បរទេស ៖ តម្លៃប្រេងឆៅបានកើនឡើងនៅថ្ងៃទី១២ ខែសីហា ឆ្នាំ២០២៥ ខណៈដែលសហរដ្ឋអាមេរិក និងប្រទេសចិនបានព្រមព្រៀងគ្នាបន្តផ្អាកអនុវត្តការដំឡើងពន្ធខ្ពស់លើគ្នា ដោយបន្ធូរបន្ថយការព្រួយបារម្ភថា ការកើនឡើងនៃសង្គ្រាមពាណិជ្ជកម្មនឹងរំខានដល់សេដ្ឋកិច្ចប្រទេសទាំងពីរ និងកាត់បន្ថយតម្រូវការប្រេងឥន្ធនៈក្នុងប្រទេសប្រើប្រាស់ប្រេងធំបំផុតទាំងពីររបស់ពិភពលោក។…
បរទេស ៖ តម្លៃប្រេងឆៅបានកើនឡើងនៅថ្ងៃទី១២ ខែសីហា ឆ្នាំ២០២៥ ខណៈដែលសហរដ្ឋអាមេរិក និងប្រទេសចិនបានព្រមព្រៀងគ្នាបន្តផ្អាកអនុវត្តការដំឡើងពន្ធខ្ពស់លើគ្នា ដោយបន្ធូរបន្ថយការព្រួយបារម្ភថា ការកើនឡើងនៃសង្គ្រាមពាណិជ្ជកម្មនឹងរំខានដល់សេដ្ឋកិច្ចប្រទេសទាំងពីរ និងកាត់បន្ថយតម្រូវការប្រេងឥន្ធនៈក្នុងប្រទេសប្រើប្រាស់ប្រេងធំបំផុតទាំងពីររបស់ពិភពលោក។
តាមប្រភពពីទីភ្នាក់ងារសារព័ត៌មាន Reuters បានឱ្យដឹងថា ប្រេងឆៅនាពេលអនាគតម៉ាក Brent បានកើនឡើង ១៤ សេន ឬ ០,២% នៅក្នុងតម្លៃ ៦៦,៧៧ក្នុង១បារ៉ែលគិតត្រឹមម៉ោង២នាទីរសៀល ថ្ងៃទី១២ ខែសីហា ឆ្នាំ២០២៥ ស្របពេលដែលអនាគតប្រេងឆៅរបស់អាមេរិក West Texas Intermediate បានកើនឡើង ៨ សេន ឬ ០,១% នៅក្នុងតម្លៃ ៦៤,០៤ដុល្លារក្នុង១បារ៉ែល។
ប្រធានាធិបតីអាមេរិក លោក ដូណាល់ ត្រាំ (Donald Trump) បានចុះហត្ថលេខាលើបទបញ្ជាប្រតិបត្តិមួយ ដើម្បីពន្យាររយៈពេល៩០ថ្ងៃទៀត សម្រាប់ការអនុវត្តពន្ធកម្រិតខ្ពស់ជាមួយចិន ពោលរហូតដល់ថ្ងៃទី១០ ខែវិច្ឆិកា ឆ្នាំ២០២៥ ដោយផ្អាកការយកអត្រាពន្ធ៣ខ្ទង់លើទំនិញលើគ្នា (១៤៥% លើទំនិញចិន និង ១២៥% លើទំនិញអាមេរិក) ក្រោមកិច្ចព្រមព្រៀងនេះ អាមេរិកនឹងរក្សាពន្ធរបស់ខ្លួនលើការនាំចូលពីចិនត្រឹមអត្រា ៣០% រីឯចិននឹងរក្សាពន្ធ ១០% លើទំនិញនាំចូលពីអាមេរិក។
ការផ្លាស់ប្តូរនេះបានបង្កើនក្តីសង្ឃឹមថា កិច្ចព្រមព្រៀងមួយអាចត្រូវបានសម្រេចបានរវាងប្រទេសទាំងពីរដែលមានសេដ្ឋកិច្ចធំជាងគេរបស់ពិភពលោក ខណៈពន្ធគយប្រថុយនឹងការពន្យឺតកំណើនសេដ្ឋកិច្ចពិភពលោក ដែលអាចកាត់បន្ថយតម្រូវការប្រេងឥន្ធនៈ និងទាញទម្លាក់តម្លៃប្រេងឆៅផងដែរ។
លោកស្រី Priyanka Sachdeva អ្នកវិភាគទីផ្សារជាន់ខ្ពស់នៅក្រុមហ៊ុន Phillip Nova បាននិយាយថា ការកើនឡើងតម្លៃប្រេងក៏ត្រូវបានគាំទ្រដោយរលកថ្មីនៃភាពទន់ខ្សោយនៅក្នុងទីផ្សារការងាររបស់សហរដ្ឋអាមេរិក ដែលបានជំរុញការរំពឹងទុកសម្រាប់ការកាត់បន្ថយអត្រាការប្រាក់របស់ធានាគារកណ្តាលប្រទេសនេះនៅក្នុងខែកញ្ញាផងដែរ ដ្បិតការកាត់បន្ថយអត្រាការប្រាក់ជាធម្មតាបានជំរុញសកម្មភាពសេដ្ឋកិច្ច និងតម្រូវការប្រេង។
ជំនួបលោក ត្រាំ និងប្រធានាធិបតីរុស្ស៊ី លោក វ្លាដឺមៀរ ពូទីន (Vladimir Putin) ដែលគ្រោងនឹងធ្វើឡើងនៅរដ្ឋអាឡាស្កាថ្ងៃសុក្រសប្តាហ៍ ដើម្បីពិភាក្សាអំពីការបញ្ចប់សង្គ្រាមនៅអ៊ុយក្រែននោះ ត្រូវបានអ្នកជំនាញនិយាយថា ផ្លូវការទូតរវាងអាមេរិក និងរុស្ស៊ី ស្តីពីជម្លោះអ៊ុយក្រែននៅតែជាសញ្ញាត្រូវបានគ្រប់គ្នាផ្តោតខ្លាំងផងដែរ ដោយពាណិជ្ជករត្រួតពិនិត្យមើលលទ្ធផលនៃកត្តាភូមិសាស្ត្រនយោបាយ ដែលអាចរំខានដល់ការផ្គត់ផ្គង់ ឬរបបទណ្ឌកម្ម។ កិច្ចប្រជុំនេះធ្វើឡើងស្របពេលអាមេរិកបង្កើនសម្ពាធលើរុស្ស៊ី ជាមួយនឹងការគំរាមកំហែងនៃការដាក់ទណ្ឌកម្មកាន់តែធ្ងន់ធ្ងរលើបណ្តាប្រទេសទិញប្រេងពីរុស្ស៊ីដូចជាចិន និងឥណ្ឌា ប្រសិនបើគ្មានកិច្ចព្រមព្រៀងសន្តិភាពត្រូវបានសម្រេចនោះទេ។
លោក Daniel Hynes អ្នកជំនាញពីធនាគារ ANZ ក៏បានអះអាងថា កិច្ចព្រមព្រៀងសន្តិភាពណាមួយរវាងរុស្ស៊ី និងអ៊ុយក្រែន នឹងបញ្ចប់ហានិភ័យនៃការរំខានដល់ប្រេងឆៅរុស្ស៊ី ដែលបាននិងកំពុងជួញដូរកក្រើកនៅលើទីផ្សារ៕ ប្រភព ៖ Reuters
ចែករំលែកព័តមាននេះ