រាជធានីភ្នំពេញ ៖ អ្នកនាំពាក្យក្រសួងការបរទេសអាមេរិក បានឲ្យដឹងនៅយប់ថ្ងៃទី២៧ ខែកក្កដា ឆ្នា២០២៥នេះថា លោក Marco Rubio រដ្ឋមន្ត្រីក្រសួងការបរទេសអាមេរិក…
រាជធានីភ្នំពេញ ៖ អ្នកនាំពាក្យក្រសួងការបរទេសអាមេរិក បានឲ្យដឹងនៅយប់ថ្ងៃទី២៧ ខែកក្កដា ឆ្នា២០២៥នេះថា លោក Marco Rubio រដ្ឋមន្ត្រីក្រសួងការបរទេសអាមេរិក បានសន្ទនាជាមួយឯកឧត្តម ប្រាក់ សុខុន ឧបនាយករដ្ឋមន្ត្រី និងរដ្ឋមន្ត្រីក្រសួងការបរទេសកម្ពុជា ដើម្បីអំពាវនាវឱ្យរដ្ឋាភិបាលកម្ពុជា បន្ធូរបន្ថយភាពតានតឹងជាបន្ទាន់ និងយល់ព្រមលើកិច្ចព្រមព្រៀងបទឈប់បាញ់គ្នាជាមួយប្រទេសថៃ ក្នុងវិវាទព្រំដែន ដែលកំពុងបន្ត នេះបើយោងតាមផេកផ្លូវការរបស់ស្ថានទូតសហរដ្ឋអាមេរិក ប្រចាំទីក្រុងភ្នំពេញ ។
ក្នុងពេលដំណាលគ្នានេះដែរ រដ្ឋមន្ត្រីការបរទេសសហរដ្ឋអាមេរិកលោក Marco Rubio ក៏បានសន្ទនាតាមទូរសព្ទជាមួយរដ្ឋមន្ត្រីការបរទេសថៃ លោក Maris Sangiampongsa ដើម្បីណែនាំអោយរាជរដ្ឋាភិបាលថៃ បន្ថយភាពតានតឹងជាបន្ទាន់ ហើយយល់ព្រមលើបទឈប់បាញ់ជាមួយកម្ពុជា ជុំវិញជម្លោះព្រំដែន ដែលកំពុងបន្ត ។
លោក Marco Rubio បានបញ្ជាក់ឡើងវិញ នូវបំណងប្រាថ្នារបស់លោកប្រធានាធិបតី ដូណាល់ ត្រាំ ដែលចង់បានសន្តិភាព និងសារៈសំខាន់ នៃការឈប់បាញ់គ្នាជាបន្ទាន់ ។
សហរដ្ឋអាមេរិក ត្រៀមខ្លួន ដើម្បីជួយសម្របសម្រួលកិច្ចពិភាក្សា នាពេលខាងមុខ ដើម្បីធានានូវសន្តិភាព និងស្ថិរភាពរវាងប្រទេសកម្ពុជា និងថៃ ៕
ចែករំលែកព័តមាននេះ