ឥណ្ឌា-ចិន ៖ ឥណ្ឌាប្រកាសកាលពីថ្ងៃទី២០សីហាថា បានធ្វើការសាកល្បងដោយជោគជ័យមី
ស៊ីលបាលីស្ទិករយៈមធ្យម ដែលក្រោយពេលដាក់ឲ្យប្រើប្រាស់វាអាចបញ្ជូនក្បាលគ្រាប់នុយក្លេ
អ៊ែរដល់គ្រប់ទិសទីនៃប្រទេសចិន។ ទោះបីទំនាក់ទំនងចិន-ឥណ្ឌាពេលនេះហាក់កំពុងមាននិន្នាការទៅរកភាពល្អប្រសើរខ្លះក្ដី តែនោះមិនមែនជាព័ត៌មានដែលនាំឲ្យចិនសប្បាយចិត្តឡើយ។
មីស៊ីលឈ្មោះAGNI-5នោះត្រូវបានបាញ់សាកល្បងនៅរដ្ឋអូឌីសាភាគខាងកើតឥណ្ឌា។ អាជ្ញាធរឥណ្ឌាគូសបញ្ជាក់ថា ការបាញ់សាកល្បងមីស៊ីលនោះប្រព្រឹត្តដោយជោគជ័យ។ ចិននិងឥណ្ឌាដែលជាមហាប្រទេសមានប្រជាជនច្រើនជាងគេបំផុតដូចគ្នា មានជម្លោះព្រំដែននៅតំបន់ភ្នំហ៊ីម៉ាឡៃយ៉ា ហើយក៏កំពុងប្រជែងឥទ្ធិពលគ្នានៅអាស៊ីខាងត្បូងដែរ។
ទំនាក់ទំនងរវាងប្រទេសធំទាំង២ មានភាពល្អក់កករខ្លាំងកាលពីឆ្នាំ២០២០ បន្ទាប់ពីការប៉ះទង្គិចគ្នាដ៏បង្ហួរឈាមនៅព្រំដែនរវាងប្រទេសទាំង២។ ឥណ្ឌាស្ថិតក្នុងសម្ព័ន្ធភាពសន្តិសុខQUADជាមួយអាមេរិក អូស្ត្រាលីនិងជប៉ុនហើយចាត់ទុកថា ជាគីឡូធ្ងន់មួយដែលអាចប្រឈមមុខជាមួយចិន។ ក៏ប៉ុន្តែប្រឈមមុខនឹងរបត់ពាណិជ្ជកម្មនិងភូមិសាស្ត្រនយោបាយពិភពលោក មកពីសង្គ្រាមពន្ធគយរបស់ប្រធានាធិបតីអាមេរិកលោកដូណាល់ត្រាំ ក្រុងញូវដែល្លីនិងក្រុងប៉េកាំងបានខិតចូលជិតគ្នា។
កាលពីខែតុលាកន្លងទៅនាយករដ្ឋមន្ត្រីឥណ្ឌា លោកណារេនដ្រាម៉ូឌី បានជួបជាលើកដំបូងចាប់តាំងពី៥ឆ្នាំមកហើយជាមួយប្រធានាធិបតីចិនលោកស៊ីជីនពីង ក្នុងឱកាសនៃជំនួបកំពូលមួយនៅរុស្ស៊ី។ លោកម៉ូឌីត្រូវទៅបំពេញទស្សនកិច្ចនៅចិន លើកដំបូងចាប់តាំងពីឆ្នាំ២០១៨មក នាដំណាច់ខែនេះដើម្បីចូលរួមក្នុងកិច្ចប្រជុំកំពូល របស់បណ្ដាប្រទេសជាសមាជិកអង្គការកិច្ចសហប្រតិបត្តិការសៀងហៃជាអង្គការសន្តិសុខតំបន់មួយ៕
ចែករំលែកព័តមាននេះ