រាជធានីភ្នំពេញ ៖ ជាងកញ្ចក់ម្នាក់បានចូលក្នុងទូរកុងតឺន័រជាមួយកម្មករផ្សេងទៀត តែជាអកុសលពេលកំពុងលើកកញ្ចក់ ស្រាប់តែរអិលធ្លាក់សង្កត់ពីលើ បណ្ដាលឲ្យស្លាប់យ៉ាងអាណោចអាធ័ម កាលពីវេលាម៉ោង៨និង៣០នាទីយប់ថ្ងៃទី០២ ខែ សីហា ឆ្នាំ…
រាជធានីភ្នំពេញ ៖ ជាងកញ្ចក់ម្នាក់បានចូលក្នុងទូរកុងតឺន័រជាមួយកម្មករផ្សេងទៀត តែជាអកុសលពេលកំពុងលើកកញ្ចក់ ស្រាប់តែរអិលធ្លាក់សង្កត់ពីលើ បណ្ដាលឲ្យស្លាប់យ៉ាងអាណោចអាធ័ម កាលពីវេលាម៉ោង៨និង៣០នាទីយប់ថ្ងៃទី០២ ខែ សីហា ឆ្នាំ ២០២៥ នៅចំណុចផ្សារទំនើប១៩១៩ តាមផ្លូវ៦០ម៉ែត្រ ភូមិព្រែកតានូ សង្កាត់ចាក់អង្រែលើ ខណ្ឌមានជ័យ រាជធានីភ្នំពេញ ។
ជនរងគ្រោះឈ្មោះ ហឿន ហំ ភេទប្រុស អាយុ៣៤ឆ្នាំ មុខរបរជាងកញ្ចក់ ស្នាក់នៅបន្ទប់ជួល សង្កាត់ដង្កោ ខណ្ឌដង្កោ មានស្រុកកំណើតនៅភូមិព្រៃរុង ឃុំពានណង ស្រុក ស្វាយអន្ទរខេត្តព្រៃវែង ។
ស្ត្រីជាប្រពន្ធបានអោយដឹងថា មុនកើតហេតុប្ដីគាត់បានចេញពីផ្ទះទៅកន្លែងធ្វើការព្រោះមានកញ្ចក់ចូលអោយទៅជួយមើល ពេលនោះនាងប្រាប់ប្ដីថាកុំទៅបងយប់ហើយ ចាំស្អែកតែប្ដីមិនស្ដាប់ជិះម៉ូតូទៅរហូតដល់ម៉ោងជាង៩យប់មានអ្នកកន្លែងធ្វើការតេប្រាប់ថាប្ដីគាត់ស្លាប់ហើយ លឺបែបនេះហៅអ្នកជួលបន្ទប់ដូចគ្នាអោយជួយជូនមកកន្លែងកើតហេតុនិងបីកូនស្រីតូចអាយុ១ឆ្នាំ៣ខែទៅជាមួយ ។
ប្រភពដដែលបន្តទៀតថា ពេលសួរនាំអ្នកធ្វើការជាមួយប្ដីថា មុនកើតហេតុ បើកទូរកុងតឺន័រដើម្បីលើកកញ្ចក់ម្ដង១ផ្ទាំងចេញ តែមិនដឹងយ៉ាងម៉េចកញ្ចក់បានរអិលមកទាំងអស់ ហើយកម្មករផ្សេងរត់ចេញទាន់ នៅសល់តែជនរងគ្រោះកញ្ចក់សង្កត់ពីលើមិនដឹងថាស្លាប់រស់ក៏នាំគ្នាជួយកាយកញ្ចក់ម្ដងបន្តិចៗយូរដែរទម្រាំងយកកញ្ចក់ចេញពីជនរងគ្រោះ និងហៅរថយន្តសង្គ្រោះមន្ទីរពេទ្យបង្អែកច្បារអំពៅបានមកដល់គ្រូពេទ្យបានពិនិត្យថាប្ដីគាត់បានដាច់ខ្យល់ស្លាប់ហើយ ។
ស្ត្រីជាប្រពន្ធជនរងគ្រោះប្រាប់ថា មិនដឹងគិតយ៉ាងម៉េចទេ សព្វថ្ងៃគាត់មានកូនតូចមិនទាន់ធ្វើការងារអីបាន សង្ឃឹមថាកន្លែងធ្វើការជួយផ្ដល់ថវិការធ្វើបុណ្យសពនិងសល់ខ្លះសម្រាប់ចិញ្ចឹមកូនតូចទម្រាំគាត់បានរឹងដៃជើងអាចរកការងារធ្វើបានដោយសារប្ដីគាត់ស្លាប់គ្រោះថ្នាក់នៅពេលបំពេញម៉ោងការងារ ។
ក្រោយកើតហេតុ សមត្ថកិច្ចនិងការិល័យកោសល្យវិច្ច័យស្នងការដ្ឋាននគរបាលរាជធានីភ្នំពេញដើម្បីពិនិត្យសពរួចប្រគល់ឲ្យគ្រួសារយកទៅធ្វើបុណ្យតាមប្រពៃណីនិងខាងក្រុមហ៊ុនបានផ្ដល់ថវិការមួយចំនួនធំដល់គ្រួសារសពយកទៅធ្វើបុណ្យតាមប្រពៃណីនៅស្រុកកំណើត៕
ចែករំលែកព័តមាននេះ