រាជជានីភ្នំពេញ ៖ បន្ទាប់ពីមានកិច្ចព្រមព្រៀង ”បទឈប់បាញ់កម្ពុជា-ថៃ” ត្រូវបានទទួលការសាទរយ៉ាងខ្លាំងក្លាពីបណ្តាប្រទេសមហាអំណាចធំៗ និងសហគមន៍អន្តរជាតិ ដែលនឹងជំរុញឱ្យភាគីទាំង២ អនុវត្តបានពេញលេញ នេះបើតាមអ្នកនាំពាក្យក្រសួងការបរទេសកម្ពុជា ។…
រាជជានីភ្នំពេញ ៖ បន្ទាប់ពីមានកិច្ចព្រមព្រៀង ”បទឈប់បាញ់កម្ពុជា-ថៃ” ត្រូវបានទទួលការសាទរយ៉ាងខ្លាំងក្លាពីបណ្តាប្រទេសមហាអំណាចធំៗ និងសហគមន៍អន្តរជាតិ ដែលនឹងជំរុញឱ្យភាគីទាំង២ អនុវត្តបានពេញលេញ នេះបើតាមអ្នកនាំពាក្យក្រសួងការបរទេសកម្ពុជា ។
ឯកឧត្តម ជុំ សន្ទរី អ្នកនាំពាក្យក្រសួងការបរទេស និងសហប្រតិបត្តិការ អន្តរជាតិកម្ពុជា បានលើកឡើងនៅក្នុងសន្និសីទសារព័ត៌មាន ដែលរៀបចំឡើងដោយអ្នកនាំពាក្យរាជរដ្ឋាភិបាលកម្ពុជា ដើម្បីសង្ខេបព័ត៌មានស្តីពី «លទ្ធផលនៃការអនុវត្តបទឈប់បាញ់រវាងកម្ពុជា-ថៃ» នារសៀលថ្ងៃទី២៩ ខែកក្កដា ឆ្នាំ២០២៥ ថា មហាអំណាចធំៗ និងសហគមន៍អន្តរជាតិ រួមមាន សហរដ្ឋអាមេរិក អង្គការសហប្រជាតិ ជប៉ុន អូស្ត្រាលី សហភាពអឺរ៉ុប ចក្រភពអង់ បារាំង អាល្លឺម៉ង់ សុទ្ធតែបានចេញសារអបអរសាទរ និងអំពាវនាវឱ្យភាគីទាំងពីរ គោរពកិច្ចព្រមព្រៀងនេះ នឹងធ្វើការជាមួយគ្នា ឆ្ពោះទៅរកដំណោះស្រាយដោយសន្តិវិធី ។
ឯកឧត្តម ជុំ សន្ទរី បានលើកឡើងថា លោក ដូណាល់ ត្រាំ ប្រធានាធិបតីអាមេរិក ដែលបានចូលរួមយ៉ាងសកម្មក្នុងការកិច្ចចរចានាំឱ្យមានបទឈប់បាញ់នេះ បានលើកឡើងនៅក្នុងបណ្តាញសង្គមរបស់លោកថា លោកទើបតែបានសន្ទនាជាមួយនាយករដ្ឋមន្ត្រីស្តីទីថៃ និងនាយករដ្ឋមន្ត្រីកម្ពុជា។ លោកមានក្តីរីករាយសូមប្រកាសថា បន្ទាប់ពីការចូលរួមរបស់លោក ប្រទេសទាំងពីរ បានឈានដល់កិច្ចព្រមព្រៀងឈប់បាញ់ និងសន្តិភាព ។
