រាជធានីភ្នំពេញ ៖ ក្នុងកិច្ចប្រជុំកងទ័ពយុទ្ធភូមិភាគទី៣កម្ពុជា និងបញ្ជាការដ្ឋានការពារព្រំដែនខេត្តច័ន្ទបុរី និងខេត្តត្រាត របស់ប្រទេសថៃ តាមរយៈហ្សូម (Zoom) វេលាម៉ោង៩ព្រឹក ថ្ងៃទី២៩…
រាជធានីភ្នំពេញ ៖ ក្នុងកិច្ចប្រជុំកងទ័ពយុទ្ធភូមិភាគទី៣កម្ពុជា និងបញ្ជាការដ្ឋានការពារព្រំដែនខេត្តច័ន្ទបុរី និងខេត្តត្រាត របស់ប្រទេសថៃ តាមរយៈហ្សូម (Zoom) វេលាម៉ោង៩ព្រឹក ថ្ងៃទី២៩ ខែកក្កដា ឆ្នាំ២០២៥ ខាងភាគីថៃ បានស្នើបោសសម្អាតមីនតាមព្រំដែន តែខាងកម្ពុជាឲ្យរង់ចាំកិច្ចប្រជុំគណៈកម្មាធិការព្រំដែនទូទៅកម្ពុជា-ថៃ (GBC) ដែលនឹងធ្វើឡើងនៅថ្ងៃទី៤ ខែសីហា ឆ្នាំ២០២៥ រវាងក្រសួងការពារជាតិកម្ពុជា និងថៃ ជាមុនសិន នេះបើតាមការបញ្ជាក់ពីលោកជំទាវ ឧត្តមសេនីយ៍ឯក ម៉ាលី សុជាតា អនុរដ្ឋលេខាធិការ និងជាអ្នកនាំពាក្យក្រសួងការពារជាតិ ។
បញ្ជាក់ប្រាប់បណ្តាញសារព័តមាននារសៀល ថ្ងៃទី២៩ ខែកក្កដា ឆ្នាំ២០២៥ អ្នកនាំពាក្យក្រសួងការពារជាតិកម្ពុជា បានថ្លែងថា ក្នុងកិច្ចប្រជុំនេះ បានដំណើរការល្អ ហើយបានឯកភាពគ្នា ក្នុងចំណុចមួយចំនួន។ ក្នុងកិច្ចប្រជុំនេះដែរ ខាងភាគីថៃ បានស្នើសុំមួយចំនួន ដូចជា ៖
ទី១-មិនត្រូវបង្កើនកម្លាំងលើសកម្រិត ដែលមាននាពេលបច្ចុប្បន្នទេ ហើយមិនត្រូវមានអាវុធចូលជំនួយបន្ថែម ជិតទីតាំងព្រំដែន ហើយមិនបង្កភាពតានតឹង។
ទី២-តំបន់ដែលមិនទាន់ដាច់ស្រេច ដែលស្ថិតនៅក្រោមអនុស្សារណៈ នៃការយោគយល់គ្នាឆ្នាំ២០០០ ភាគីទាំង២ អាចចុះល្បាតពិនិត្យមើលបានដោយមិនត្រូវឱ្យមានសំណង់ ឬការសាងសង់ថ្មីណាមួយកើតឡើងទេ។
ទី៣-ការបោសម្អាតមីនតាមតំបន់ក្បែរព្រំដែនភាគីថៃអាចដំណើរការដោយគ្មានការរារាំងណាមួយឡើយ។
ជាការឆ្លើយតប មេបញ្ជាការយុទ្ធភូមិភាគទី៣កម្ពុជា បានលើកឡើងថា ចំពោះកម្ពុជាមានបំណងចង់រក្សាសុខសន្តិភាព ចង់ឱ្យប្រជាជនប្រទេសទាំងពីរ រស់នៅដោមានសេចក្តីសុខ និងមានការអភិវឌ្ឍន៍តាមបណ្តោយព្រំដែន ដូចជា ៖
ទី១-កម្ពុជាស្នើឱ្យរក្សាស្ថានភាពដូចថ្ងៃទី២៨ ខែឧសភា ឆ្នាំ២០២៥
ទី២-មិនត្រូវបង្កើនកម្លាំងយោធាតាមបណ្តោយព្រំដែន
ទី៣-មិនបង្កើនសព្វាវុធ គ្រប់ប្រភេទតាមខ្សែបន្ទាត់ព្រំដែន និងចំពោះការស្នើចុះល្បាតនៅតាមតំបន់មិនទាន់ដាច់ស្រេចជម្លោះ ដែលបានកំណត់ក្នុងអនុស្សារណៈ នៃការយោគយល់គ្នាឆ្នាំ២០០០ និងការបោសសម្អាតមីន នៅតំបន់ក្បែរព្រំដែន ស្នើឱ្យភាគីទាំងពីរ រង់ចាំកិច្ចប្រជុំរបស់គណៈកម្មាធិការព្រំដែនទូទៅកម្ពុជា-ថៃ (GBC) ដែលនឹងធ្វើឡើងនៅថ្ងៃទី៤ ខែសីហា ឆ្នាំ២០២៥ រវាងក្រសួងការពារជាតិកម្ពុជា និងថៃជាមុនសិន ។ ហើយបើលទ្ធផលសម្រេចបានយ៉ាងណាយើងហ្នឹងសម្រេចតាមនោះផងដែរ ។
លោកជំទាវឧត្តមសេនីយ៍ឯក ម៉ាលី សុជាតា បានថ្លែងដែរថា ភាគីទាំងពីរ បានឯកភាពគ្នាលើចំណុចដូចខាងក្រោម ៖ចំពោះការកំណត់ព្រំដែនរង់ចាំសម្រេចរបស់ (GBC),ទី២៖រក្សាមិនបង្កើនកម្លាំងនិងសព្វាវុធ ។ ចំពោះការស្នើសុំចុះល្បាតក្នុងតំបន់មិនទាន់ដាច់ស្រេចនិងការបោសសម្អាតមីននៅតាមព្រំដែនស្នើដាក់ទៅជាមួយ(GBC)សម្រេច៕
ចែករំលែកព័តមាននេះ