ខេត្តព្រះវិហារ ៖ យ៉ាងហោចណាស់ទំនិញខូចគុណភាពជាច្រើនមុខ សរុបជាង៥តោន ដែលនាំពីសៀម ចូលមកកម្ពុជា ដោយឆ្លងកាត់ប្រទេសឡាវ តាមច្រកព្រំដែនកំពង់ស្រឡៅ ស្រុកឆែប ខេត្តព្រះវិហារ…
ខេត្តព្រះវិហារ ៖ យ៉ាងហោចណាស់ទំនិញខូចគុណភាពជាច្រើនមុខ សរុបជាង៥តោន ដែលនាំពីសៀម ចូលមកកម្ពុជា ដោយឆ្លងកាត់ប្រទេសឡាវ តាមច្រកព្រំដែនកំពង់ស្រឡៅ ស្រុកឆែប ខេត្តព្រះវិហារ ត្រូវបានក្រុមការងារចម្រុះសម្រេចចាប់ដុតកម្ទេចចោល នៅរសៀលថ្ងៃទី១៦ ខែសីហា ឆ្នាំ២០២៥ ។
ក្រុមការងារចម្រុះដែលត្រួតពិនិត្យរថយន្តដឹកទំនិញទាំង៤គ្រឿងរួមមាន៖ មន្រី្ដគយ និងរដ្ឋាករខេត្តកំពង់ធំ-ព្រះវិហារ លោក ជាប សៅ ប្រធានសាខាគយ និងរដ្ឋាករខេត្តកំពង់ធំ លោក ឃិត សុធារ៉ា អភិបាលស្រុកឆែប លោក លឹម សាលួត មន្ដ្រីការិយាល័យផលិតផល និងបសុព្យាបាលនៃមន្ទីរកសិកម្ម រុក្ខាប្រមាញ់ និងនេសាទខេត្តព្រះវិហារ និងសមត្ថកិច្ចពាក់ព័ន្ធ ក្រោមការដឹកនាំសម្របសម្រួលនីតិវិធីពីលោក ស្រេង វុទ្ធា ព្រះរាជអាជ្ញារងអមសាលាដំបូងខេត្តព្រះវិហារ ។
ការត្រួតពិនិត្យទំនិញនៅក្នុងរថយន្តទាំង៤គ្រឿងនាពេលនេះ ឃើញមានទំនិញខូចគុណភាពមិនអាចប្រើប្រាស់បាន (ធុំក្លិនស្អុយ) ដែលនាំចូលតាមច្រកកំពង់ស្រឡៅ ។
១-កោះមាន់ចំនួន២០៥កេស ស្មើនឹង២៤៦០គីឡូក្រាម ។
២-ស្លាបមាន់ចំនួន៤៥កេស ស្មើនឹង៥៤០គីឡូក្រាម ។
៣-ត្រីកន្ធរ ចំនួន១០០ការុង ស្មើនឹង២០០០គីឡូក្រាម ។
៤-នំម្សៅបំពងចំនួន១៤០គីឡូក្រាម ។ ទំនិញដែលត្រូវរឹបអូស ហើយដុតកម្ទេច៤មុខខាងលើសរុបទម្ងន់ ៥០.១៤០គីឡូក្រាម ។ ដោយឡែករថយន្តល្មើសទាំង៤គ្រឿងនេះ ត្រូវផាកពិន័យតាម
ច្បាប់ ។
សូមបញ្ជាក់ថា រថយន្តដឹកទំនិញទាំង៤គ្រឿងនេះ ត្រូវបានលោក ឃិត សុធារ៉ា អភិបាលស្រុកឆែប និងជាប្រធានគណៈបញ្ជាការឯកភាពស្រុក ដោយអនុវត្តតាមបទបញ្ជា និងការណែនាំពីលោក គីម រិទ្ធី អភិបាលខេត្តព្រះវិហារ និងជាប្រធានគណៈបញ្ជាការឯកភាពខេត្ត បានធ្វើការឃាត់នៅច្រកព្រំដែនកំពង់ស្រឡៅ នៅយប់ថ្ងៃទី១៦ ខែសីហា ឆ្នាំ២០២៥ ដោយសហការជាមួយកម្លាំងយោធា និងសាខាគយរដ្ឋាករខេត្ត និងគយតំបន់៥ ។
