សហរដ្ឋអាមេរិក ៖ បន្ទាប់​ពី​ផ្លាស់​ទៅ​ចូលរួម​ជាមួយ​ក្លិប Los Angeles FC ឬ LAFC នៃ​លី​គ​កំពូល​បាល់ទាត់​សហរដ្ឋអាមេរិក MLS មិន​ទាន់​បាន​២​ស​ប្តា​ហ៍​ផង ខ្សែប្រយុទ្ធ​ឆ្នើម​កូរ៉េ​ខាងត្បូង Son Heung-min ឥឡូវនេះ​បាន​ក្លាយជា​អត្ត​លិ​ក​ដ៏​ពេញ​និយម​បំផុត​មួយ​រូប​នៅ​សហរដ្ឋអាមេរិក​រួច​បាត់​ទៅ​ហើយ​។

បើ​តាម​លោក John Thorrington សហ​ប្រធាន និង​ជានា​យក​ប្រតិបត្តិ​ក្លិប LAFC បាន​អះអាង​ថា អាវ​លេខ ៧ របស់ Son ជាមួយ​ក្រុម​ថ្មី ឥឡូវនេះ​គឺជា​អាវ​កីឡា​លក់ដាច់​បំផុត​ទូ​ទាំង​ពិភពលោក ខណៈ​ដែល​សមិទ្ធិ​ផល​ដ៏​អស្ចារ្យ​នេះ បាន​កើតឡើង​តិច​ជាង​១​ស​ប្តា​ហ៍ បន្ទាប់​ពី​អតីត​ខ្សែប្រយុទ្ធ​ឆ្នើម​ក្រុម Tottenham Hotspur វ័យ​៣៣​ឆ្នាំ​រូប​នេះ បាន​ចុះហត្ថលេខា​ជាមួយ​ក្លិប LAFC កាលពី​ថ្ងៃ​ទី​៦ ខែសីហា កន្លង​ទៅ​។ លោក​ថែម​ទាំង​អះអាង​ថា ការ​លក់​បច្ចុប្បន្ន​នេះ គឺ​កើន​លើស​ពី​ការ​លក់​អាវ​របស់​កីឡាករ Lionel Messi របស់​ក្លិប Inter Miami កីឡាករ Cristiano Ronaldo របស់​ក្លិប Al-Nassr ក៏​ដូច​ជាតា​រា​បាល់បោះ​ឆ្នើម​អា​មេ​រិ​ក Lebron James និង​អត្ត​ព​លិ​ក​ដទៃ​ផ្សេង​ទៀត​។

លោក Thorrington បាន​ប្រាប់​សារព័ត៌មាន talkSPORT កាលពី​ពេល​ថ្មី​ៗ​នេះ ដូច្នេះ​ថា «​នេះ​គឺ​ជាស​ប្តា​ហ៍​ទី​២ ដែល​យើង​មិន​គ្រាន់តែ​និយាយ​ពី​ការ​លក់​អាវ​កីឡាបាល់ទាត់​ដែល​លក់ដាច់​បំផុត​នៅ MLS នោះ​ទេ ប៉ុន្តែ​វា​ជា​អាវ​លក់ដាច់​បំផុត​គ្រប់​ប្រភេទ​កីឡា​ទាំងអស់​ក្នុង​ពិភពលោក​នា​ពេល​ឥឡូវនេះ ប្រសិនបើ​អ្នក​គិត​អំពី​ការ​លក់​ក្រោយ​ពេល Son បាន​ចុះហត្ថលេខា​ជាមួយនឹង LAFC រហូត​មក​ដល់​ពេល​នេះ អាវ​លេខ ៧ របស់​គេ​លក់​បាន​ច្រើន​ជាង​អត្ត​ព​លិ​ក​ដទៃ​ទៀត​លើ​ពិភពលោក​»​។ ទោះ​យ៉ាងណា លោក​មិន​បញ្ជាក់​អំពី​តួលេខ​នៃ​ការ​លក់​នោះ​ទេ​។

ខ្សែប្រយុទ្ធ Son Heung-min ចុះហត្ថលេខា​ជា​ផ្លូវការ​ជាមួយ​ក្លិប LAFC កាលពី​ថ្ងៃ​ទី​៦ ខែសីហា ឆ្នាំ​២០២៥ និង​ជា​កីឡាករ​មាន​តម្លៃ​ផ្ទេរ​ខ្ពស់​បំផុត​ក្នុង​ប្រវត្តិសាស្ត្រ MLS ពោល​ចំនួន ២៦,៥​លាន​ដុល្លារ​អា​មេ​រិ​ក​។ ប្រធាន​ក្រុម​ជម្រើសជាតិ​កូរ៉េ​ខាងត្បូង​រូប​នេះ បាន​បង្ហាញខ្លួន​លើក​ដំបូង​ជាមួយ LAFC នៅ​ក្នុង​ការ​ប្រកួត​ពានរង្វាន់ MLS ទល់​នឹង​ក្រុម Chicago Fire FC ដែល​បាន​បញ្ចប់​ទៅ​ដោយ​លទ្ធផល ២-២ កាលពី​ថ្ងៃ​ទី​១០ ខែសីហា កន្លង​ទៅ​។

អាវ​លេខ ៧ ថ្មី​របស់ Son ត្រូវ​បាន​ដាក់​លក់​ក្នុង​តម្លៃ ១៩៤,៩៩​ដុល្លារ​នៅ​ក្នុង​ហាង MLS និង​ហាង LAFC គ្រប់​ទំហំ​ទាំងអស់ លើកលែងតែ​ទំហំ 3XL​។ បន្ថែម​ពីលើ​សន្ទុះ​ការ​លក់​អាវ​របស់​កីឡាក​រូប​នេះ តម្រូវការ​សំបុត្រ​ទស្សនាការ​ប្រកួត​ក៏​បាន​ឡើងថ្លៃ​ផង​ដែរ ជាមួយ​សំបុត្រ​តម្លៃ​ថោក​បំផុត​នា​ពេល​បច្ចុប្បន្ន​សម្រាប់​ការ​ប្រកួត​ក្នុងផ្ទះ​របស់​ក្រុម LAFC មាន​តម្លៃ ២២០​ដុល្លារ​។

លើស​ពី​នេះ​ទៀត ប្រភព​ពី​សារព័ត៌មាន Korea Times បាន​រាយការណ៍​ថា តម្លៃ​សំបុត្រ​សម្រាប់​ការ​ប្រកួត​របស់ LAFC ជាមួយ​ក្រុម San Diego FC នៅ​ថ្ងៃ​ទី​១ ខែកញ្ញា ខាង​មុខ​នេះ បាន​ឡើងថ្លៃ​យ៉ាង​ខ្លាំង​ពី​ប្រហែល ៣០០​ដុល្លារ​ទៅ ១ ៥០០​ដុល្លារ​ឯណោះ​៕ ប្រភព ៖ Sports Illustrated