ទីក្រុងហាណូយ៖ ស្ងាត់ៗ វៀតណាមសម្ងំសាងសង់កោះសិប្បនិម្មិតនៅសមុទ្រចិនខាងត្បូងកាន់តែច្រើនឡើងៗសឹងតែស្មើនឹងប្រទេសចិនបាត់ទៅហើយ ហើយទៅអនាគតអ្នកវិភាគស្ថានការណ៍ភូមិសាស្ត្រយល់ថាវៀតណាមអាចនឹងសាងសង់លើសប្រទេសចិនទៅទៀត។ ទីកន្លែងសាងសង់កោះសិប្បនិម្មិតទាំងនោះស្ថិតនៅលើប្រជុំកោះស្ព្រែតលី (Spratly Islands) ដែលកំពុងប្រទាញប្រទង់គ្នារវាងប្រទេសចិន និងបណ្ដាប្រទេសមួយចំនួននៅភូមិភាគអាស៊ីអាគ្នេយ៍។ ខាងលើនេះជាការប្រមើលមើលរបស់ក្រុមអ្នកវិភាគអាមេរិក។
តាមរយៈរូបថតពីផ្កាយរណប គេឃើញថាចាប់តាំងពីដើមឆ្នាំ២០២៥រហូតមកដល់ពេលនេះវៀតណាមពង្រីកការសាងសង់កោះសិប្បនិម្មិតបានចំនួន៨ហើយ។ នេះបើយោងតាម «មជ្ឈមណ្ឌលសិក្សាអំពីយុទ្ធសាស្ត្រ និងកិច្ចការអន្តរជាតិ» នៅទីក្រុងវ៉ាស៊ីនតោន។ រូបភាពពីផ្កាយរណបបង្ហាញថាវៀតណាមបានចាក់ដីបំពេញដើម្បីបង្កើតកោះសិប្បនិម្មិតនៅតំបន់ថ្មប៉ប្រះទឹកអាលីសុន (Alison Reef), ថ្មប៉ប្រះទឹកខូលីន (Collins Reef), ថ្មប៉ប្រះទឹកឡេនដោន (Landsdowne Reef) និងថ្មប៉ប្រះទឹកភីតលី (Petley Reefs)។
កាលពី៤ឆ្នាំមុន តំបន់ទាំងនោះមួយភាគធំគ្រាន់តែជាប៉ុស្តិ៍យាមតូចៗដែលនៅដាច់ឆ្ងាយៗពីគ្នាតែប៉ុណ្ណោះ។ របាយការណ៍របស់មជ្ឈមណ្ឌលខាងលើនេះថ្លែងបន្តទៀតថាការពង្រីកទឹកដីថ្មីៗនេះក៏កើតឡើងនៅលើទីតាំងបីកន្លែងដែលមានកោះសិប្បនិម្មិតខ្នាតមធ្យមតាំងនៅផងដែរ។ នោះគឺអាំបូយ៉ាណា កៃ (Amboyna Cay), ថ្មប៉ប្រះទឹកក្រៀសុន (Grierson Reef) និងថ្មប៉ប្រះទឹកខាងលិច (West Reef)។
គិតត្រឹមខែខែមីនា ឆ្នាំ២០២៥ បើប្រៀបធៀបគ្នារវាងចិន និងវៀតណាមខាងបរិមាណកោះសិប្បនិម្មិតប្រជុំកោះស្ព្រែតលីឃើញថាវៀតណាមមានចំណែក៧០%នៃចិន។ របាយការណ៍ខាងលើយល់ថាវៀតណាមនឹងចាក់ដីបំពេញបន្ថែមដើម្បីសាងសង់កោះសិប្បនិម្មិតចំនួន៨ទៀត។ ដូច្នេះអាចស្មើនឹងចិនបាត់ទៅហើយ ហើយទៅថ្ងៃមុខ បើនៅតែបន្តសាងសង់បែបនេះទៀតអាចនឹងធ្វើឱ្យវៀតណាមមានកោះសិប្បនិម្មិតច្រើនជាងប្រទេសចិន។
របាយការណ៍របស់ក្រុមអ្នកស្រាវជ្រាវអាមេរិកាំងនោះសរសេររៀបរាប់ថាហេដ្ឋារចនាសម្ព័ន្ធនានារួមទាំងឃ្លាំងស្តុកទុកអាវុធយុទ្ធភ័ណ្ឌផងដែរចាប់ផ្ដើមលេចចេញរូបរាងជាបណ្ដើរៗនៅលើតំបន់ថ្មប៉ប្រះទឹកដែលវៀតណាមចាត់ទុកជាទឹកដីរបស់ខ្លួន។ នៅទីនោះការបូមដីចាក់បំពេញជិតចប់សព្វគ្រប់ហើយ ឧទាហរណ៍ដូចជាថ្មប៉ប្រះទឹកបាក កាណាដា (Barque Canada), ថ្មប៉ប្រះទឹកឌីសស្កាវើរី ហ្គ្រេត (Discovery Great Reef), ថ្មប៉ប្រះទឹកឡាត់ (Ladd reef), ណាម្យីត អាយលេន (Namyit Island), ថ្មប៉ប្រះទឹកភៀសុន (Pearson Reef), សេនកាយ (Sand Cay) និងថ្មប៉ប្រះទឹកថេនណឹន (Tennent Reef)។
របាយការណ៍នោះសរសេររៀបរាប់បន្តទៀតមិនយូរទេ ក្រោយពេលសាងសង់កោះសិប្បនិម្មិត និងឃ្លាំងស្តុកទុកអាវុធយុទ្ធភ័ណ្ឌរួចហើយ វៀតណាមអាចនឹងសាងសង់ផ្លូវយន្តហោះជាបន្តទៀត។ កាលពីខែកុម្ភៈ ឆ្នាំនេះ ប្រទេសចិនប្រកាសថាខ្លួនសូមប្រឆាំងជំទាស់នឹងសកម្មភាពសាងសង់នៅតំបន់ថ្មប៉ប្រះទឹកបាក កាណាដា (Barque Canada Reef)។ ចិនចាត់ទុកថាតំបន់នោះជាទឹកដីរបស់ខ្លួន។ នេះបើតាមការដកស្រង់ប្រភពពីទីភ្នាក់ងារព័ត៌មានរ៉យទ័រ និងប្រភពដទៃទៀត៕
ចែករំលែកព័តមាននេះ