ខេត្តកំពង់ចាម ៖ ក្នុងរដូវបិទនេសាទនេះ កម្លាំងខណ្ឌរដ្ឋបាលជលផលកំពង់ចាម សហការជាមួយអាជ្ញាធរមូលដ្ឋាន បានចុះបង្ក្រាបបទល្មើសនេសាទនៅតាមតំបន់ផ្សេងៗនៅជាប់ដងទន្លេ សំខាន់ការដាក់របាំងស្បៃមុងចាប់យកត្រីតូចធំ ។ ជាមួយនេះ មន្ត្រីជលផលបានធ្វើការព្រមានអ្នកដែលប្រព្រឹត្តបទល្មើសដដែលៗ…
ខេត្តកំពង់ចាម ៖ ក្នុងរដូវបិទនេសាទនេះ កម្លាំងខណ្ឌរដ្ឋបាលជលផលកំពង់ចាម សហការជាមួយអាជ្ញាធរមូលដ្ឋាន បានចុះបង្ក្រាបបទល្មើសនេសាទនៅតាមតំបន់ផ្សេងៗនៅជាប់ដងទន្លេ សំខាន់ការដាក់របាំងស្បៃមុងចាប់យកត្រីតូចធំ ។ ជាមួយនេះ មន្ត្រីជលផលបានធ្វើការព្រមានអ្នកដែលប្រព្រឹត្តបទល្មើសដដែលៗ អាចប្រឈមនឹងផ្លូវច្បាប់ចាប់បញ្ជូនទៅតុលាការ ។
តាមមន្ត្រីខណ្ឌរដ្ឋបាលជលផល បានឲ្យដឹងថា ក្រោមការណែនាំរបស់ឯកឧត្តមអភិបាលខេត្តក៏ដូចជាប្រធានមន្ទីរកសិកម្ម រុក្ខាប្រមាញ់ និងនេសាទខេត្ត នៅព្រឹកថ្ងៃទី១១ ខែសីហា ឆ្នាំ២០២៥ កម្លាំងខណ្ឌរដ្ឋបាលជលផលកំពង់ចាម សហការជាមួយអាជ្ញាធរស្រុកព្រៃឈរ អាជ្ញាធរស្រុកកងមាស កម្លាំងផ្នែកសឹករងព្រៃឈរ និងកម្លាំងសហគមន៍នេសាទសាមគ្គីឃុំមៀន ដោយមានការសម្រប
សម្រួលពីឯកឧត្តមព្រះរាជអាជ្ញា នៃអយ្យការអមសាលាដំបូងខេត្ត បានចុះបង្ក្រាបបទល្មើសជលផល ដោយរុះរើនិងបំផ្លាញចោលឧបករណ៍នេសាទល្មើសច្បាប់នៅនឹងកន្លែងតែម្ដង ។
ប្រភពដដែលបន្តថា ចំពោះបទល្មើសដែលបង្ក្រាបបានមាន ៖
ករណីទី១-ឧករណ៍លូស្បៃមុងចំនួន២មាត់ របាំងស្បៃមុងប្រវែង៩០ម៉ែត្រ បង្គោលចម្រឹងចំនួន ៤៥ដើម ចាក់លែងកូនត្រីចម្រុះជាច្រើនគីឡូក្រាម នៅចំណុចគ្របបាយ ឃុំមៀន ស្រុកព្រៃឈរ ។
ករណីទី២-ឧករណ៍លូស្បៃមុងចំនួន៧មាត់របាំងស្បៃមុងប្រវែង ២១៥ម៉ែត្រ បង្គោលចម្រឹងចំនួន ១១០ដើម ចាក់លែងកូនត្រីចម្រុះជាច្រើនគីឡូក្រាម នៅបឹងក្បាលក្រពើ ឃុំព្រែកក្របៅ ស្រុកកងមាស ។
សម្រាប់ទិសដៅបន្ត គឺត្រួតពិនិត្យនិងបង្ក្រាបបទល្មើសនៅតាមទន្លេ បឹង ព្រែក តាមបណ្តាស្រុក
ក្នុងខេត្តកំពង់ចាម និងផ្សព្វផ្សាយដល់ប្រជានេសាទ ឲ្យបញ្ឈប់ការនេសាទដោយប្រើប្រាស់ឧបករណ៍ល្មើសច្បាប់ ឱ្យមានការយល់ដឹងកាន់តែទូលំទូលាយ ដើម្បីរួមចំណែកអភិរក្សនិងថែរក្សាធនធានធម្មជាតិឲ្យសម្បូរសម្រាប់ទ្រទ្រង់ជីវភាពប្រជាពលរដ្ឋ ៕
ចែករំលែកព័តមាននេះ