ខេត្តកំពង់ចាម ៖ ផ្សែងខ្មៅហុយខ្មូលខ្មាញ់ហុយត្របាញ់ទៅលើអាកាស ចេញពីផ្ទះល្វែងលក់គ្រឿងម៉ាស៊ីន និងសម្ភារៈផ្សេងៗទៀត ជាច្រើននៅជាន់ខាងលើ ដែលមានទីតាំងនៅខាងកើតផ្សារធំ កំពង់ចាម ក្នុងភូមិទី១៣ សង្កាត់កំពង់ចាម…
ខេត្តកំពង់ចាម ៖ ផ្សែងខ្មៅហុយខ្មូលខ្មាញ់ហុយត្របាញ់ទៅលើអាកាស ចេញពីផ្ទះល្វែងលក់គ្រឿងម៉ាស៊ីន និងសម្ភារៈផ្សេងៗទៀត ជាច្រើននៅជាន់ខាងលើ ដែលមានទីតាំងនៅខាងកើតផ្សារធំ កំពង់ចាម ក្នុងភូមិទី១៣ សង្កាត់កំពង់ចាម ក្រុងកំពង់ចាម ដែលបានកើតឡើងនៅវេលាម៉ោងជិត៥ល្ងាចថ្ងៃទី១១ ខែសីហា ឆ្នាំ២០២៥ ។
អគ្គិភ័យនេះ បង្កឲ្យមានការភ្ញាក់ផ្អើលដល់អាជីវករលក់ដូរ ព្រមទាំងប្រជាពលរដ្ឋរាប់រយនាក់ ។ ប្រតិបត្តិការពន្លត់ភ្លើងនេះ ក៏មានវត្តមានឯកឧត្តម អ៊ុន ចាន់ដា អភិបាលខេត្ត ស្នងការនគរបាលខេត្ត មេបញ្ជាការកងរាជអាវុធហត្ថខេត្ត និងកម្លាំងសមត្ថកិច្ចរាប់សិបនាក់បន្ថែមទៀត ។
លោកវរសេនីយ៍ឯក យ៉ន ឌីន នាយការិយាល័យបង្ការ ពន្លត់ និងអគ្គិភ័យ នៃស្នងការដ្ឋាននគរបាលខេត្តបានប្រាប់ឲ្យដឹងថា ក្រោយពីទទួលព័ត៌មានអគ្គិភ័យឆេះនៅក្បែរផ្សារធំ ក្រុងកំពង់ចាម ភ្លាមៗនោះ លោកវរសេនីយ៍ឯក អុឹង ប៊ុន អធិការនគរបាលក្រុងកំពង់ចាម បានដឹកនាំឱ្យរថយន្តពន្លត់អគ្គិភ័យ១គ្រឿង ដែលប្រចាំការ២៤ម៉ោងចេញអន្តរាគមន៍បាញ់ទឹកពន្លត់ ។ បន្ទាប់មករថយន្តពន្លត់អគ្គិភ័យ នៃស្នងការដ្ឋាននគរបាលខេត្តចំនួន៣គ្រឿង ក៏បានចេញបន្តបន្ទាប់ ក្នុងប្រតិបត្តិការពន្លត់នេះ ក៏មានរថយន្តពន្លត់អគ្គិភ័យស្រុកកំពង់សៀម១គ្រឿងបានមកជួយផងដែរ ។
