ទីក្រុងវ៉ាស៊ីនតោន៖ ច្បាស់ការណ៍ហើយលើកនេះ ប្រធានាធិបតីចិនប្រាប់លោកត្រាំថា «ដរាបណាត្រាំនៅកាន់អំណាច កងទ័ពចិនមិនទាន់វាយប្រហារកោះតៃវ៉ាន់ទេ»។ ដូច្នេះ យ៉ាងហោចណាស់ប្រជាជនតៃវ៉ាន់អាចស្ងប់ចិត្តបាន១គ្រាដែរ។ លោកត្រាំបង្ហើបឱ្យដឹងអំពីការធានាអះអាងរបស់លោកស៊ីជីនពីងដូចខាងលើនេះនៅក្នុងបទសម្ភាសជាមួយទូរទស្សន៍ហ្វក់ (Fox) មុនពេលមានកិច្ចជំនួបកំពូលជាមួយលោកពូទីននៅអាឡាស់ស្កា។
យោងតាមលោកត្រាំ លោកស៊ីជីនពីងបានប្រាប់ផ្ទាល់មាត់ថាលោកនឹងមិនទាន់ចាត់ការតៃវ៉ាន់ទេនៅពេលលោកត្រាំនៅកាន់តំណែង។ ជាកិច្ចឆ្លើយតប លោកត្រាំជម្រាបជូនលោកស៊ីជីនពីងវិញថាលោកសូមកោតសរសើរចំពោះគោលជំហរនេះ។ ប៉ុន្តែលោកស៊ីថ្លែងបន្តទៀតថាលោកលោកខិតខំខាំមាត់សង្កត់ចិត្តខ្លាំងណាស់ ប្រជាជនចិនក៏ដូចគ្នាដែរ។
នៅក្នុងបទសម្ភាសនោះ លោកត្រាំមិនបានបញ្ជាក់ថាតើលោកស៊ីជីនពីងបានប្រាប់គាត់នៅពេលណាទេ។ គេនៅចាំបានថាលោកទាំង២បានសន្ទនាគ្នាតាមទូរស័ព្ទកាលពីខែមិថុនាជាលើកដំបូងចាប់តាំងពីលោកត្រាំឡើងកាន់អំណាចនៅអាណត្តិទី២។ ការទូរស័ព្ទនៅពេលនោះត្រូវប្រទេសទាំង២ទទួលស្គាល់ទាំងសងខាង។ ប៉ុន្តែលោកត្រាំអះអាងថាលោកទាំង២ធ្លាប់ទូរស័ព្ទមុននោះកាលពីខែមេសា។
ជានិច្ចកាល លោកត្រាំចង់បានមុខមាត់ណាស់ពាក់ព័ន្ធនឹងការចង់ឃើញពិភពលោកគ្មានសង្គ្រាម។ លោកនៅតែនិយាយដោយមិនចេះនឿយណាយថាបើសិនលោកកាន់អំណាចកាលពីជំនាន់លោកបៃដិន ប្រហែលជាសង្គ្រាមអ៊ុយក្រែនមិនកើតឡើងនោះទេ។ នៅពេលជួបគ្នាកាលពីថ្ងៃសុក្រ លោកពូទីនយល់ស្របតាមពាក្យសម្ដីរបស់លោកត្រាំនៅត្រង់ចំណុចនេះ។
កាលពីខែធ្នូ ឆ្នាំ២០២៤ លោកស៊ីជីនពីងធ្លាប់ប្រកាសថាយើងមិនអនុញ្ញាតឱ្យនរណាម្នាក់មករារាំងផែនការបង្រួបបង្រួមកោះតៃវ៉ាន់ និងប្រទេសចិនឱ្យជាប្រទេសតែមួយនោះទេ។ លោកចាត់ទុកថាចិនដីគោក និងតៃវ៉ាន់ប្រៀបបាននឹងមនុស្សនៅក្នុងគ្រួសារតែ១ដែលពេលខ្លះគ្រាន់តែទាស់ពាក្យសម្ដីនឹងគ្នាបន្តិចបន្តួចប៉ុណ្ណោះ។ ដូច្នេះថ្ងៃណាមួយគង់តែត្រូវគ្នាវិញជាមិនខាន។
កាលពីខែមិថុនា រដ្ឋមន្ត្រីការពារជាតិអាមេរិកប្រមើលឃើញថាបើចិនប្រើប្រាស់វិធីបង្រួបបង្រួមទឹកដីដោយកម្លាំងយោធា ពេលនោះវិនាសកម្មនឹងកើតឡើងមិនត្រឹមតែនៅឥណ្ឌូ-ប៉ាស៊ីហ្វិចទេ ប៉ុន្តែឆាបឆេះទូទាំងពិភពលោកទាំងមូល។ លោកយល់សង្គ្រាមនេះអាចនឹងកើតឡើងមែន។ យើងសង្ឃឹមថាព្រឹត្តិការណ៍នេះនឹងមិនកើតឡើងទៅចុះ។ ប៉ុន្តែយើងក៏មិនត្រូវមើលស្រាលបានដែរព្រោះវាអាចនឹងកើតឡើងមែន។ ខាងលើនេះជាការដកស្រង់ប្រភពពីទស្សនាវដ្ដីញូស្វីក (Newsweek) និងប្រភពដទៃទៀត៕
ចែករំលែកព័តមាននេះ