រាជធានីភ្នំពេញ ៖ អ្នកនាំពាក្យរាជរដ្ឋាភិបាលកម្ពុជាបានចំអកទៅកាន់ក្រុមមន្ត្រី និងអ្នកនាំពាក្យរបស់ថៃ ដែលបានតែងតែចោទប្រកាន់មកលើកម្ពុជា មិនមែនជារឿងថ្មីនោះទេ គឺវាបានក្លាយជាទម្លាប់របស់ពួកគេទៅហើយ ។ ឯកឧត្តម ប៉ែន…
រាជធានីភ្នំពេញ ៖ អ្នកនាំពាក្យរាជរដ្ឋាភិបាលកម្ពុជាបានចំអកទៅកាន់ក្រុមមន្ត្រី និងអ្នកនាំពាក្យរបស់ថៃ ដែលបានតែងតែចោទប្រកាន់មកលើកម្ពុជា មិនមែនជារឿងថ្មីនោះទេ គឺវាបានក្លាយជាទម្លាប់របស់ពួកគេទៅហើយ ។
ឯកឧត្តម ប៉ែន បូណា អ្នកនាំពាក្យរាជរដ្ឋាភិបាលកម្ពុជា បានលើកឡើងក្នុងសន្និសីទសារព័ត៌មាននាព្រឹកថ្ងៃទី១២ ខែសីហា ឆ្នាំ២០២៥ យ៉ាងដូច្នេះថា៖ «ថៃថា ប្តឹងកម្ពុជាទៅតុលាការអន្តរជាតិICJ បន្ទាប់ពីកងទ័ពកម្ពុជាបានដើរជាន់មីនបណ្តាលឲ្យរងរបួស ហើយតែងតែចោទកម្ពុជាថា ដាក់មីនថ្មី ។ ការពិតទៅពាក្យចោទប្រកាន់ទាំងនេះ មិនមានជារឿងថ្មីនោះទេ គឺវាបានក្លាយទៅជាទម្លាប់របស់មន្ត្រី និងអ្នកនាំពាក្យថៃទៅហើយ» ។
ឯកឧត្តមអ្នកនាំពាក្យបានគូសបញ្ជាក់ថា៖ «កន្លងមក ទាំងក្រសួងការពារជាតិ ក្រសួងការបរទេស និងសហប្រតិបត្តិការអន្តរជាតិ សុទ្ធតែបានឆ្លើយបញ្ជាក់ច្បាស់ហើយ ប៉ុន្តែអ្នកនាំពាក្យថៃ និងមន្ត្រីថៃនៅតែចោទប្រកាន់ដដែលៗគ្មានមូលដ្ឋាន ក្នុងចំណងធ្វើឲ្យប៉ះពាល់កម្ពុជា ដូច្នេះ ខ្ញុំសូមបញ្ជាក់ជូនជាថ្មីម្តងទៀត របស់កម្ពុជាថាការចោទប្រកាន់របស់ថៃ មកលើកម្ពុជា គ្មានមូលដ្ឋាន គ្មានការស៊ើបអង្កេត អ្នកជំនាញណាទុកចិត្តបាន គឺចោទតែខ្លួនឯងតែម្តង ដើម្បីបង្ករឿង ដូច្នេះកម្ពុជាច្រានចោលទាំងស្រុង ចំពោះការចោទប្រកាន់គ្មានមូលដ្ឋាន និងមិនអាចទុកចិត្តបាន» ។
ឯកឧត្តមប៉ែន បូណាបានបន្ថែមថា ចាប់តាំងពីកម្ពុជាក្លាយជារដ្ឋភាគីនៅក្នុងទីក្រុងរដ្ឋអូតាវ៉ា ឆ្នាំ២០០០ កម្ពុជាបានគោរពយ៉ាងម៉ឺងម៉ាត់បំផុតនូវអនុសញ្ញានេះដោយមិនដែលបានប្រើប្រាស់មីនថ្មីនោះឡើយ។
ផ្ទុយទៅវិញ កម្ពុជាបានដោះមីននិងបំផ្លាញ គ្រាប់មីនប្រឆាំងមនុស្សជាង១លានគ្រាប់ និងគ្រាប់ផ្ទុះសល់ពីសង្គ្រាមផ្សេងៗទៀត ជាង៣លានគ្រាប់ ចេញពី ទឹកដីខ្លួន ។ មិនត្រឹមតែប៉ុណ្ណោះ កម្ពុជាបានចូលរួមការដោះមីន និងគ្រាប់ផ្សេងទៀត នៅក្រោមឆត្រអង្កការសហប្រជាជាតិ ។
អ្នកនាំពាក្យរាជរដ្ឋាភិបាលគូសបញ្ជាក់ថា៖ កម្ពុជាប្តេជ្ញាចិត្តក្នុងការគោរព កិច្ចព្រមព្រៀងបទឈប់បាញ់ ដែលបានចូលជាធរមាន ហើយសូមអំពាវនាវដល់ភាគីថៃសូមបង្ហាញការតាំង ចិត្តនិងអនុវត្តម៉ឺងម៉ាត់ចំពោះកិច្ចព្រមព្រៀងឈប់បាញ់ដូចគ្នាដែរ ។
ចំណែកអ្នកនាំពាក្យក្រសួងការពារជាតិលោកជំទាវ ម៉ាលី សុជាតា បានលើកឡើងថា ចាប់ពីម៉ោង១២រំលងអធ្រាត្រ រហូតដល់មកម៉ោង៦ព្រឹកនេះ ស្ថានភាពសភាពការណ៍ នៅតាមបណ្តោយបន្ទាត់ព្រំដែន ទិសខេត្តព្រះវិ ហារ និងឧត្តរមានជ័យបន្ត មានស្ងប់ស្ងាត់តែកងទ័ពកម្ពុជានៅតែត្រៀមយ៉ាងប្រុងប្រយ័ត្នខ្ពស់ និងប្រកាន់តួនាទីជានិច្ច។
លោកជំទាវអ្នកនាំពាក្យបានបន្តថា តាមកិច្ចប្រជុំគណៈកម្មការព្រំដែនទូទៅកម្ពុជា-ថៃ កាលពីថ្ងៃទី៧ ខែសីហា ឆ្នាំ២០២៥ នៅប្រទេសម៉ាឡេស៊ីបានបង្ហាញពីការតាំងចិត្តរួមរបស់ភាគីទាំងពីរក្នុងការសហការគ្នា ដើម្បីជំរុញឲ្យសន្តិភាពយូរអង្វែង ស្ថិរភាព កិច្ចសហប្រតិបត្តិការ និងការអភិវឌ្ឍន៍ ដើម្បីផលប្រយោជន៍ របស់ប្រទេសទាំងពីរ។ ដូច្នេះ ប្រទេសទាំងពីរត្រូវបង្ហាឆន្ទៈ និងការប្តេជ្ញាចិត្តស្របនឹងអ្វីដែលបានឯកភាពគ្នា។
ជាមួយគ្នានោះដែរ លោកជំទាវអ្នកនាំពាក្យក៏បានលើកពីការព្រមព្រៀងរបស់ភាគីកម្ពុជា -ថៃថា ភាគីទាំងពីរបានគោរពច្បាប់មនុស្សធម៌អន្តរជាតិ ក្នុងការប្រព្រឹត្តិចំពោះទាហាន ដែលត្រូវបាន ចាប់ខ្លួនរួមមាន ការផ្តល់ការរស់នៅ ផ្តល់ម្ហូបអាហារ ការថែទាំសុខភាព ក្នុងករណីមានរបួស ៕
ចែករំលែកព័តមាននេះ