ទីក្រុងញូវដេលី ៖ ប្រទេសឥណ្ឌាបានហៅការគំរាមរបស់ប្រធានាធិបតីសហរដ្ឋអាមេរិក លោក ដូណាល់ ត្រាំ (Donald Trump) ចំពោះការដំឡើងពន្ធខ្ពស់លើខ្លួន ដោយសារការទិញប្រេងពីរុស្ស៊ីនោះថា…
ទីក្រុងញូវដេលី ៖ ប្រទេសឥណ្ឌាបានហៅការគំរាមរបស់ប្រធានាធិបតីសហរដ្ឋអាមេរិក លោក ដូណាល់ ត្រាំ (Donald Trump) ចំពោះការដំឡើងពន្ធខ្ពស់លើខ្លួន ដោយសារការទិញប្រេងពីរុស្ស៊ីនោះថា គឺជារឿងមិនត្រឹមត្រូវ និងមិនសមហេតុសមផល។ នេះបើ តាមប្រភពពីសារព័ត៌មាន BBC ចេញផ្សាយនៅថ្ងៃទី៥ ខែសីហា ឆ្នាំ២០២៥។
នៅក្នុងការបង្ហោះលើបណ្តាញសង្គម Truth Social លោក ត្រាំ បានព្រមានថា លោកនឹងដំឡើងពន្ធដោយនិយាយថា ឥណ្ឌាមិនខ្វល់ថាមានមនុស្សប៉ុន្មាននាក់នៅអ៊ុយក្រែនត្រូវបានសម្លាប់ដោយម៉ាស៊ីនសង្គ្រាមរបស់រុស្ស៊ីនោះទេ។
បច្ចុប្បន្នឥណ្ឌាស្ថិតក្នុងចំណោមប្រទេសទិញប្រេងឆៅដ៏ធំបំផុតរបស់រុស្ស៊ី ដោយពួកគេបានក្លាយជាទីផ្សារនាំចេញដ៏សំខាន់មួយសម្រាប់ទីក្រុងមូស្គូ បន្ទាប់ពីបណ្តាប្រទេសនៅអឺរ៉ុបមួយចំនួនបានកាត់បន្ថយការធ្វើពាណិជ្ជកម្ម នៅពេលរុស្ស៊ីចាប់ផ្តើមការឈ្លានពានពេញលេញរបស់ខ្លួនលើអ៊ុយក្រែនក្នុងឆ្នាំ២០២២។
យ៉ាងណាមិញ លោក ត្រាំ មិនបានបញ្ជាក់ថា តើពន្ធថ្មីនឹងទៅជាយ៉ាងណានោះទេ ប៉ុន្តែវាកើតឡើងតែប៉ុន្មានថ្ងៃប៉ុណ្ណោះ បន្ទាប់ពីលោកបានបង្ហាញការយកពន្ធ ២៥% លើទំនិញពីប្រទេសឥណ្ឌា។
នៅក្នុងសេចក្តីថ្លែងការណ៍មួយ អ្នកនាំពាក្យក្រសួងការបរទេសឥណ្ឌា លោក Randhir Jaiswal បានថ្លែងថា អាមេរិកបានលើកទឹកចិត្តឥណ្ឌាឱ្យនាំចូលឧស្ម័នពីរុស្ស៊ីនៅពេលចាប់ផ្តើមជម្លោះ សម្រាប់ការពង្រឹងស្ថិរភាពទីផ្សារថាមពលពិភពលោក។ លោកបន្តថា ឥណ្ឌាបានចាប់ផ្តើមនាំចូលពីរុស្ស៊ី ដោយសារតែការផ្គត់ផ្គង់ត្រូវបានបង្វែរពីអឺរ៉ុប បន្ទាប់ពីការផ្ទុះឡើងនៃជម្លោះ។ ជាមួយគ្នានោះ ឥណ្ឌាក៏បានរិះគន់អាមេរិក ដែលជាដៃគូពាណិជ្ជកម្មដ៏ធំបំផុតរបស់ខ្លួន សម្រាប់ការគំរាមកំហែងពន្ធគយ នៅពេលដែលអាមេរិកខ្លួនឯងនៅតែធ្វើពាណិជ្ជកម្មជាមួយរុស្ស៊ី។ ជាក់ស្តែង កាលពីឆ្នាំមុន អាមេរិកបានជួញដូរទំនិញមានតម្លៃប្រមាណ ៣,៥ពាន់លានដុល្លារជាមួយរុស្ស៊ី បើទោះបីជាមានទណ្ឌកម្មតឹងរ៉ឹងនិងពន្ធគយក៏ដោយ។
