ទីក្រុងស្តក់ហូម៖ ថ្ងៃនេះ គណៈប្រតិភូអាមេរិក និងចិនជួបគ្នានៅទីក្រុងស្តក់ហូម ប្រទេសស៊ុយអែត ដើម្បីពិភាក្សាគ្នាអំពីការពន្យារពេលយកពន្ធទៅលើទំនិញរបស់ប្រទេសចិន។ រដ្ឋមន្ត្រីក្រសួងរតនាគារ លោកស្កុត បឺសឹន (Scott…
ទីក្រុងស្តក់ហូម៖ ថ្ងៃនេះ គណៈប្រតិភូអាមេរិក និងចិនជួបគ្នានៅទីក្រុងស្តក់ហូម ប្រទេសស៊ុយអែត ដើម្បីពិភាក្សាគ្នាអំពីការពន្យារពេលយកពន្ធទៅលើទំនិញរបស់ប្រទេសចិន។ រដ្ឋមន្ត្រីក្រសួងរតនាគារ លោកស្កុត បឺសឹន (Scott Bessent) ក៏មានវត្តមាននៅក្នុងក្រុមអ្នកចរចានោះផងដែរ។ ចំណែកខាងភាគីចិនមានឧបនាយករដ្ឋមន្ត្រីចិន លោកហឺលីហ្វឹង (He Lifeng)។
ប្រទេសចិនមានពេលរហូតដល់ថ្ងៃទី១២ ខែសីហាដើម្បីចរចាកិច្ចព្រមព្រៀងស្ដីពីការនាំចូលទំនិញដែលជាប់ធន់បានយូរ។ ប្រទេសទាំង២ធ្លាប់បានឯកភាពគ្នាជាគោលៗកាលពីខែឧសភា និងមិថុនាដើម្បីបិទបញ្ចប់ការដំឡើងពន្ធគ្នាទៅវិញទៅមករហូតដល់១២៥% និង១៤៥%។ ក្រោយមកប្រទេសចិនហាមឃាតការនាំចេញរ៉ែកម្រទៅលក់នៅអាមេរិក។
បើការចរចាគ្នាលើកនេះគ្មានកិច្ចព្រមព្រៀងទេ មានន័យថាសង្វាក់ផ្គត់ផ្គង់ទូទាំងពិភពលោកអាចនឹងមានបញ្ហាព្រោះប្រទេសទាំង២នឹងដំឡើងពន្ធគ្នាជាង១០០%ទៅវិញទៅមក។ អត្រាពន្ធដល់ខ្ពស់ថ្នាក់ហ្នឹងរកស៊ីជាមួយគ្នាមិនកើតទេ។ ទំនិញត្រូវជាប់គាំងយកទៅលក់លែងកើតតែម្ដង។ អ្នកតំណាងក្រសួងពាណិជ្ជកម្មអាមេរិកថ្លែងថាលោកមិនសូវរំពឹងខ្ពស់ពេកពីការចរចាគ្នាលើកនេះទេ។
អ្នកវិភាគយល់ថាលទ្ធផលចរចាគ្នាអាចជាការព្យួរទុកការដំឡើងពន្ធរយៈពេល៩០ថ្ងៃទៅមុខទៀត។ បើដូច្នេះមែនអាចធ្វើឱ្យប្រទេសចិនត្រជាក់ចិត្តខ្លះ។ ចិនអាចនឹងយល់ព្រមរៀបចំកិច្ចជំនួបរវាងលោកត្រាំ និងលោកស៊ីជីនពីងនៅចុងខែតុលា ឬដើមខែវិច្ឆិកា។ កាលពីមុននេះ សារព័ត៌មានដឹហ្វាយណាន់សល ថាមស៍ (The Financial Times) ចុះផ្សាយថាអាមេរិកអនុញ្ញាតឱ្យនាំចេញបច្ចេកវិទ្យាទៅប្រទេសចិនដើម្បីកុំឱ្យរំខានការចរចាគ្នា និងដើម្បីធានាការជួបគ្នារវាងថ្នាក់ដឹកនាំទាំង២នាពេលខាងមុខ៕
ចែករំលែកព័តមាននេះ