អាចនិយាយបានថាជាកាកសំណល់នៅពេលដែលទំនិញក្លាស្សេហើយកកស្ទះដោយមិនអាច នាំយកទៅណាបាន ហើយសល់រយៈ ពេលយូរធ្វើឱ្យទំនិញទាំងនោះបានខូចគុណភាព ធុំក្លិនស្អុយនិងបង្កផលប៉ះពាល់ដល់សុខភាពអ្នកប្រើប្រាស់ ។
បច្ចុប្បន្នសៀមមានជម្លោះជាមួយកម្ពុជា ហើយច្រកព្រំដែនត្រូវបានបិទទាំងអស់ ឯទំនិញក៏ត្រូវចាល់កកស្ទះ មិនអាចនាំចេញមកកម្ពុជាបានឡើយ ។ បើជាទំនិញវេចខ្ចប់រយៈពេលយូរអាចប្រើប្រាស់បានជាធម្មតាអាស្រ័យទៅលើកាលបរិច្ឆេទលើមុខទំនិញនីមួយៗ ប៉ុន្តែបើជាទំនិញបង្កក មិនអាចរក្សាទុកបានយូរនោះទេ ។
មន្ត្រីជំនាញថា ទំនិញបង្កកត្រូវការរក្សាទុកក្នុងសីតុណ្ហភាពត្រជាក់ខ្លាំង តែបើសិនបាត់បង់ភាពត្រជាក់ច្រើនម៉ោងវានឹងចាប់ផ្តើមធុំក្លិនស្អុយ មិនអាចប្រើប្រាស់បានទៀតទេ ដូច្នេះអាច និយាយបានថាក្លាយជាកាកសំណល់ ។
ទាក់ទិនករណីទំនិញខូចគុណភាពដែលត្រូវបានឈ្មួញនាំពីប្រទេសថៃឆ្លងកាត់ប្រទេសឡាវហូរចូលមកកម្ពុជាត្រូវបានរាំងខ្ទប់ដោយកម្លាំងសមត្ថកិច្ចចម្រុះស្រុកឆែបខេត្តព្រះវិហារ ។យោងតាមប្រភពព័ត៌មានពីសមត្ថកិច្ចក្នុងប្រតិបត្តិការខាងលើថា រថយន្តល្មើសទាំង៤គ្រឿងនោះត្រូវផាកពិន័យតាមច្បាប់គយ និងដោះលែង ។ ចំណែកឈ្មួញមិនត្រូវបានចាត់វិធានការ ឬឃាត់ខ្លួននោះឡើយ ។
អគ្គនាយកដ្ឋានការពារអ្នកប្រើប្រាស់កិច្ចការប្រកួតប្រជែងនិងបង្ក្រាប ការក្លែងបន្លំ ហៅកាត់ថា «ក.ប.ប» បានដើរតួយ៉ាងសំខាន់លើការគ្រប់គ្រងត្រួតពិនិត្យរុករកសារធាតុផ្សំនៅក្នុងចំណីអាហារនិងទំនិញផ្សេងៗទៀតដែលបង្កផលប៉ះពាល់ទៅដល់សុខភាពអ្នកប្រើប្រាស់ ។
សុខភាពប្រជាពលរដ្ឋក៏បានពឹងផ្អែកទៅលើអង្គភាព ក.ប.ប ក្នុងការត្រួតពិនិត្យនិងចាត់វិធានការ ចំពោះផលិតផលនិងទំនិញទាំងឡាយណាដែលបង្ការប៉ះពាល់ដល់សុខភាពអ្នកប្រើប្រាស់ដោយប្រាកដថាមិនបានរួមចំណែកឃុបឃិតអំពើល្មើសជាមួយក្រុមឈ្មួញ ៕
ចែករំលែកព័តមាននេះ