រាជធានីភ្នំពេញ ៖ ស្ត្រីទីមួយកម្ពុជា គឺលោកជំទាវបណ្ឌិត ពេជ ចន្ទមុនី ហ៊ុន ម៉ាណែត បានចេញមុខគាំទ្រ និងលើកទឹកចិត្តទៅកាន់លោកហេង…
រាជធានីភ្នំពេញ ៖ ស្ត្រីទីមួយកម្ពុជា គឺលោកជំទាវបណ្ឌិត ពេជ ចន្ទមុនី ហ៊ុន ម៉ាណែត បានចេញមុខគាំទ្រ និងលើកទឹកចិត្តទៅកាន់លោកហេង វិសាល និងស្រីនា បន្ទាប់ពីអ្នកទាំងពីរទទួលការរិះគន់ និងចោទប្រកាន់ពាក់ព័ន្ធការបែងចែក និងលួចលាក់អំណោយដែលត្រូវចែកជូនដល់កងទ័ពជួរមុខ ។
ការចោទប្រកាន់ដោយមិនមានមូលដ្ឋានច្បាស់លាស់នេះ បានធ្វើអោយលោកហេង វិសាល និងភរិយា ស្រីនា សម្តែងការខកចិត្ត និងបាក់ទឹកចិត្តយ៉ាងខ្លាំង ដ្បិតពួកគេទាំងពីរមិនបានប្រព្រឹត្តរឿងបែបនេះឡើយ ។
យ៉ាងណា ក្រោយផ្ទុះរឿងរ៉ាវខាងលើនេះ គេឃើញមានមហាជន មិត្តភក្តិ ជាពិសេស អ្នកសិល្បៈជាច្រើន បានចេញមុខការពារនូវភាពស្អាតស្អំរបស់អ្នកទាំងពីរ និងស្នើអោយបញ្ឈប់ការចោទប្រកាន់ខាងលើនេះ ។ អ្វីដែលកាន់តែពិសេសថែមទៀតនោះ លោកជំទាវបណ្ឌិត ពេជ ចន្ទមុន្នី ក៏បានចេញមុខលើកទឹកចិត្ត និងគាំទ្រឱ្យលោក ហេង វិសាល និងស្រីនា ចំពោះសកម្មភាពមនុស្សធម៌ និងស្នើអោយអ្នកទាំងពីរបន្តនូវសកម្មភាពមួយនេះបន្តទៀត ។
តាមរយៈការខមមិនពីក្រោមសំណេរដែលលោក ហេង វិសាល បានសរសេរបង្ហោះលើ
បណ្តាញសង្គម លោកជំទាវបានមានប្រសាសន៍ថា ជាដំបូងសូមអរគុណប្អូនប្រុសដែលបានផ្តួចផ្តើមគំនិតក្នុងការជួយដល់ជនដែលរងគ្រោះក្នុងពេលនេះ ។ បងសូមលើកទឹកចិត្តប្អូនអោយបន្តការងារនេះទៀត ។ បងគាំទ្រសកម្មភាពរបស់ប្អូនៗ ។
លោកជំទាវបណ្ឌិតបញ្ជាក់ថា ប្អូនត្រូវចងចាំថា ការធ្វើអំពើល្អមិនរង់ចាំការតបស្នងមកវិញ។ យើងមិនអាចឃាត់មាត់អ្នកដទៃបានទេ ដូច្នេះ កុំអោយពាក្យមនុស្សមួយចំនួនតូចបំផ្លាញនូវផលប្រយោជន៍ដល់មនុស្សដែលត្រូវការជាច្រើន។ keep it up for our country and for our people ។