លោក ដូណាល់ ត្រាំបន្ថែមថា តាមរយៈការបញ្ចប់សង្គ្រាមនេះ យើងបានសង្គ្រោះជីវិតមនុស្សរាប់ពាន់នាក់។ ដោយសារបទឈប់បាញ់នេះ លោកបញ្ជាឲ្យក្រុមការងារពាណិជ្ជកម្មរបស់លោកចាប់ផ្តើម ការចរចាជាមួយប្រទេសទាំងពីរឡើងវិញ។ជាមួយគ្នានេះ លោកក៏បានបញ្ជាក់ថា លោកបានចូលបញ្ចប់សង្គ្រាមជាច្រើន ក្នុងរយៈពេល៦ខែ ដែលជាមោទនភាពមួយ ហើយចាត់ទុកថា លោកគឺជាប្រធានាធិបតីសម្រាប់សន្តិភាព ។
ជាមួយគ្នានេះដែរ រដ្ឋមន្ត្រីការបរទេសអាមេរិក លោក ម៉ាកូ រ៉ូប៊ីយ៉ូ បានសម្តែងការសាទរចំពោះកិច្ចព្រមព្រៀងបទឈប់បាញ់រវាងកម្ពុជា និងថៃ ដោយបានបញ្ជាក់ថា លោកប្រធានាធិបតី Trump និងរូបលោកផ្ទាល់ ប្តេជ្ញាបញ្ឈប់អំពើហិង្សាជាបន្ទាន់ ហើយរំពឹងថា រដ្ឋាភិបាល នៃប្រទេសកម្ពុជា និងថៃ នឹងគោរពយ៉ាងពេញលេញនូវការប្តេជ្ញាចិត្តក្នុងការបញ្ចប់ជម្លោះនេះ ។
បើតាមអ្នកនាំពាក្យ ក្រសួងការបទេសកម្ពុជាដដែលបានលើកឡើងថា ប្រមុខការទូតអាមេរិក បានបញ្ជាក់ដូច្នេះ «យើងសូមកោតសរសើរចំពោះនាយករដ្ឋមន្ត្រី អាន់វ៉ា អ៊ីប្រាហ៊ីម ចំពោះភាពជាអ្នកដឹកនាំរបស់លោក និងរដ្ឋាភិបាលម៉ាឡេស៊ី ដែលបានធ្វើជាម្ចាស់ផ្ទះ នៃកិច្ចពិភាក្សាទាំងនេះ។ យើងសូមអំពាវនាវដល់គ្រប់ភាគី ឱ្យអនុវត្តតាមការប្តេជ្ញាចិត្តរបស់ពួកគេ ហើយសហរដ្ឋអាមេរិក នឹងបន្តចូលរួមក្នុងដំណើរការនេះ ដែលរៀបចំដោយសហរដ្ឋអាមេរិក និងម៉ាឡេស៊ី ដើម្បីបញ្ចប់ជម្លោះ» ។
ឯកឧត្តម អ្នកនាំពាក្យ ក៏បានឲ្យដឹងថា ទន្ទឹមគ្នានេះ អគ្គលេខាធិការ អង្គការសហប្រជាជាតិ លោក Antonio Guterres ស្វាគមន៍ចំពោះបទបាញ់គ្នារវាកម្ពុជា និងថៃ ដែលជាជំហានវិជ្ជមានមួយឆ្ពោះទៅរកការបញ្ចប់នូវអរិភាពបច្ចុប្បន្ន និងការធ្វើឱ្យមានភាពធូរស្រាលចំពោះភាពតានតឹងនេះ ។លោកថែមទាំងស្នើឱ្យភាគីទាំងពីរគោរពកិច្ចព្រមព្រៀងនេះឱ្យបានពេញលេញ។ អង្គការសហប្រជាជាតិ ត្រៀមខ្លួនរួចជាស្រេច ដើម្បីគាំទ្រ ដល់ការខិតខំប្រឹងប្រែង ដែលសំដៅលើកស្ទួយសន្តិភាព និងស្ថេរភាព នៅក្នុងតំបន់ ។
