ទីក្រុងហាណូយ៖ អ្នកបើករថយន្តបឺសវៀតណាមម្នាក់ត្រូវសមត្ថកិច្ចចាប់ឃុំខ្លួនបន្ទាប់ពីមានហេតុការណ៍ស្លាប់មនុស្សដប់នាក់ និងរបួស១៥នាក់ដោយសារគ្រោះថ្នាក់ចរាចរណ៍នៅភាគកណ្ដាល។ ជនសង្ស័យឈ្មោះឡេង៉ុកថាញ់ (Le Ngoc Thanh) អាយុ៣៦ឆ្នាំត្រូវចាប់ខ្លួនកាលពីថ្ងៃទី២៦ ខែកក្កដា នៅខេត្តហាទិញ…
ទីក្រុងហាណូយ៖ អ្នកបើករថយន្តបឺសវៀតណាមម្នាក់ត្រូវសមត្ថកិច្ចចាប់ឃុំខ្លួនបន្ទាប់ពីមានហេតុការណ៍ស្លាប់មនុស្សដប់នាក់ និងរបួស១៥នាក់ដោយសារគ្រោះថ្នាក់ចរាចរណ៍នៅភាគកណ្ដាល។ ជនសង្ស័យឈ្មោះឡេង៉ុកថាញ់ (Le Ngoc Thanh) អាយុ៣៦ឆ្នាំត្រូវចាប់ខ្លួនកាលពីថ្ងៃទី២៦ ខែកក្កដា នៅខេត្តហាទិញ (Ha Tinh) ពីបទសង្ស័យធ្វើខុសនឹងច្បាប់ចរាចរណ៍។
ជនសង្ស័យបើកបររថយន្តដែលអ្នកដំណើរអាចគេងយប់។ កំពុងបើកបរយ៉ាងលឿន គាត់បាត់ម្ចាស់ការ និងជ្រុលចង្កូតទៅបុកបង្គោលចំហៀងផ្លូវ និងបុកបង្គោលភ្លើងថែមទៀត។ ក្រោយមករថយន្តបឺសនោះក៏ក្រឡាប់តែម្ដង។ សមត្ថកិច្ចស្រាវជ្រាវឃើញថានៅពេលកើតហេតុ រថយន្តនេះបើកល្បឿន៩៩គីឡូម៉ែត្រក្នុងមួយម៉ោង មានន័យថាលើសល្បឿនកំណត់អតិបរមាត្រឹម៨០គីឡូម៉ែត្រក្នុងមួយម៉ោង។
ហេតុការណ៍ភ្លូករថយន្តនេះកើតឡើងនៅវេលាម៉ោង២:១០រំលងអធ្រាត្រនៅតាមបណ្ដោយផ្លូវជាតិលេខ១ត្រង់ម្ដុំក្រុងគីអាញ់ (Ky Anh)។ រថយន្តបឺសដែលចុះផ្លាកលេខនៅទីក្រុងដាណាងមួយគ្រឿងនេះជារបស់ក្រុមហ៊ុនដឹកជញ្ជូនតាន់គឹមឈី (Tan Kim Chi)។ រថយន្តត្រូវចេញដំណើរពីដាណាងទៅហាណូយនៅលើចម្ងាយផ្លូវជាង៧០០គីឡូម៉ែត្រ។ នៅក្នុងរថយន្តបឺសនោះមានអ្នកដំណើរជាង៣០នាក់។
សាក្សីនិយាយថាជនរងគ្រោះ៩នាក់ស្លាប់ភ្លាមៗនៅនឹងកន្លែងកើតហេតុ ខណៈដែលម្នាក់ទៀតស្លាប់ក្រោយពេលបញ្ជូនទៅមន្ទីរពេទ្យដោយសារមុខរបួសធ្ងន់ធ្ងរពេក។ នៅក្នុងចំណោមអ្នករបួសក៏មានជនជាតិឡាវម្នាក់ផងដែរ។ មុនពេលកើតហេតុ គេឃើញថានៅតាមដងផ្លូវស្រឡះល្អ មានពន្លឺគ្រប់គ្រាន់ និងមានទំហំផ្លូវធំទូលាយ។
ដូចនេះជនសង្ស័យពិបាកនឹងរកហេតុផលសមរម្យសម្រាប់ឆ្លើយដោះសា។ ទោះបីនៅពេលនោះមានភ្លៀងធ្លាក់ស្រិចៗ ប៉ុន្តែគ្មានចំណុចបត់ ឬពិបាកមើលផ្លូវនោះទេ។ ក្រុមអ្នកស៊ើបអង្កេតសន្និដ្ឋានថាមូលហេតុនៃគ្រោះថ្នាក់នេះបណ្ដាលមកពីកំហុសឆ្គងរបស់អ្នកបើកបរ និងការបើកលឿនពេក។
រថយន្តបឺសមួយគ្រឿងនោះផលិតឆ្នាំ២០២៣។ បញ្ហាគុណភាព និងបច្ចេកទេសមិនអីទេព្រោះបានយកទៅឆៀក និងអនុញ្ញាតឱ្យដំណើរការដល់ឆ្នាំ២០២៦ទើបឆៀកមួយសាទៀត។ ទោះជាយ៉ាងណាក្ដី រថយន្តនេះមិនទាន់ទទួលបានការអនុញ្ញាតជាផ្លូវការដើម្បីដឹកមនុស្សជាអាជីពទេ។ មន្ទីរដឹកជញ្ជូនទីក្រុងដាណាងទើបតែដកហូតអាជ្ញាប័ណ្ណកាលពីថ្ងៃទី១៦ ខែកក្កដា។ ដូច្នេះផុតសុពលភាពបាត់ទៅហើយ។ ប៉ុន្តែម្ចាស់ក្រុមហ៊ុននៅតែយកឡាននេះមកដឹកមនុស្សទៀត៕
ចែករំលែកព័តមាននេះ