ខេត្តកំពង់ស្ពឺ ៖ ពន្ធនាគារខេត្តកំពង់ស្ពឺកើតមានរឿងជាហូរហែ ជនសង្ស័យចំនួន០២នាក់ហែកគុកលួចរត់គេចខ្លួនមិនទាន់ចាប់បានវិញផង បន្ថែមរឿងមួយទៀត ជនជាប់សង្ស័យដែលយកពូថៅកាប់ម្តាយខ្លួនឯងស្លាប់នោះ លេចឮព័ត៌មានមកថា ជនជាប់ចោទដែលឃុំខ្លួននោះធ្លាក់ខ្លួនឈឺ បញ្ជូនទៅសម្រាកព្យាបាលនៅមន្ទីរពេទ្យបង្អែកខេត្តកំពង់ស្ពឺ បានស្លាប់បាត់ទៅហើយមិនដឹងថាមកពីមូលហេតុអ្វីពិតប្រាកដនោះទេ!។…
ខេត្តកំពង់ស្ពឺ ៖ ពន្ធនាគារខេត្តកំពង់ស្ពឺកើតមានរឿងជាហូរហែ ជនសង្ស័យចំនួន០២នាក់ហែកគុកលួចរត់គេចខ្លួនមិនទាន់ចាប់បានវិញផង បន្ថែមរឿងមួយទៀត ជនជាប់សង្ស័យដែលយកពូថៅកាប់ម្តាយខ្លួនឯងស្លាប់នោះ លេចឮព័ត៌មានមកថា ជនជាប់ចោទដែលឃុំខ្លួននោះធ្លាក់ខ្លួនឈឺ បញ្ជូនទៅសម្រាកព្យាបាលនៅមន្ទីរពេទ្យបង្អែកខេត្តកំពង់ស្ពឺ បានស្លាប់បាត់ទៅហើយមិនដឹងថាមកពីមូលហេតុអ្វីពិតប្រាកដនោះទេ!។ សង្ស័យការងារគ្រប់គ្រងអ្នកទោសមិនបានល្អទេដឹង?
តាមប្រភពព័ត៌មានបានបង្ហើបឱ្យដឹងថា ជនសង្ស័យដែលស្លាប់នៅក្នុងមន្ទីរពេទ្យបង្អែកខេត្តកំពង់ស្ពឺនោះមានឈ្មោះ ណុប សារី ភេទប្រុស អាយុ២៧ឆ្នាំ រស់ នៅក្នុងភូមិព្រៃស្យា ឃុំសែនដី ស្រុកសំរោងទង ខេត្តកំពង់ស្ពឺ។ បានស្លាប់នៅក្នុងមន្ទីរពេទ្យបង្អែកខេត្តកំពង់ស្ពឺកាលពីថ្ងៃទី១៥ ខែសីហា ឆ្នាំ២០២៥ មិនដឹងពីមូលហេតុច្បាស់លាស់នោះ ដោយសារតែសមត្ថកិច្ចនិងប្រធានពន្ធនាគារបិទបាំងព័ត៌មាននេះបានជិតល្អណាស់។
ប្រភពព័ត៌មានដដែលបានបង្ហើបទៀតថា នៅក្នុងពន្ធនាគារនេះមានរឿងរ៉ាវជាច្រើនដែលមិនប្រក្រតី ហើយជាពិសេសនោះរាល់អ្នកជំងឺដែលជាជនជាប់ទោសដែលបញ្ជូនចេញពីពន្ធនាគារទៅព្យាបាលនៅមន្ទីរពេទ្យបង្អែកខេត្ត កម្របានត្រឡប់មកវិញណាស់(ភាគច្រើនគឺស្លាប់តែម្តង)។
ពាក់ព័ន្ធនិងការស្លាប់នៅក្នុងមន្ទីរពេទ្យបង្អែកខេត្តកំពង់ស្ពឺនោះដែរ លោក ទីន សុវណ្ណនី ប្រធានពន្ធនាគារខេត្តកំពង់ស្ពឺបានឱ្យដឹងតាមប្រព័ន្ធតេឡេក្រាមថា ពិតជាមានករណីជនជាប់ទោសស្លាប់មែន ឈឺស្លាប់ពេលបញ្ជូនទៅពេទ្យ ដោយជននោះមានជំងឺឆ្កូត ជាប់ពាក់ព័ន្ធយកពូថៅកាប់ម្តាយបង្កើតខ្លួនឯងស្លាប់ហើយសមត្ថកិច្ចឃាត់ខ្លួន។
