រាជធានីភ្នំពេញ៖ ក្រុមយុវជនស្ម័គ្រចិត្ត​ ជួយបង្រៀនសិស្សនៅតាមជំរំភៀសខ្លួន ក្នុងតំបន់រងគ្រាប់ផ្លោងតាមព្រំដែនដែនកម្ពុជា-ថៃ ជាពិសេសខេត្តឧត្តរមានជ័យ និងខេត្តព្រះវិហារ។

បើតាមក្រសួងអប់រំ យុវជន និង កីឡា បានឱ្យដឹងនៅថ្ងៃទី២៩ ខែកក្កដា ឆ្នាំ២០២៥ ថា ក្រុមយុវជនស្ម័គ្រចិត្តកម្ពុជាសម្រាប់វិស័យអប់រំ​ បានជួបសម្ដែងការគួរសមនិងពិភាក្សាជាមួយ​ លោកបណ្ឌិត កាន់​ ពុទ្ធិ​ ប្រធាននាយកដ្ឋានបឋមសិក្សា​ នៃក្រសួងអប់រំ​ យុវជន​ និងកីឡា។

ក្នុងជំនួបនេះ ក្រុមការងារបានសម្រេចនិងឯកភាពលើគោលដៅរួមគ្នាដូចជា៖ សហការជាមួយក្រសួងអប់រំ យុវជន និងកីឡា ដើម្បីរៀបចំបន្ទប់រៀន តង់ទីកន្លែងសមស្របផ្សេងៗ សម្រាប់ការបន្តការសិក្សារបស់សិស្សានុសិស្ស ជាពិសេសនៅតាមបណ្ដាខេត្តជាប់ព្រំដែន, រៀបចំយុវជនស្ម័គ្រចិត្ត ជួយបង្រៀនសិស្សនៅតាមជំរំ ពិសេសខេត្តឧត្តរមានជ័យ និងខេត្តព្រះវិហារ, កៀរគរសប្បុរសជន​​ ក្នុងការផ្គត់ផ្គង់ជាសៀវភៅ​ និងសម្ភារៈសិក្សាចាំបាច់​ សម្រាប់បន្តការសិក្សាជាបណ្ដោះអាសន្ន និងចូលរួមលើកទឹកចិត្តដល់ប្អូនៗសិស្សានុសិស្ស​ នៅតាមទីតាំងសុវត្ថិភាព​ ដែលងាយរងគ្រោះដោយការប៉ះទង្គិចផ្លូវចិត្ត តាមរយៈសកម្មភាពផ្សេងៗ។

​យោងតាមរបាយការណ៍របស់ក្រសួងអប់រំ សាលារៀនប្រមាណ ៦០៥ កន្លែងត្រូវបានបិទទ្វារ ព្រមទាំង​កុមារ និងសិស្សានុសិស្សរងគ្រោះ​ ដែលប៉ះពាល់ការសិក្សាប្រមាណ ១៥ម៉ឺននាក់ និងគ្រូបង្រៀនជិត៧ពាន់ នាក់ ដោយសារការឈ្លានពាននៅតាមបណ្ដោយព្រំដែនកម្ពុជា-ថៃ៕

​