ក្រោយឃើញការលើឡើងពីលោកជំទាវបណ្ឌិតខាងលើនេះ លោក ហេង វិសាល បានឆ្លើយតបថា ពួកយើងដែលជាប្រជាពលរដ្ឋខ្មែរ ក៏សូមអរគុណ និងដឹងគុណដូចគ្នាទៅកាន់បង ជាពិសេស គឺថ្នាក់ដឹកនាំទាំងអស់ ពួកខ្ញុំជាអ្នកដែលបានចុះទៅផ្ទាល់ ទើបដឹងថា រាជរដ្ឋាភិបាលបានរៀបចំ និងជួយពីក្រោយខ្លាំងកម្រិតណា ខ្ញុំតំណាងឲ្យក្រុមការងារ និងប្រជាជនខ្មែរទាំងអស់ សូមអរគុណបងដែលបងតែងតែយកចិត្តទុកដាក់មិនថា បងប្អូនភៀសសឹក និងកងៗជួរមុខ ពួកខ្ញុំជាប្រជាពលរដ្ឋពិតជាមានភាពកក់ក្តៅ ។
ជាការកត់សម្គាល់ ក្រោយមានការរិះគន់ និងចោទប្រកាន់ខាងលើនេះ លោក ហេង វិសាល បានចេញមុខបកស្រាយជាបន្តបន្ទាប់ ដោយបង្ហាញពីភាពស្អាតស្អំរបស់ខ្លួន និងភរិយា ។ ទោះជាយ៉ាងណា ក្រោយមានការគាំទ្រ និងលើកទឹកចិត្តជាបន្តបន្ទាប់ លោក ហេង វិសាល បានលើកឡើងតាមរយៈសំណេរបង្ហោះលើបណ្តាញសង្គមថា បងប្អូនទាំងអស់គ្នា ខ្ញុំគិតថា ជាទំនួលខុសត្រូវ និងការដឹងគុណ ខ្ញុំត្រូវតែចេញមកនិយាយរឿងនេះ ។
ជាដំបូងខ្ញុំនិងគ្រួសារ សូមអរគុណបងប្អូន មិត្តភក្តិ និងក្រុមគ្រួសារខ្មែរទាំងអស់ ដែលបានចេញមកការពារ និងលើកទឹកចិត្តដល់ពួកខ្ញុំ ខ្ញុំពិតជារំភើបមិនដឹងថា មានពាក្យអ្វីអាចរៀបរាប់អារម្មណ៍នេះបានទេ ដោយស្មោះត្រង់នៅយប់នោះអារម្មណ៍របស់ខ្ញុំពិតជាហត់ និងខកចិត្តខ្លាំងមែន ជាពិសេស នៅពេលដែលឃើញទឹកភ្នែករបស់ប្រពន្ធ ទោះបីជាខ្ញុំរៀនធម៌មែន ប៉ុន្តែចិត្តខ្ញុំនៅជាមនុស្សសុទ្ធសាធ ខាងក្នុងខ្ញុំឈឺចាប់ខ្លាំង ហើយបាក់ទឹកចិត្តខ្លាំង ប៉ុន្តែមកដល់ឥឡូវនេះ ពួកខ្ញុំលែងអីហើយ ហើយខ្ញុំមកនេះ គឺចង់ប្រាប់បងប្អូនថា ទោះខ្ញុំហត់ និងខ្លាចនៅសម្ពាធមែន តែបើប្រទេសជាតិយើងមានបញ្ហា ខ្ញុំនិងក្រុមគ្រួសារគឺនៅតែចេញមកជួយអ្វីដែលពួកខ្ញុំជួយបាន ព្រោះនេះគឺជាប្រទេសខ្ញុំ ទឹកដីកំណើតខ្ញុំ បងប្អូនខ្មែររបស់ខ្ញុំ ដូច្នេះ សូមបងប្អូនទុកចិត្តអាចឈប់បារម្ភ ហើយបន្តផ្តោតនិងសាមគ្គីគ្នាជាធ្លុងមួយ ពួកយើងតែមួយពួកយើងនឹងឈ្នះ ៕
ចែករំលែកព័តមាននេះ