ទីក្រុងម៉ូស្គូ៖ លោកពូទីនត្រៀមខ្លួនជួបគ្នាកម្រិតកំពូលជាមួយប្រមុខដឹកនាំអ៊ុយក្រែន លោកហ្សេឡិនស្គី ជានិច្ច។ សំខាន់ត្រូវតែដោះស្រាយបញ្ហាទាំងអស់ជាមុនសិន ហើយម៉្យាងទៀតរុស្ស៊ីដាក់ជាសំណួរថាតើលោកហ្សេឡិនស្គីមានសិទ្ធិស្របច្បាប់ដើម្បីចុះហត្ថលេខាលើកិច្ចព្រមព្រៀងសន្តិភាពដែរឬទេ។ ខាងលើនេះជាការថ្លែងរបស់រដ្ឋមន្ត្រីការបរទេសរុស្ស៊ី លោកឡាវរ៉ូស (Lavrov)។
លោកពូទីន និងលោកត្រាំបានជួបគ្នាកាលពីថ្ងៃសុក្រសប្ដាហ៍មុននៅអាឡាស់ស្កាដើម្បីរកវិធីបញ្ចប់សង្គ្រាម។ ក្រោយជំនួបកំពូលនោះ ថ្នាក់ដឹកនាំអឺរ៉ុបបានរួមដំណើរជាមួយលោកហ្សេឡិនស្គីទៅជួបលោកត្រាំនៅវ៉ាស៊ីនតោនដើម្បីចង់ដឹងអំពីលទ្ធផលនៃកិច្ចជំនួប។ កំពុងនិយាយគ្នាសុខៗ លោកត្រាំ និងលោកពូទីនក៏សន្ទនាគ្នាតាមទូរស័ព្ទ។ លោកពូទីនសន្យាថានឹងជួបគ្នាកម្រិតកំពូលជាមួយលោកហ្សេឡិនស្គីនាពេលឆាប់ៗនេះ។
ចំពោះសំណួរថាតើលោកពូទីនត្រៀមចិត្តត្រៀមកាយដើម្បីជួបលោកហ្សេឡិនស្គីដែរឬទេ? លោកឡាវរ៉ូសឆ្លើយតបថាលោកពូទីនធ្លាប់បានបញ្ជាក់ជាច្រើនដងហើយថាលោកត្រៀមខ្លួនជួបប្រធានាធិបតីអ៊ុយក្រែនជានិច្ចរួមទាំងលោកហ្សេឡិនស្គីផងដែរ។ ប៉ុន្តែលោកឡាវរ៉ូសឆ្លៀតនិយាយអំពីលក្ខន្តិកៈមួយ។ នោះគឺការដោះស្រាយបញ្ហាទាំងអស់កម្រិតខ្ពស់បំផុត ហើយអ្នកជំនាញ និងរដ្ឋមន្ត្រីត្រៀមអនុវត្តទៅតាមអនុសាសន៍ដ៏សមស្រប។
គួរកត់សម្គាល់ថាកាលពីពេលកន្លងមក លោកពូទីនឧស្សាហ៍ដាក់ជាសំណួរដដែលៗថាតើលោហ្សេឡិនស្គីកាន់អំណាចសព្វថ្ងៃនេះស្របច្បាប់ដែរឬទេ? គាត់ត្រូវចប់អាណត្តិតាំងពីខែឧសភា ឆ្នាំ២០២៤ ហើយត្រូវរៀបចំការបោះឆ្នោតឡើងវិញ។ ប៉ុន្តែជាក់ស្ដែង លោកហ្សេឡិនស្គីប្រកាសដាក់ប្រទេសជាតិនៅក្នុងស្ថានភាពអាសន្ន និងប្រកាសច្បាប់អាជ្ញាសឹករហូតដល់សព្វថ្ងៃ។ រដ្ឋាភិបាលទីក្រុងកៀវអះអាងថាលោកហ្សេឡិនស្គីជាមេដឹកនាំស្របច្បាប់។ អឺរ៉ុបក៏អះអាងដូច្នេះដែរ។
មន្ត្រីរដ្ឋាភិបាលរុស្ស៊ីបារម្ភថាកិច្ចព្រមព្រៀងដែលចុះហត្ថលេខាដោយលោកហ្សេឡិនស្គីអាចនឹងគ្មានតម្លៃ។ ឧបមាថាលោកហ្សេឡិនស្គីចុះហត្ថលេខាលើកិច្ចព្រមព្រៀងសន្តិភាពរុស្ស៊ី-អ៊ុយក្រែន ស្រាប់តែមេដឹកនាំអ៊ុយក្រែនជំនាន់ក្រោយៗទៀតប្រកាសឈប់ទទួលស្គាល់កិច្ចព្រមព្រៀងនោះវិញដោយលើកហេតុផលថាអាណត្តិដឹកនាំរបស់លោកហ្សេឡិនស្គីបានផុតសុពលភាពតាំងពីមុនចុះហត្ថលេខានោះទៅទៀត។
លោកហ្សេឡិនស្គីចង់ឃើញទីក្រុងវ៉ាស៊ីនតោនបញ្ចេញប្រតិកម្មឱ្យបានខ្លាំងក្លាបើលោកពូទីនមិនព្រមធ្វើដូចការសន្យា (ជួបគ្នាកម្រិតកំពូលពូទីន-ហ្សេឡិនស្គី)។ ថ្នាក់ដឹកនាំនៅអឺរ៉ុបគិតថាលោកពូទីនមិនប្រាកដជាចង់បញ្ចប់សង្គ្រាមនៅពេលឆាប់ៗនេះទេ។ ទោះជាយ៉ាងណាក្ដី ពួកគេចង់ធ្វើឱ្យប្រាកដថានៅក្នុងកិច្ចព្រមព្រៀងសន្តិភាពនោះត្រូវតែមានចំណុចមួយនិយាយអំពីការធានាសន្តិសុខរបស់អ៊ុយក្រែន។ បើអាមេរិកមិនបានចូលរួមឱ្យបានពេញដៃពេញជើង យ៉ាងហោចណាស់ក៏គួរចូលរួមឱ្យបានបន្តិចបន្តួចក៏អស់ចិត្តដែរ។
ទោះបីអឺរ៉ុបបង្ហាញថាខ្លួនចង់បានសន្តិភាព ប៉ុន្តែលោកឡាវរ៉ូសដាក់ជាចម្ងល់ថាប្រហែលជាអឺរ៉ុបទៅវិញទេដឹងដែលមិនចង់បានសន្តិភាព? យោងតាមលោកឡាវរ៉ូស គេអាចមើលឃើញច្បាស់ណាស់ថាទាំងអ៊ុយក្រែន និងអឺរ៉ុបមិនចង់បានសន្តិភាពទេ។ លោកចោទប្រកាន់ថាក្រុមសម្ព័ន្ធមិត្តអឺរ៉ុបដែលមានអង់គ្លេស បារាំង អាល្លឺម៉ង់ និងអ៊ីតាលីកំពុងព្យាយាមយកជើងរាទឹកនៅក្នុងការចរចាគ្នា៕
ចែករំលែកព័តមាននេះ