ក្នុងនោះ ដែលរដ្ឋមន្ត្រីកាបរទេជប៉ុន ក៏សាទរ និងលើកឡើងពីសារៈសំខាន់ នៃទំនាក់ទំនងទ្វេភាគីរវាងកម្ពុជា និងថៃ មានតម្លៃណាស់ សម្រាប់សន្តិភាព និងស្ថេរភាពក្នុងតំបន់។ ក្នុងន័យនេះ ជប៉ុនបាននឹងកំពុងធ្វើការទំនាក់ទំនងជាមួយកម្ពុជា និងថៃ ដើម្បីបន្ធូបន្ថយភាពតានតឹង ។
ចំណែកប្រទេសអូស្ត្រាលី សហភាពអឺរ៉ុប ចក្រភពអង់ បារាំង អាល្លឺម៉ង់ ក៏បានចេញសារអបអរសាទរ និងអំពាវនាវឱ្យភាគីទាំងពីរគោរពកិច្ចព្រមព្រៀងនេះ នឹងធ្វើការជាមួយគ្នា ឆ្ពោះទៅរកដំណោះស្រាយដោយសន្តិវិធីដូចគ្នាផងដែរ ។ ជប៉ុនបានចាត់ទុកទំនាក់ទំនងល្អរវាងប្រទេសកម្ពុជា និងថៃ មានសារៈសំខាន់ខ្លាំងណាស់សម្រាប់សន្តិភាព និងស្ថិរភាពក្នុងតំបន់ ។
យោងតាមសេចក្តីថ្លែងការណ៍របស់រដ្ឋមន្ត្រីការបរទេសជប៉ុន បានលើកឡើងថា កិច្ចព្រមព្រៀងបទឈប់បាញ់រវាងប្រទេសកម្ពុជា និងថៃរដ្ឋាភិបាលជប៉ុន ចាត់ទុកថា ទំនាក់ទំនងល្អរវាងប្រទេសកម្ពុជា និងថៃ មានសារៈសំខាន់ខ្លាំងណាស់សម្រាប់សន្តិភាព និងស្ថិរភាពក្នុងតំបន់។ ក្នុងន័យនេះ ប្រទេសជប៉ុន បាននិងកំពុងធ្វើការទំនាក់ទំនងជាមួយប្រទេសកម្ពុជា និងថៃ ដើម្បីបន្ធូរបន្ថយភាពតានតឹង ។
សេចក្តីថ្លែងការណ៍ប្រទេសជប៉ុន សូមចូលរួមសាទរប្រទេសកម្ពុជា និងថៃ ដែលបានសម្រេចឈានដល់កិច្ចព្រមព្រៀងបទឈប់បាញ់បន្ទាន់ និងឥតលក្ខខណ្ឌ។ ប្រទេសជប៉ុន ក៏សូមសម្តែងការវាយតំលៃខ្ពស់ ចំពោះកិច្ចខិតខំប្រឹងប្រែងការទូតរបស់គ្រប់ភាគីពាក់ព័ន្ធ ដើម្បីសម្រេចបាន នូវកិច្ចព្រមព្រៀងនេះ ដោយរួមមានប្រទេសម៉ាឡេស៊ី ដែលជាម្ចាស់ផ្ទះ នៃកិច្ចប្រជុំពិសេសលើកនេះ និងសហរដ្ឋអាម៉េរិក ដែលជាសហអ្នករៀបចំ ។
ជាមួយគ្នានោះដែរ រដ្ឋាភិបាលជប៉ុន នឹងបន្តលើកទឹកចិត្តប្រទេសកម្ពុជា និងថៃ ដើម្បីជំរុញការអនុវត្តយ៉ាងប្រាកដប្រជា នូវកិច្ចព្រមព្រៀងបទឈប់បាញ់ និងបន្ធូរបន្ថយភាពតានតឹង ដោយសម្របសម្រួលជាមួយប្រទេសពាក់ព័ន្ធ ។
