ទីក្រុងវ៉ាស៊ីនតោន៖ គួរឱ្យភ្ញាក់ផ្អើល អាកាសយានិកម្នាក់របស់ក្រុមហ៊ុនអាកាសចរណ៍ដែលតា អ៊ែឡាញ (Delta Airlines) គ្រាន់តែបើកយន្តហោះចុះដល់ដីភ្លាម សមត្ថកិច្ចឡើងទៅលើយន្តហោះដើម្បីចាប់ក្របួចអាកាសយានិកម្នាក់ចុះពីលើយន្តហោះតែម្ដង។ ហេតុការណ៍នេះកើតឡើងនៅទីក្រុងសាន់ហ្វ្រាន់ស៊ីស្កូ (San…
ទីក្រុងវ៉ាស៊ីនតោន៖ គួរឱ្យភ្ញាក់ផ្អើល អាកាសយានិកម្នាក់របស់ក្រុមហ៊ុនអាកាសចរណ៍ដែលតា អ៊ែឡាញ (Delta Airlines) គ្រាន់តែបើកយន្តហោះចុះដល់ដីភ្លាម សមត្ថកិច្ចឡើងទៅលើយន្តហោះដើម្បីចាប់ក្របួចអាកាសយានិកម្នាក់ចុះពីលើយន្តហោះតែម្ដង។ ហេតុការណ៍នេះកើតឡើងនៅទីក្រុងសាន់ហ្វ្រាន់ស៊ីស្កូ (San Francisco) រដ្ឋកាលីហ្វ័រញ៉ា ប្រទេសអាមេរិក។
ប្រភពខ្លះបង្ហើបឱ្យដឹងថាការចាប់ខ្លួនអាកាសយានិករងម្នាក់នោះកើតឡើងបន្ទាប់ពីសមត្ថកិច្ចបានដាក់ពាក្យប្ដឹងគាត់ទៅតុលាការពីបទកាន់កាប់រូប និងវីឌីអូអាសអាភាសកុមារ។ ពាក្យបណ្ដឹងនេះធ្វើឡើងពីច្រើនស្ថាប័នរួមទាំងក្រសួងសន្តិសុខមាតុភូមិ (ប្រហាក់ប្រហែលនឹងក្រសួងមហាផ្ទៃនៅប្រទេសដទៃ) និងនគរបាលថ្នាក់មូលដ្ឋានផងដែរ។
ហេតុការណ៍ចាប់ខ្លួនកើតឡើងនៅលើយន្តហោះរបស់ដែលតា អ៊ែឡាញ ជើងហោះហើរលេខ២៨០៩ នោះកើតឡើងនៅម៉ោងប្រហែល៩:៣៥ក្បាលព្រលប់។ យន្តហោះនេះបានចាកចេញដំណើរពីទីក្រុងមីណេប៉ូលី (Minneapolis) រដ្ឋមីណេសូតា (Minnesota) ប្រទេសអាមេរិក។ ប៉ុន្តែជើងហោះហើរត្រូវពន្យារពេលចេញដំណើរដោយសារពេលនោះមានចុះអ័ព្ទខ្លាំងពេក។
ទូរទស្សន៍ហ្វក់ញូស៍ (Fox News) ផ្សាយថាដើមហេតុដែលនាំឱ្យមានការចាប់ខ្លួននោះបន្ទាប់ពីមានគេប្ដឹងថាគាត់កាន់កាប់រូបភាព ឬវីឌីអូបៀតបៀនកុមារ។ សារព័ត៌មានសាន់ហ្វ្រាន់ស៊ីស្កូ ក្រូនីខល (The San Francisco Chronicle) ផ្សាយថាមនុស្ស១ក្រុមមានផ្លាកសម្គាល់, មានកាំភ្លើង និងពាក់អាវកាក់មកពីស្ថាប័នចម្រុះបានដើរបន្តបន្ទាប់គ្នាតម្រង់ទៅរកបន្ទប់អ្នកបើកយន្តហោះ។
សារព័ត៌មានដដែលនេះផ្សាយថាសមត្ថកិច្ចចម្រុះសម្រុកចូលទៅកន្លែងពីឡុត, វាយខ្នោះដៃ, ចាប់ខ្លួន និងបណ្ដើរចុះមកក្រោម។ អាកាសយានិកម្នាក់ទៀតនៅពេលឃើញព្រឹត្តិការណ៍នេះកើតឡើង គាត់មានអារម្មណ៍ភាន់ភាំងរកនិយាយអ្វីមិនចេញ ហើយក៏មិនដឹងថាមានរឿងអ្វីកើតឡើងនោះទេ។ ប្រភពខ្លះថាសមត្ថកិច្ចដែលចុះទៅចាប់ខ្លួននោះមានគ្នាប្រហែលដប់នាក់។ បន្ទាប់ពីចាប់ខ្លួនរួច សមត្ថកិច្ចបន្តស្ថិតនៅក្នុងយន្តហោះដើម្បីប្រមូលសម្ភារៈរបស់អាកាសយានិកដែលចាប់ខ្លួននោះ៕
ចែករំលែកព័តមាននេះ