អស់ល្អនឹងគ្នា! លោក ត្រាំ បញ្ជាឱ្យដំឡើងពន្ធឥណ្ឌាដល់ ៥០% ព្រោះមិនព្រមឈប់ទិញប្រេងពីរុស្ស៊ី
សហរដ្ឋអាមេរិក ៖ ប្រធានាធិបតីអាមេរិក លោក ដូណាល់ ត្រាំ (Donald Trump) បានចេញបទបញ្ជាប្រតិបត្តិមួយ ជាមួយការដាក់ពន្ធ…
សហរដ្ឋអាមេរិក ៖ ប្រធានាធិបតីអាមេរិក លោក ដូណាល់ ត្រាំ (Donald Trump) បានចេញបទបញ្ជាប្រតិបត្តិមួយ ជាមួយការដាក់ពន្ធ ២៥% បន្ថែមទៀតលើទំនិញនាំចូលពីប្រទេសឥណ្ឌា ពាក់ព័ន្ធនឹងរឿងប្រទេសមួយនេះទិញប្រេងពីរុស្ស៊ី។ ដូច្នេះពន្ធសរុបលើការនាំចេញទំនិញឥណ្ឌាទៅកាន់សហរដ្ឋអាមេរិកកើនដល់ ៥០% ដែលជាអត្រាខ្ពស់បំផុតដែលប្រទេសមហាសេដ្ឋកិច្ចពិភពលោកមួយនេះ ដាក់លើដៃគូពាណិជ្ជកម្មខ្លួន។
ប្រភពពីសារព័ត៌មាន BBC នៅថ្ងៃទី៧ ខែសីហា ឆ្នាំ២០២៥ បានឱ្យដឹងថា អត្រាពន្ធថ្មីនឹងចូលជាធរមានក្នុងរយៈពេល២១ថ្ងៃ ឬថ្ងៃទី២៧ ខែសីហា ខាងមុខនេះ។ ទោះយ៉ាងណាការឆ្លើយតបពីក្រសួងការបរទេសឥណ្ឌា កាលពីថ្ងៃទី៦ ខែសីហា បានបញ្ជាក់ថា រដ្ឋាភិបាលឥណ្ឌាបានបញ្ជាក់យ៉ាងច្បាស់ហើយនូវគោលជំហរខ្លួនលើការនាំចូលប្រេងពីរុស្ស៊ី ហើយបានរំលឹកឡើងវិញថា ពន្ធគយនេះ គឺជារឿងអយុត្តិធម៌ មិនត្រឹមត្រូវ និងមិនសមហេតុសមផល។
សេចក្តីថ្លែងការណ៍ខ្លីមួយបានឱ្យដឹងដូច្នេះថា «ដូច្នេះវាជារឿងអកុសលខ្លាំងណាស់ ដែលអាមេរិកជ្រើសរើសការដាក់ពន្ធបន្ថែមលើឥណ្ឌាសម្រាប់សកម្មភាព ដែលប្រទេសមួយចំនួនផ្សេងទៀតកំពុងគិតគូរដល់ផលប្រយោជន៍ជាតិពួកគេ។ ឥណ្ឌានឹងចាត់វិធានការទាំងអស់ដែលចាំបាច់ ដើម្បីការពារផលប្រយោជន៍ជាតិរបស់ខ្លួន»។
គួររំលឹកថា ប្រធានាធិបតីអាមេរិកបានព្រមានមុននេះថា លោកនឹងដំឡើងពន្ធ ព្រោះតែឥណ្ឌាមិនខ្វាយខ្វល់ថាមានមនុស្សប៉ុន្មាននាក់នៅអ៊ុយក្រែនត្រូវបានសម្លាប់ដោយម៉ាស៊ីនសង្គ្រាមរុស្ស៊ី។ ជាក់ស្តែង នៅថ្ងៃទី៦ ខែសីហា សេតវិមានបានចេញសេចក្តីថ្លែងការណ៍មួយថា «សកម្មភាពរបស់សហព័ន្ធរុស្ស៊ីនៅអ៊ុយក្រែន បង្កការគំរាមកំហែងជាបន្តបន្ទាប់ដល់សន្តិសុខជាតិ និងគោលនយោបាយការបរទេសរបស់អាមេរិក ដោយត្រូវការវិធានការខ្លាំងជាងមុន ដើម្បីដោះស្រាយភាពអាសន្នជាតិ»។
សេចក្តីថ្លែងការណ៍ក៏បានបន្ថែមថា ការនាំចូលប្រេងឆៅរបស់ឥណ្ឌាពីរុស្ស៊ីធ្វើឱ្យខូចខាតដល់កិច្ចខិតខំប្រឹងប្រែងរបស់សហរដ្ឋអាមេរិកក្នុងការប្រឆាំងនឹងសកម្មភាពរុស្ស៊ីនៅអ៊ុយក្រែន។ សហរដ្ឋអាមេរិកនឹងកំណត់ថា តើប្រទេសណាផ្សេងទៀតនាំចូលប្រេងពីរុស្ស៊ី ក៏ដូចជានឹងទទួលអនុសាសន៍បន្ថែមចំពោះសកម្មភាពរបស់លោកប្រធានាធិបតី។
ប្រេង និងឧស្ម័ន គឺជាការនាំចេញធំជាងគេរបស់រុស្ស៊ី ហើយអ្នកទិញធំបំផុតរបស់ពួកគេ រួមមាន ប្រទេសចិន ឥណ្ឌា និងតួកគី។ បច្ចុប្បន្នរុស្ស៊ី គឺជាអ្នកលក់ប្រេងដ៏ធំបំផុតទៅកាន់ប្រទេសឥណ្ឌា ដែលស្មើនឹងជាង ៣៥% នៃការផ្គត់ផ្គង់សរុបរបស់ប្រទេសនេះឥណ្ឌា។ ទិន្នន័យពាណិជ្ជកម្មដែលបានចែករំលែកជាមួយទីភ្នាក់ងារសារព័ត៌មាន Reuters បានបង្ហាញថា ឥណ្ឌាបានទិញប្រេងពីរុស្ស៊ីប្រហែល ១,៧៥លានបារ៉ែលក្នុងមួយថ្ងៃក្នុងរយៈពេល៦ខែដំបូងនៃឆ្នាំនេះ។
ពន្ធបន្ថែមនឹងមានន័យថា គឺជាកាតព្វកិច្ច ៥០% លើការនាំចេញសំខាន់ៗរបស់ឥណ្ឌាដូចជា វាយនភ័ណ្ឌ ត្បូង និងគ្រឿងអលង្ការ គ្រឿងបន្លាស់រថយន្ត អាហារសមុទ្រ ដែលនឹងប៉ះពាល់ដល់វិស័យបង្កើតការងារសំខាន់ៗប្រទេសនេះ។ ចំណែកគ្រឿងអេឡិចត្រូនិច រួមទាំង iPhone ខណៈដែលឱសថនៅតែត្រូវបានលើកលែងពន្ធ សម្រាប់ពេលនេះ៕ ប្រភព ៖ BBC
ចែករំលែកព័តមាននេះ