សេចក្តីថ្លែងការណ៍របស់ក្រសួងការបរទេសបានបញ្ជាក់ជូនថា ដូចជាប្រទេសសេដ្ឋកិច្ចធំផ្សេងទៀតដែរ ឥណ្ឌានឹងចាត់វិធានការចាំបាច់ទាំងអស់ ដើម្បីការពារផលប្រយោជន៍ជាតិ និងសន្តិសុខសេដ្ឋកិច្ច។ ការគំរាមដំឡើងពន្ធលើឥណ្ឌា គឺជារឿងមិនត្រឹមត្រូវ និងមិនសមហេតុសមផល។
ការបង្ហោះលើបណ្តាញសង្គម Truth Social ចុងក្រោយរបស់លោក ត្រាំ បានធ្វើឱ្យមានការរិះគន់ម្តងទៀតពីឥណ្ឌា ដោយលោកបានសរសេរថា ឥណ្ឌាមិនត្រឹមតែទិញប្រេងរុស្ស៊ីក្នុងបរិមាណដ៏ច្រើនប៉ុណ្ណោះទេ ប៉ុន្តែពួកគេក៏ទិញប្រេងជាច្រើនហើយលក់វាលើទីផ្សារដោយបើកចំហសម្រាប់ប្រាក់ចំណេញដ៏ច្រើន។ លោកបន្ថែមថា «ដោយសារតែបញ្ហានេះ ខ្ញុំនឹងត្រូវដំឡើងពន្ធយ៉ាងច្រើនដែលឥណ្ឌាត្រូវបង់មកឱ្យសហរដ្ឋអាមេរិក»។
បើយោងតាមសេចក្តីរាយការណ៍ពីសារព័ត៌មាន Bloomberg, Reuters និង New York Times កាលពីពេលថ្មីៗនេះ ដោយបានស្រង់ប្រភពពីអ្នកស្និទ្ធ និងមន្ត្រីរដ្ឋាភិបាលឥណ្ឌា សុំមិនបញ្ចេញឈ្មោះ ដែលដឹងពីបញ្ហានេះបានបង្ហើបថា រដ្ឋាភិបាលឥណ្ឌាមិនបានបញ្ជាឱ្យបណ្តារោងចក្រចម្រាញ់ប្រេងឥណ្ឌា បញ្ឈប់ការទិញប្រេងពីរុស្ស៊ីនោះទេ។
សូមជម្រាបថា រុស្ស៊ីគឺជាអ្នកផ្គត់ផ្គង់ប្រេងឆៅកំពូលដល់ឥណ្ឌា ដែលទទួលបន្ទុកប្រហែល ៣៥%។ ឥណ្ឌាបានបញ្ជាក់ហើយថា ក្នុងនាមជាប្រទេសនាំចូលថាមពលដ៏សំខាន់ ខ្លួនត្រូវតែស្វែងរកការផ្គត់ផ្គង់តម្លៃថោកបំផុត ដើម្បីការពារប្រជាជនប្រឆាំងនឹងការកើនឡើងថ្លៃដើម។ ភាពជាដៃគូនេះហើយ គឺជាចំណុចជម្លោះសម្រាប់អាមេរិក ជាពិសេសនៅមុនពេលការគំរាមដាក់ទណ្ឌកម្មរបស់អាមេរិកនៅពេលខាងមុខនេះ ប្រឆាំងនឹងដៃគូពាណិជ្ជកម្មរបស់រុស្ស៊ី ជុំវិញសង្គ្រាមនៅអ៊ុយក្រែន៕ ដកស្រង់ ៖ BBC Reuters និង The Guardian
ចែករំលែកព័តមាននេះ