ចំណែកប្រទេសបារាំង ក៏បានអំពាវនាវឱ្យកម្ពុជា-ថៃ អនុវត្តបទឈប់បាញ់ប្រកបដោយប្រសិទ្ធភាព នេះបើតាមអ្នកនាំពាក្យក្រសួងការបទេស និងសហប្រតិបត្តិការអន្តរជាតិកម្ពុជា ។
ឯកឧត្តម ជុំ សុន្ទរី អ្នកនាំពាក្យក្រសួងការបទេស បានឲ្យដឹងថា យោងតាមសេចក្តីថ្លែងការណ៍របស់ស្ថានទូតបារាំងបានលើកឡើងថា ប្រទេសបារាំងវាយតម្លៃខ្ពស់ ចំពោះការប្រកាសពីបទឈប់បាញ់ ដែលចូលជាធរមានចាប់ពីយប់ថ្ងៃចន្ទ ទី២៨ ខែកក្កដា និងការចាប់ផ្តើមកិច្ចសន្ទនារវាងប្រទេសកម្ពុជា និងប្រទេសថៃ ក្រោយជំនួបរវាងនាយករដ្ឋមន្ត្រីនៃប្រទេសទាំងពីរ ដែលបានប្រព្រឹត្តទៅនៅប្រទេសម៉ាឡេស៊ី នៅថ្ងៃទី២៨ ខែកក្កដា ។
ឯកឧត្តម បានលើកឡើងថា ៖ ប្រទេសបារាំង អំពាវនាវឱ្យមានការអនុវត្តបទឈប់បាញ់ប្រកបដោយប្រសិទ្ធភាព។ ប្រទេសបារាំង វាយតម្លៃខ្ពស់ចំពោះតួនាទីសម្របសម្រួលរបស់លោកនាយករដ្ឋមន្ត្រីម៉ាឡេស៊ី អាន់វ៉ា អ៊ីប្រាហ៊ីម ក្នុងនាមជាប្រធានប្តូរវេនអាស៊ាន ហើយបារាំងសូមគូសបញ្ជាក់ជាថ្មី ពីការគាំទ្រដល់មជ្ឈភាពអាស៊ាន ក្នុងការដោះស្រាយជម្លោះនានាក្នុងតំបន់ ។
ការវិវត្តគួឱ្យកត់សម្គាល់នេះ គឺជាចំណុចចាប់ផ្តើម នៃការដោះស្រាយជម្លោះប្រកបដោយចីរភាព តាមមាគ៌ាសន្តិភាព ដោយផ្អែកលើច្បាប់អន្តរជាតិ។ ក្នុងន័យនេះ ប្រទេសបារាំងត្រៀមខ្លួនជានិច្ច ក្នុងការរួមចំណែកដល់កិច្ចខិតខំប្រឹងប្រែងអន្តរជាតិ ជាពិសេសកិច្ចខិតខំប្រែងប្រែងរបស់អាស៊ាន ។
គួរបញ្ជាក់ថា បទឈប់បាញ់មួយរវាងកម្ពុជា និងថៃ ត្រូវបានសម្រេចឡើង ក្រោយកិច្ចប្រជុំបន្ទាន់រវាងនាយករដ្ឋមន្ត្រីកម្ពុជា សម្តេចបវរធិបតី ហ៊ុន ម៉ាណែត និងនាយករដ្ឋមន្ត្រីស្តីទីថៃ លោក Phumtham Wechayachai នៅរសៀលថ្ងៃចន្ទ ក្នុងទីក្រុងកូឡាឡាំពួ ប្រទេសម៉ាឡេស៊ី ក្រោមការសម្របសម្រួលរបស់លោក អានវ៉ា អ៊ីប្រាហ៊ឹម នាយករដ្ឋមន្ត្រីម៉ាឡេស៊ី ដោយមានការចូលរួមពីតំណាងសហរដ្ឋអាមេរិក និងចិន ៕
ចែករំលែកព័តមាននេះ