ខេត្តកំពង់ស្ពឺ៖ បន្ទាប់ពីសារព័ត៌មានកោះសន្តិភាព ធ្វើការផ្សព្វផ្សាយរឿងស្រូវរបស់ប្រជាពលរដ្ឋចំនួន០២ឃុំ គឺឃុំវល្លិ៍សរ និងឃុំព្នាយ នៃស្រុកសំរោងទង ក្នុងខេត្តកំពង់ស្ពឺជាច្រើនហិកតា ដែលស្រែកថ្ងូរ ពេលកំពុងស្វិតក្រៀមគ្មានភ្លៀងធ្លាក់និងគ្មានទឹកបូម តាមប្រឡាយរងរីងស្ងួតអស់នោះ…
ខេត្តកំពង់ស្ពឺ៖ បន្ទាប់ពីសារព័ត៌មានកោះសន្តិភាព ធ្វើការផ្សព្វផ្សាយរឿងស្រូវរបស់ប្រជាពលរដ្ឋចំនួន០២ឃុំ គឺឃុំវល្លិ៍សរ និងឃុំព្នាយ នៃស្រុកសំរោងទង ក្នុងខេត្តកំពង់ស្ពឺជាច្រើនហិកតា ដែលស្រែកថ្ងូរ ពេលកំពុងស្វិតក្រៀមគ្មានភ្លៀងធ្លាក់និងគ្មានទឹកបូម តាមប្រឡាយរងរីងស្ងួតអស់នោះ ទើបនៅថ្ងៃទី៩ ខែសីហា ឆ្នាំ២០២៥ គេឃើញអស់លោកមន្ទីរជំនាញរត់ខ្វែងដៃ ខ្វែងជើង ដាក់ម៉ាសុីនបូមទឹកពីប្រឡាយមេ បង្ហូរទៅប្រឡាយរង សង្ស័យថ្នាក់លើដាប់ខ្លាំងហើយមើលទៅ។
ការដែលមន្ទីរជំនាញដាក់ម៉ាសុីនបូមទឹកនេះ គឺកើតមាន កូនរដូវប្រាំងក្នុងខែវស្សា បាននិងកំពុងប៉ះពាល់ដល់ដំណាំស្រូវប្រជាកសិករចំនួន ៤ឃុំ~សង្កាត់ នៃខេត្តកំពង់ស្ពឺ។
ប្រធានមន្ទីរកសិកម្មរុក្ខាប្រមាញ់ និងនេសាទខេត្តកំពង់ស្ពឺ លោក យឹម ណន បាននិយាយប្រាប់ក្រុមសារព័ត៌មានក្នុងខេត្តកំពង់ស្ពឺថា÷ ចាប់តាំងពីពាក់កណ្តាលខែកក្កដា រហូតដល់ដើមខែសីហា ឆ្នាំ២០២៥ កូនរដូវប្រាំងបានបង្កឱ្យដំណាំស្រូវរបស់ប្រជាពលរដ្ឋជាង ២០០ហិកតា បានរងផលប៉ះពាល់ដោយសារតែមិនមានភ្លៀងធ្លាក់ ក្នុងនោះស្រុកសំរោងទងចំនួន ០៣ឃុំ គឺឃុំវល្លិ៍ស ឃុំព្នាយ និងឃុំសំរោងទង ប៉ះពាល់លើផ្ទៃដីស្រែចំនួន ១៦៨ហិកតា ក្រុងច្បារមន ០១សង្កាត់ គឺសង្កាត់សុព័រទេព ប៉ះពាល់លើផ្ទៃដីស្រែចំនួន ៦៨ហិកតា។
លោកប្រធានមន្ទីរកសិកម្មរូបនោះ បាននិយាយបន្តថា ក្រោយទទួលបានការណែនាំពីអភិបាលខេត្តកំពង់ស្ពឺ លោក ជាម ច័ន្ទសោភ័ណ មន្ត្រីជំនាញនៃមន្ទីរកសិកម្ម រុក្ខាប្រម៉ាញ់ និងនេសាទ និងមន្ទីរធនធានទឹក និងឧតុនិយម ខេត្តកំពង់ស្ពឺ បានចុះអន្តរាគមន៍បន្ទាន់ដល់ដំណាំស្រូវទាំងនោះ ដោយដាក់ម៉ាស៊ីនបូមទឹកធុនធំចំនួន ០២គ្រឿង លើគោលដៅ០២កន្លែងផ្សេងគ្នា ដើម្បីបូមទឹកចេញពីប្រឡាយមេរលាំងជ្រៃខាងជើង និងស្ទឹងព្រែកត្នោត ដាក់ចូលទៅក្នុងប្រឡាយតូចៗឱ្យប្រជាកសិករដែលមានលទ្ធភាពអាចបូមទាញទឹកបញ្ចូលទៅក្នុងស្រែរៀងខ្លួន ហើយចំពោះអ្នកគ្មានលទ្ធភាពនិងស្រែនៅឆ្ងាយពីប្រឡាយរណបនេះ មន្ទីរនឹងពិនិត្យលទ្ធភាពក្នុងការជួយអន្តរាគមន៍បន្ថែម។
ការជួយអន្តរាគមន៍បន្ទាន់នេះ ប្រធានមន្ទីរកសិកម្ម លោក យឹម ណន ក៏បានបញ្ជាក់ដែរថា ឥទ្ធិពលនៃកូនរដូវប្រាំងបានគ្រប់ដណ្តប់លើផ្ទៃដីទូទាំងខេត្ត តែផលប៉ះពាល់លើដំណាំស្រូវ និងដំណាំផ្សេងៗកើតមានតែលើស្រុកសំរោងទង និងក្រុងច្បារមនតែប៉ុណ្ណោះ។ ក្រៅពីនេះមិនទាន់មានការរាយការណ៍ពីផលប៉ះពាល់ណាមួយនៅឡើយទេ ប៉ុន្តែប្រសិនកូនរដូវប្រាំងអូសបន្លាយមិនមានភ្លៀងធ្លាក់នាពេលខាងមុខ ផលប៉ះពាល់ដែលបង្កឡើងដោយកូនរដូវប្រាំងនេះនឹងអាចមានការកើនបន្ថែមទៀត ។
ព័ត៌មានលម្អិតនឹងមានផ្សាយនៅលើទំព័រកាសែតកោះសន្តិភាព ៕
ចែករំលែកព័តមាននេះ