ខេត្តពោធិ៍សាត់ ៖ ព្រះសង្ឃមួយអង្គ ក្នុងចំណោម០៤អង្គ ដែលគង់នៅក្នុងកុដិជាមួយគ្នា បានសុគតយ៉ាងអណោចអធមក្នុងភ្នក់ភ្លើង ដោយសារអគ្គិភ័យឆេះ កាលពីវេលាម៉ោង១០និង៥០នាទីព្រឹកថ្ងៃទី២៣ ខែសីហា ឆ្នាំ២០២៥…
ខេត្តពោធិ៍សាត់ ៖ ព្រះសង្ឃមួយអង្គ ក្នុងចំណោម០៤អង្គ ដែលគង់នៅក្នុងកុដិជាមួយគ្នា បានសុគតយ៉ាងអណោចអធមក្នុងភ្នក់ភ្លើង ដោយសារអគ្គិភ័យឆេះ កាលពីវេលាម៉ោង១០និង៥០នាទីព្រឹកថ្ងៃទី២៣ ខែសីហា ឆ្នាំ២០២៥ នៅវត្តពោធិ៍សុទស្សន៍ ស្ថិតក្នុងភូមិស្វាយអាត់ សង្កាត់ស្វាយអាត់ ក្រុងពោធិ៍សាត់ ។
បើតាមសាមណេរ ផល សុខចំរើន មានសង្ឃដីកាឲ្យដឹងថា ព្រះសង្ឃរងគ្រោះព្រះនាម សាន់ សុខខេង មានជន្មាយុ១៩ព្រះវស្សា។ នៅព្រឹកនោះ រូបព្រះអង្គ និងសាមណេរពីរអង្គទៀត កំពុងនៅលើកុដិក្នុងបន្ទប់ជាមួយគ្នា ហើយព្រះសង្ឃរងគ្រោះ នៅបន្ទប់ផ្សេង។ នៅពេលព្រះអង្គនិមន្តចុះទៅដោះទឹកសត្វ ស្រាប់តែឃើញភ្លើងឆេះពីលើដំបូលមុន ក៏ទៅប្រាប់សាមណេរទាំងពីរអង្គ។ ពេលនោះ សាមណេរទាំងពីរអង្គ បានស្ទុះទៅគោះទ្វារបន្ទប់ ដែលសាមណេរ សាន់ សុខខេង (ព្រះសង្ឃរងគ្រោះ) គង់នៅ។ សាន់ សុខខេង ទំនងជាភ័យស្លន់ស្លោខ្លាំង ទើបរកកន្លែងបើកគន្លឹះទ្វារមិនចេញ ឆោឡោពេញក្នុងបន្ទប់ រហូតភ្លើងឆាបឆេះកាន់តែសន្ធោសន្ធៅឡើង លេបត្របាក់កុដិទាំងមូល បណ្ដាលឲ្យសុគតក្នុងភ្នក់ភ្លើងតែម្ដង ។
ព្រះអង្គ ឲ្យដឹងថា ក្នុងកុដិនោះ ផ្ទុកសុទ្ធតែស្បង់ចីវរចាស់ៗ គ្រែ ពួក ខ្នើយ សម្រាប់ព្រះសង្ឃសឹង ទើបធ្វើឲ្យអគ្គិភ័យឆេះលឿនបំផុត ។
សមត្ថកិច្ចឲ្យដឹងថា ក្នុងហេតុការណ៍គ្រោះអគ្គិភ័យឆេះកុដិ នៅវត្តពោធិ៍សុទស្សន៍នេះ ប្រើប្រាស់ទឹកពន្លត់អគ្គិភ័យ របស់ស្នងការដ្ឋាននគរបាលខេត្តពោធិ៍សាត់ អស់ចំនួនពីររថយន្ដ ហើយបានធ្វើការសន្និដ្ឋានជំហានដំបូងថា ករណីនេះបណ្ដាលមកពីទុស្សេខ្សែភ្លើង ។
សម្ភារៈខូចខាតរួមមាន កុដិមួយខ្នង ទំហំ៥ម៉ែត្រ គុណនឹង៦ម៉ែត្រ ធ្វើអំពីឈើប្របក់ក្បឿង សរសរបេតុង និងសម្ភារៈដែលមានក្នុងកុដិ ត្រូវខូចខាតទាំងស្រុង៕
ចែករំលែកព័តមាននេះ