ប្រទេសម៉ាឡេស៊ី ៖ អាជ្ញាធរម៉ាឡេស៊ីក្នុងរដ្ឋចូហរ (Johor) បានចាប់ផ្តើមការស៊ើបអង្កេតមួយ បន្ទាប់ពីរថយន្តចុះបញ្ជីនៅប្រទេសសិង្ហបុរី១គ្រឿង ត្រូវបានប្រទះឃើញចាក់សាំងប្រភេទ RON95 ដែលជាសាំងទទួលបានការឧបត្ថម្ភពិសេសពីរដ្ឋាភិបាល សម្រាប់លក់ជូនតែប្រជាជនម៉ាឡេស៊ីប៉ុណ្ណោះ។…
ប្រទេសម៉ាឡេស៊ី ៖ អាជ្ញាធរម៉ាឡេស៊ីក្នុងរដ្ឋចូហរ (Johor) បានចាប់ផ្តើមការស៊ើបអង្កេតមួយ បន្ទាប់ពីរថយន្តចុះបញ្ជីនៅប្រទេសសិង្ហបុរី១គ្រឿង ត្រូវបានប្រទះឃើញចាក់សាំងប្រភេទ RON95 ដែលជាសាំងទទួលបានការឧបត្ថម្ភពិសេសពីរដ្ឋាភិបាល សម្រាប់លក់ជូនតែប្រជាជនម៉ាឡេស៊ីប៉ុណ្ណោះ។ នេះបើតាមប្រភពពីសារព័ត៌មាន VnExpress ចេញផ្សាយនៅថ្ងៃទី៦ ខែសីហា ឆ្នាំ២០២៥។
លោកស្រី Lilis Saslinda Pornomo នាយកសាខារដ្ឋចូហរ នៃក្រសួងពាណិជ្ជកម្មរបស់ម៉ាឡេស៊ី បានថ្លែងថា អាជ្ញាធរបានដឹងពីរូបភាពដែលបង្ហាញពីរថយន្តដែលបានចុះបញ្ជីនៅបរទេស ដែលគេជឿថាជាកម្មសិទ្ធិរបស់ប្រជាជនសិង្ហបុរី កំពុងចាក់សាំង RON95 នៅស្ថានីយ៍ប្រេងឥន្ធនៈមួយកន្លែងក្នុងទីក្រុងចូហរបារូ (Johor Bahru) ដ្បិតទីក្រុងដែលជាមជ្ឈមណ្ឌលហិរញ្ញវត្ថុ និងពាណិជ្ជកម្មនៃភាគខាងត្បូងប្រទេសម៉ាឡេស៊ីមួយនេះ ស្ថិតនៅកាត់ព្រំដែនពីប្រទេសសិង្ហបុរី។
លោកស្រីបាននិយាយថា «ការស៊ើបអង្កេតហ្មត់ចត់កំពុងត្រូវបានធ្វើឡើង ដើម្បីកំណត់ទីតាំងនៃស្ថានីយ៍ដែលពាក់ព័ន្ធ និងកំណត់ថា តើមានការរំលោភលើបទប្បញ្ញត្តិដែលមានស្រាប់ឬយ៉ាងណា?
រូបថតដែលត្រូវបានចែកចាយលើបណ្តាញសង្គម ចាប់តាំងពីថ្ងៃអាទិត្យសប្តាហ៍មុន បានបង្ហាញពីរថយន្ត១គ្រឿងមិនត្រឹមតែបានចាក់សាំងប្រភេទ RON95 ប៉ុណ្ណោះទេ ប៉ុន្តែម្ចាស់រថយន្តថែមទាំងបូមសាំងដាក់ក្នុងប៊ីដុងដ៏ធំមួយថែមទៀតផង។
គួររំលឹកថា សាំង RON95 ទទួលបានការឧបត្ថម្ភពីរដ្ឋាភិបាលម៉ាឡេស៊ី ដើម្បីជួយកាត់បន្ថយការចំណាយរបស់ប្រជាជន ដោយត្រូវបានលក់ក្នុងតម្លៃត្រឹម ២,០៥រីងហ្គីត ឬស្មើនឹង ៤៨សេនដុល្លារអាមេរិកប៉ុណ្ណោះក្នុង១លីត្រ។ សាំងប្រភេទនេះ ត្រូវបានបម្រុងទុកយ៉ាងតឹងរ៉ឹង សម្រាប់លក់ជូនតែប្រជាជនម៉ាឡេស៊ីប៉ុណ្ណោះ ដោយក្បាលចាក់ប្រេងមានពណ៌លឿងជាសំគាល់ ខណៈដែលយានយន្តដែលបានចុះបញ្ជីនៅបរទេសត្រូវបានហាមឃាត់មិនឱ្យទិញសាំងប្រភេទនេះឡើយ ហើយត្រូវបានអនុញ្ញាតឱ្យទិញសាំងប្រភេទខ្ពស់ និងមានតម្លៃថ្លៃជាងដូចជា RON97 ឬ RON100 ជំនួសវិញ។ ប្រតិបត្តិករស្ថានីយ៍ប្រេងឥន្ធនៈណាមួយដែលហ៊ានលក់សាំង RON95 ទៅឱ្យយានយន្តដែលចុះបញ្ជីនៅបរទេសអាចប្រឈមការផាកពិន័យធ្ងន់ធ្ងរបំផុតរហូតដល់ ១លានរីងហ្គីត ស្មើនឹងជាង ២៣៦ ០០០ដុល្លារ ឬជាប់ពន្ធនាគាររហូតដល់៣ឆ្នាំ។
លោកស្រី Lilis Saslinda បាននិយាយថា ប្រសិនបើការស៊ើបអង្កេតបញ្ជាក់ពីបទល្មើសណាមួយ វិធានការសមស្របនឹងត្រូវបានធ្វើឡើងចំពោះភាគីពាក់ព័ន្ធ រួមទាំងប្រតិបត្តិករស្ថានីយ៍ប្រេងឥន្ធនៈផងដែរ ប្រសិនបើរកឃើញថាមានការធ្វេសប្រហែស ឬមានការជាប់ពាក់ព័ន្ធ។ លោកស្រីក៏បានសង្កត់ធ្ងន់ថា ការហាមឃាត់ការលក់សាំង RON95 ទៅឱ្យយានយន្តដែលបានចុះបញ្ជីនៅបរទេសនៅតែជាធរមាន ហើយបានព្រមានដល់ប្រតិបត្តិករស្ថានីយ៍ប្រេងឥន្ធនៈទាំងអស់ឱ្យគោរពតាមការណែនាំរបស់រដ្ឋាភិបាលយ៉ាងតឹងរ៉ឹង។
ទន្ទឹមជាមួយគ្នានោះ អាជ្ញាធរបានអំពាវនាវដល់សាធារណជនទាំងអស់ឱ្យជួយក្នុងការស៊ើបអង្កេត ដោយរាយការណ៍ពីភាពមិនប្រក្រតីណាមួយដែលទាក់ទងនឹងការលក់ប្រេងសាំងឧបត្ថម្ភធនពីរដ្ឋាភិបាលដោយខុសច្បាប់ទៅឱ្យយានយន្តដែលមិនបានចុះបញ្ជីក្នុងប្រទេសម៉ាឡេស៊ី៕
ចែករំលែកព័តមាននេះ