នាយការិយាល័យពន្លត់អគ្គិភ័យស្នងការដ្ឋាននគរបាលខេត្តបន្តឲ្យដឹងទៀតថា លោកឧត្តមសេនីយ៍ទោ ហេង វុទ្ធី ស្នងការនគរបាលខេត្ត លោកឧត្តមសេនីយ៍ត្រី មិន សុគន្ធវិបុល ស្នងការរងនគរបាលខេត្តទទួលផែនអគ្គិភ័យ បានដឹកនាំកម្លាំងយ៉ាងសស្រាក់សស្រាំ បាញ់ភ្លើងដែលកំពុងតែឆេះចេញនៅជាន់លើ នៃផ្ទះរបស់ឈ្មោះ ជា សាវ៉េត ភេទប្រុស អាយុ៥២ឆ្នាំ រស់នៅភូមិទី១៣ សង្កាត់កំពង់ចាម ដែលលក់គ្រឿងគ្រឿងម៉ស៊ីនបម្រើការឱ្យការងារកសិកម្ម ដូចជាម៉ាស៊ីនបូមទឹកជាដើម ។
ក្នុងប្រតិបត្តិការនេះ កម្លាំងសមត្ថកិច្ចបានបាញ់ទឹកពន្លត់៣មុខព្រួញ ទី១-បាញ់ពីមុខ ទី២-បាញ់ពីក្រោយ និងទី៣-បាញ់ពីជ្រុងខាងត្បូង ដោយតទុយោចំនួន៣កង់ ហើយទីតាំងដែលឆេះនេះនៅជាន់ខាងលើ ត្រូវបានសមត្ថកិច្ចវាយបំបែកកញ្ចក់ទ្វារ ទើបអាចបាញ់ទឹកពន្លត់ ដោយប្រើពេលប្រហែលកន្លះម៉ោង ភ្លើងបានចាប់ផ្ដើមរលត់បន្តិចម្ដងៗ ដោយប្រើប្រាស់ទឹកអស់ចំនួន១៣រថយន្ត ទើបរលត់ជាស្ថាពរ ។
ចំពោះមូលហេតុនៃការឆេះនេះ ត្រូវបានរកឃើញថា បណ្ដាលមកពីឆ្លងចរន្តអគ្គិសនី ។ ស្របពេលដែលមានអគ្គិភ័យឆាបឆេះនេះ ត្រូវបានឯកឧត្តម អ៊ុន ចាន់ដា អភិបាលខេត្តដឹកនាំបញ្ជាដោយផ្ទាល់ផងដែរ ក្នុងកិច្ចអន្តរាគមន៍បាញ់ទឹកពន្លត់ភ្លើងដែលឆេះនេះរហូតដល់រលត់ ។
សូមបញ្ជាក់ថា ពេលអគ្គិភ័យកំពុងឆេះផ្ទះ ដែលនៅក្បែរនោះមានការភ័យខ្លាចជាខ្លាំង ដោយបានជញ្ជូនរបស់ទ្រព្យមកដាក់នៅក្រៅផ្ទះកន្លែងសុវត្ថិភាព និងខ្លះទៀតជញ្ជូនដាក់លើរថយន្ត ហាងលក់ដូរសម្លៀកបំពាក់ ខ្លះច្រកខោអាវដាក់ក្នុងការុងដឹកតាមម៉ូតូទៅដាក់ផ្ទះសាច់ញាតិរបស់ខ្លួនឆ្ងាយពីកន្លែងឆេះ ។ ជាមួយនោះ អាជ្ញាធរមូលដ្ឋានបានស្រង់ទិន្នន័យនៃការខូចខាតគិតជាប្រាក់២៥ ០០០ដុល្លារ ។
គួររំលឹកថា នាពេលកន្លងទៅ ទីតាំងផ្ទះឈើល្វែងជាប់គ្នាជិត២០ផ្ទះសង់នៅលើបឹងកំប្លោក ក្នុងសង្កាត់កំពង់ចាម ក៏ត្រូវបានអគ្គិភ័យឆាបឆេះរហូតដល់ជិត២០ខ្នងផ្ទះឯណោះ តែមកដល់ពេលនេះ ផ្ទះដែលសាងសង់ថ្មីឡើងវិញ គេឃើញមានតែចំនួន៣ទៅ៤ផ្ទះប៉ុណ្ណោះ ។ ក្រៅពីនេះទៀត មិនទាន់មានការសង់ឡើងវិញនៅឡើយទេ ។
ចែករំលែកព័តមាននេះ