម្មភាពបោកបញ្ឆោត និងគំរាមកំហែងជនរងគ្រោះ មានតម្រុយចេញពីទីតាំងខេត្តស្ទឹងត្រែង ។ ដូច្នេះកម្លាំងកងរាជអាវុធហត្ថរាជធានីភ្នំពេញ បានពន្លាតដែនសមត្ថកិច្ច ទៅសហការជាមួយកម្លាំងអាវុធហត្ថខេត្តស្ទឹងត្រែង ស្រាវជ្រាវស្វែងរកឃើញបក្ខពួករបស់ជនសង្ស័យ ដែលទៅដកប្រាក់មានចំនួន៣នាក់ រួមមាន ៖
១-ឈ្មោះ ម៉ាត់ ស្លាម៉ាស់ ភេទស្រី អាយុ៤១ឆ្នាំ ។
២-ឈ្មោះ ឡេន ធីដា ភេទស្រី អាយុ៤២ឆ្នាំ ។
៣-ឈ្មោះ ស៊ី វីឡែន ភេទប្រុស អាយុ១៨ឆ្នាំ ។
បន្ទាប់ពីសួរចម្លើយ បក្ខពួកជនសង្ស័យទាំង៣នាក់នេះរួចមក សមត្ថកិច្ចអាវុធហត្ថបានរកឃើញជនសង្ស័យ និងអ្នកជាប់ពាក់ព័ន្ធសរុប៣នាក់ទៀត គួរឲ្យភ្ញាក់ផ្អើលបំផុត ដែលសុទ្ធតែជាទណ្ឌិត កំពុងអនុវត្តទោសក្នុងពន្ធនាគារខេត្តស្ទឹងត្រែងនោះគឺ ៖
១-ទណ្ឌិតឈ្មោះ ជាង ខេងលី មានទោសជាប់គុក៣ឆ្នាំ ពីបទចែកចាយនិងប្រើប្រាស់សារធាតុញៀន (អ្នកបង្កើតគណនីក្លែងបន្លំ និងជាអ្នកទំនាក់ទំនងលួងលោមបោកបញ្ឆោតគំរាមទារប្រាក់ជនរងគ្រោះផ្ទាល់) ។
២-ទណ្ឌិតឈ្មោះ ស្រេន ឡាង មានទោសជាប់គុក១៣ឆ្នាំ ពីបទលួចមានស្ថានទម្ងន់ទោស និងសមគំនិតក្នុងអំពើឃាតកម្ម(ជាប្តីរបស់ឈ្មោះ ម៉ាត់ ស្លាម៉ាស់ និងជាអ្នកផ្តល់ទូរស័ព្ទឲ្យ ជាង ខេងលី យកទៅធ្វើសកម្មភាព) ។
៣-ទណ្ឌិតឈ្មោះ ហេង សៀវត្រា មានទោសជាប់គុក៣ឆ្នាំ ពីបទចែកចាយ និងប្រើប្រាស់សារធាតុញៀន (ជាអ្នកជួយលាក់ទូរស័ព្ទ លាក់ស៊ីម ក្នុងពន្ធនាគារទុកឲ្យ ជាង ខេងលី យកទៅធ្វើសកម្មភាព) ។
បច្ចប្បន្នជនសង្ស័យនិងបក្ខពួក កំពុងត្រូវបានអយ្យការអមសាលាដំបូងខេត្តស្ទឹងត្រែង បន្តនីតិវិធី ។សង្ឃឹមថា រឿងថ្មីនៃមេរៀនចាស់នេះ នឹងក្លាយជាបទពិសោធបន្ថែមដល់មហាជនឲ្យកាន់តែប្រុងប្រយ័ត្នជាងមុនផងចុះ ៕
ចែករំលែកព័តមាននេះ