សូមរំលឹកផងដែរថា កាលពីវេលាម៉ោង១១និង៣០នាទីរំលងអាធ្រាត្រ ថ្ងៃទី២៤ ខែកក្កដា ឆ្នាំ២០២៥ នៅក្នុងភូមិព្រៃស្យា ឃុំសែនដី ស្រុកសំរោងទង ខេត្តកំពង់ស្ពឺ មានករណីកូនប្រុសមានសតិមិនគ្រប់(វិបល្លាសស្មារតី)ម្នាក់បានទាញពូថៅកាប់ម្តាយបង្កើតកំពុងសម្រានលក់លើគ្រែមុខផ្ទះបង្កឱ្យមានការភ្ញាក់ផ្អើលទាំងកណ្តាលអាធ្រាត្រ នគរបាលឃាត់ខ្លួនភ្លាមៗ។
មន្ត្រីនគរបាលស្រុកសំរោងទងបាននិយាយឱ្យដឹងថា កាលពីរំលងអាធ្រាត្រថ្ងៃទី២៤ ខែកក្កដា ឆ្នាំ២០២៥ មានឈ្មោះ ណុប សារី ភេទប្រុស អាយុ២៧ឆ្នាំ រស់នៅជាមួយម្តាយ ហើយ( ជាមនុស្សវិបល្លាសស្មារតី) នៅក្នុងភូមិព្រៃស្យា ឃុំសែនដី ស្រុកសំរោងទង ខេត្តកំពង់ស្ពឺ បានទាញយកពូថៅកាប់ទៅលើម្ដាយបង្កើតរបស់ខ្លួនឈ្មោះ ប៉ាង សាវុធ អាយុ៦០ឆ្នាំ រស់នៅផ្ទះជាមួយគ្នា បណ្ដាលឱ្យស្លាប់ នៅចំណុចលើគ្រែ សំយាបមុខផ្ទះខ្លួនឯងតែម្តង ។
មន្ត្រីនគរបាលស្រុកសំរោងទងបានបន្តថា ក្រោយកើតហេតុនៅវេលាម៉ោង០១និង៤៥នាទីឈានចូល ថ្ងៃទី២៥ ខែកក្កដា ឆ្នាំ២០២៥ កម្លាំងព្រហ្មទណ្ឌស្រុក សហការជាមួយកម្លាំងនគរបាលប៉ុស្ដិរដ្ឋបាលឃុំសែនដី បានឃាត់ឈ្មោះ ណុប សារី មកធ្វើការសួរនាំ ជនដៃដល់ជាកូនបានឆ្លើយសារភាពថាខ្លួនពិតជាបានយកពូថៅកាប់ទៅលើម្ដាយបង្កើតរបស់ខ្លួនពិតប្រាកដមែន ។
មន្ត្រីនគរបាលបានបញ្ជាក់ថា ក្រោយឃាត់ខ្លួនជនដៃដល់ជាកូន ដែលយកពូថៅកាប់ទៅលើម្តាយកំពុងដេកលក់លើគ្រែមុខសំយាបផ្ទះនោះដកហូតវត្ថុតាង បាន ពូថៅ០១ ។ ក្រោយនគរបាលជំនាញចុះទៅពិនិត្យសពចំក្បាលផុងលលា បានប្រគល់ជូនក្រុមគ្រួសារយកទៅធ្វើបុណ្យតាមប្រពៃណី។
ចំណែកជនដៃដល់ជាកូនខាងលើនគរបាលជំនាញស្រុកសំរោងទង បានកសាងសំណុំរឿងបញ្ជូនទៅកាន់ការិយាល័យជំនាញនៃស្នងការដ្ឋាននគរបាលខេត្តកំពង់ស្ពឺ ដើម្បីចាត់ការបន្តតាមផ្លូវច្បាប់ ។
ព័ត៌មានបន្តនឹងមានផ្សាយនៅលើទំព័រកាសែតកោះសន្តិភាព ៕
ចែករំលែកព័តមាននេះ